ءبىر پولياك پەن ءۇش قازاق: سەرگەي, تالعات,
ەلۋباي جانە مۇرات ەسىمدەرىنىڭ باس ارىپتەرىنەن الىنعان شارۋاشىلىق وسىلاي اتالادى
«استىق-ستەم» جشس تىنىس-تىرشىلىگى كىسى قىزىعارلىقتاي. ءبىر پولياك پەن ءۇش قازاق جىگىتىنىڭ ءوزارا سىيلاستىعى مەن تۇسىنىستىگىنەن قۇرىلعان باسشىلىق قۇرام ءۇش ەلدى مەكەن تۇرعىندارىنا ىرىس-بەرەكە سىيلاپ وتىر. «ستەم» اتاۋى سەرگەي, تالعات, ەلۋباي جانە مۇرات دەگەن ەسىمدەردىڭ باسقى ءارىپتەرىنەن الىنىپ, 11 جىلدان بەرى ىنتىماقتاسا ەڭبەك ەتىپ كەلەدى. سەرىكتەستىك جەتەكشىلىگىنە سەرگەي زۆولسكي ءبىراۋىزدان سايلانعان. ۇساق قوجالىقتار بىرىكتىرىلگەن كەزدە «استىق-ستەم»-ءنىڭ يەلىگىنە وتكەن جەر تەلىمى 180 گەكتار عانا بولسا, بۇگىندە 10 مىڭ گەكتارعا جۋىقتاعان. 2008 جىلدان باستاپ اۋىلشارۋاشىلىق تەحنيكالارىن جاپپاي جاڭعىرتۋعا جانە اگروقۇرىلىمدىق سالانى ارتاراپتاندىرۋعا كىرىسىپ, ىرگەلى ءوندىرىس ورنىنا اينالا باستاعان. تىڭ يدەيالار مەن جاڭا تەحنولوگيالىق باستامالار ولاردىڭ ارقايسىسىنا ءتان دەسەك, ارتىق ايتقاندىق ەمەس. وعان شارۋاشىلىقتى ارالاعاندا كوزىمىز انىق جەتتى.
وڭىردە العاشقىلاردىڭ قاتارىندا كوكونىس وسىرۋمەن شۇعىلدانىپ, يزرايلدىك تامشىلاتىپ سۋارۋ ءتاسىلىن مىقتاپ يگەرۋ ارقىلى ونىمدىلىكتى 2 ەسەگە ارتتىرعان. بيىل ونىڭ كولەمى 200 گەكتارعا دەيىن ۇلعايتىلعان. بۇدان تىسقارى 80 گەكتار اۋماقتى سۋارۋ ماقساتىمەن اقش-تان ارنايى قوندىرعى ساتىپ الىنعان. مۇندا سونداي-اق, تابيعي جانە تامشىلاتىپ سۋارۋدىڭ تەحنولوگيالارىن سالىستىرا زەرتتەۋ جۇمىستارى عىلىمي جولعا قويىلعان.
قۋاڭشىلىق جىلداردىڭ وزىندە كارتوپتىڭ گەكتار بەرەكەلىگىن 46, ءسابىزدى 52 توننادان ءتومەندەتىپ كورگەن ەمەسپىز. بيداي مەن ارپادان باسقا مايلى داقىلدار وسىرۋمەن دە اينالىسىپ, تابىس الۋدىڭ ىشكى مۇمكىندىكتەرىن تالماي قاراستىرىپ كەلەمىز. بىلتىر گەرمانيانىڭ كاسىپكەرلەرى زىعىردى جوعارى باعامەن ساتىپ الدى. راپستىڭ ءبىر تونناسى 80 مىڭ, زىعىر 75 مىڭ تەڭگەدەن اينالدى,–دەيدى اڭگىمە بارىسىندا ءىستىڭ كوزىن تاپقان تاجىريبەلى باسشى.
اگروقۇرىلىم ەكى جىل بويى كارتوپتىڭ «گالا» دەپ اتالاتىن سۇرىبىن وتىرعىزۋمەن شۇعىلدانادى ەكەن. ونىڭ تۇقىمى, سونداي-اق, كوكونىستى ساقتاۋ تەحنولوگياسى نەمىستەردىكى كورىنەدى. 68 ميلليون تەڭگە جەڭىلدىكتى نەسيەگە 1,5 مىڭ توننالىق كوكونىس قويماسىن جەرگىلىكتى كليماتقا ورايلاستىرىپ تۇرعىزىپ العان. زاماناۋي توڭازىتقىشتار مەن جەلدەتكىشتەر شەتەلدەن اكەلىنگەن. 20 ميلليون تەڭگەگە ءسابىز جينايتىن كومبايندار ساتىپ الىنعان. قازىر مۇندا 150-گە جۋىق ادام ەڭبەك ەتەدى.
سەرگەي اداموۆيچ ەڭبەكاقى تولەۋ ءتاسىلىن وزگەرتكەن سىڭايلى. باستاپقىدا ەڭبەك ونىمدىلىگىن ارتتىرۋ ءۇشىن اتقارىلعان جۇمىس ساعاتپەن ولشەنگەن. كەڭەستىك قوعام تۇسىنىگىنەن ارىلا قويماعان كەي جۇمىسشىلار از ەڭبەكتەنىپ, مول جالاقى تابۋدى كوبىرەك كۇيتتەگەن. سوسىن ەڭبەكاقى اتقارىلعان جۇمىس اۋقىمىنا قاراي ەسەپتەلەتىن بولعان. ەڭبەك ونىمدىلىگى 70 پايىزعا ارتقاننان كەيىن ساپا ماسەلەسى الدىڭعى ورىنعا شىققان. ناۋقان كەزدەرىندە مەحانيزاتورلاردىڭ تابىسى ءبىر ميلليون تەڭگەدەن اسىپ جىعىلادى. ءبىر پولياك پەن ءۇش قازاق قۇرعان سەرىكتەستىك نارىق ايدىنىندا ەركىن ءجۇزىپ كەلەدى.
گۇلگۇل قۋاتقىزى,
جۋرناليست.
سولتۇستىك قازاقستان وبلىسى,
تايىنشا اۋدانى.