6-8 جەلتوقسان ارالىعىندا الماتىدا برازيليالىق دجيۋ-دجيتسۋ مەن گرەپپلينگتەن «Arlan Grip Championship 2019» دەپ اتالتىن اسا ءىرى حالىقارالىق تۋرنير وتەتىنى بەلگىلى. ايتۋلى جارىستى تاماشالاۋ ءۇشىن اتاقتى كرەيگ دجونس قازاقستانعا ارنايى كەلدى.
بۇل ەسىم جەكپە-جەك الەمىندە كەڭىنەن تانىمال. اۆستراليانىڭ تۋماسى 2017 جىلى فينليانديانىڭ استاناسى – حەلسينكيدە وتكەن ADCC تۋرنيرىندە العاشى رەت بوي كورسەتكەنىنە قاراماستان بىردەن جانكۇيەرلەردىڭ زور قوشەمەتىنە بولەندى. سول جارىستا كرەيگ دجونس الەمنىڭ بەس دۇركىن چەمپيونى دەگەن دارداي اتاعى بار اتى اڭىزعا اينالعان سپورتشى لەوناردو لوۋدى «قىلقىندىرۋ» ادىسىمەن ۇتىپ, بارشا كورەرمەندى تامساندىردى.
سودان كەيىنگى جىلدارى ونىڭ ەسىمى ءباسپاسوز بەتتەرىنەن تۇسكەن جوق. كوپتەگەن جارىستاردا جەڭىس تۇعىرىنا كوتەرىلگەن دجونس 2016 جىلى الماتىدا وتكەن ىرىكتەۋ تۋرنيرىندە توپ جارىپ, الەم چەمپيوناتىنىڭ جولداماسىنا يەلىك ەتتى. اقش-تىڭ لوس-اندجەلەس قالاسىندا تورتكۇل دۇنيەنىڭ تەڭدەسسىزدەرى جينالعان جارىستى جاسىل قۇرلىقتىڭ وكىلى كۇمىس مەدالمەن قورىتىندىلادى.
سول كەزدە اۆستراليانىڭ وكىلىنە قازاقستان كەرەمەت ۇناعان ەكەن. سول سەبەپتى دە بيىل ول الاتاۋ باۋرايىنا قايتا كەلىپ, «Arlan Grip Championship 2019» دوداسىن تاماشالاۋعا نيەت ءبىلدىرىپتى.
ەستەرىڭىزگە سالا كەتەيىك, «رۋحاني جاڭعىرۋ» باعدارلاماسى اياسىندا الماتى قالاسى اكىمدىگىنىڭ قولداۋىمەن ۇيىمداستىرىلىپ وتىرعان ايتۋلى تۋرنير ءۇش كۇنگە سوزىلىپ, وسى باسەكەلەردە الىس جانە جاقىن شەت مەملەكەتتەردەن كەلگەن 1300-دەپ اسا شەبەرلەردىڭ كۇش سىناسادى.
الماتى