جەتىسۋ جەرىنىڭ استىقتى القابى بولىپ سانالاتىن كۇرەڭبەل وڭىرىندە بيىل دا ايماقتاعى التىن وراق الدىمەن باستالدى. وسىناۋ جاۋاپتى كەزەڭگە الماتى وبلىسى اكىمىنىڭ ورىنباسارى تىنىشباي دوسىمبەكوۆ ارنايى بارىپ, كەربۇلاق اۋدانىنىڭ اكىمى باعدات اليەۆ باستاعان ديحاندارمەن جۇزدەستى.
ەگىن باسىندا مارجانداي تىزىلگەن جەتى كومباين دالانىڭ سارى التىنىن توگىپ-شاشپاي ورۋدا. بەس كۇننىڭ ىشىندە التى ءجۇز گەكتارعا جۋىق استىق ورىلدى. مۇحامەت نۇرەلوۆ توراعالىق ەتەتىن «قاراشوقى» وندىرىستىك كووپەراتيۆىندە اۋداننىڭ الپىس ازاماتى جىل ون ەكى اي جۇمىسپەن قامتاماسىز ەتىلسە, ەگىن ورۋ ناۋقانى بارىسىندا جۇمىسشىلار سانى جۇزگە جۋىقتايدى. نەگىزىنەن بيدايدىڭ «ودەسسكايا-120» تۇقىمىن وندىرۋگە باعىتتالعان كووپەراتيۆتىڭ 8 مىڭ گەكتار اۋدارمالى جەرى بار. بيىل 3,5 مىڭ گەكتار جەرگە ەگىن ەگىلسە, 3 مىڭ گەكتارلىق القاپ تىنىقتىرىلۋدا. اسىل تۇقىمدى بيدايمەن قاتار, 1,5 گەكتارعا ارپا ەگىلدى. كووپەراتيۆ توراعاسى بيىلعى اۋا رايىنىڭ قولايلى بولعاندىعىن ايتىپ, بۇگىنگى تاڭدا ءار گەكتاردان جيىرما تسەنتنەر ءونىم الىپ جاتقاندىعىن جەتكىزدى. جاۋىن-شاشىن بولماسا, ەگىن القابىن تامىزدىڭ ونىنا دەيىن ورىپ الۋ جوسپارلانۋدا.
«جالپى, بيىلعى اۋا رايى اۋىل شارۋاشىلىعى سالاسى ءۇشىن قولايلى بولدى. سوندىقتان الدىڭعى جىلمەن سالىستىرعاندا مول ءونىم الامىز دەگەن سەنىمدەمىز. وبلىس بويىنشا 470 مىڭ گەكتار جەرگە ءداندى داقىل ەگىلدى. جاقىندا عانا بارلىق اۋدانداردىڭ قاتىسۋىمەن ازىقتىق بالانس جاسالدى. بيىل 1,1 ملن. توننا توڭىرەگىندە استىق بولادى دەپ كۇتىپ وتىرمىز. بۇل مەجەگە جەتۋ ءۇشىن قازىرگى كەزدە بارلىق جاعداي بار. اۋدانداردا ەگىن ورۋعا قاتىساتىن تەحنيكا ءجۇز پايىز جوندەۋدەن ءوتىپ, جۇمىس ىستەۋدە. استىق ساقتايتىن قويمالار دەزينفەكتسيالانىپ, تارازىلار دا ساقاداي-ساي. بۇگىنگى كۇنى 40 مىڭ گەكتار جەردىڭ استىعى ورىلدى. بيىلعى ءونىم ورتاشا ەسەپپەن ءار گەكتاردان 23,5 تسەنتنەر بولادى دەگەن بولجام بار. الماتى وبلىسىنىڭ ىشكى سۇرانىسىن قامتاماسىز ەتۋ ءۇشىن 400 مىڭ توننا بيداي جەتكىلىكتى بولعانىمەن, جەرگىلىكتى داقىلدىڭ ەرەكشەلىگىنە بايلانىستى, قوسىمشا ءجۇز مىڭ تونناداي بيداي سولتۇستىكتىڭ قاتتى ءداندى تۇقىمىنان الىنادى», دەدى تىنىشباي دوسىمبەك ۇلى.
نۇربول الدىباەۆ,
«ەگەمەن قازاقستان».
الماتى وبلىسى.