جۋىردا قازاق ۇلتتىق قىزدار پەداگوگيكالىق ۋنيۆەرسيتەتىنىڭ جانىنداعى الەۋمەتتىك جانە گەندەرلىك عىلىمي-زەرتتەۋلەر ينستيتۋتى «مىڭ كەلبەتتى جاستىق شاق: الماتى قالاسىنىڭ جوعارى وقۋ ورىندارى ستۋدەنتتەرىنىڭ الەۋمەتتىك-پسيحولوگيالىق پورترەتى» اتتى زەرتتەۋ جۇرگىزدى.
وسىلايشا الماتىداعى ستۋدەنت قىزداردىڭ كاسىپتىك داعدىلارىن زەرتتەۋ ارقىلى ولاردىڭ ومىرلىك قۇندىلىقتارى مەن ۇستانىمدارىن انىقتاۋدىڭ وزىندىك جوباسى اتقارىلدى. سونىمەن قاتار زەرتتەۋ بارىسىندا جوعارعى وقۋ ورىندارىنىڭ وقۋ-تاربيەلىك كورسەتكىشتەرىنە دە تالداۋ جۇرگىزىلدى.
ينستيتۋت ماماندارىنىڭ ايتۋىنشا, ساۋالداما ءال-فارابي اتىنداعى قازاق ۇلتتىق ۋنيۆەرسيتەتى, قازاق ۇلتتىق قىزدار پەداگوگيكالىق ۋنيۆەرسيتەتى, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى, ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى, الماتى مەنەدجمەنت ۋنيۆەرسيتەتى, شەت تىلدەرى جانە ىسكەرلىك مانساپ ۋنيۆەرسيتەتى, سۇلەيمەن دەميرەل ۋنيۆەرسيتەتى مەن م.تىنىشپاەۆ اتىنداعى قازاق كولىك جانە كوممۋنيكاتسيا اكادەمياسىن قامتىعان.
الەۋمەتتىك زەرتتەۋ بارىسىندا ستۋدەنتتەردىڭ جوعارى وقۋ ورنىن تاڭداۋىنا, كاسىپتىك باعدارعا كوزقاراسىنا, بيۋدجەت كوزدەرىنە, ساياسي باعدارلاۋعا, بوس ۋاقىتتى وتكىزۋگە, الەۋمەتتىك سايكەستىلىككە, نەكەگە تۇرۋعا, رەپرودۋكتيۆتىك جانە گەندەرلىك باعدارلاماعا قاتىستى سۇراقتار قويىلدى.
– بۇگىندە جاستار پسيحولوگياسىنىڭ تۇراقسىزدىعىنان, قوعامدا ءوز ورنىن تابا الماۋىنان, ءبىلىم جانە ءدىني ساۋاتىنىڭ تومەندىگىنەن, ەڭبەك نارىعىندا شەتتەتىلۋىنەن جانە بوس ۋاقىتىنىڭ كوپتىگىنەن ولقىلىقتى جايتتارعا تاپ بولادى. زەرتتەۋ بارىسىندا جاستاردىڭ, سونىڭ ىشىندە قىزداردىڭ مادەني, رۋحاني ومىرىنە جەتە ءمان بەرىلىپ, تولىققاندى تۇلعا تاربيەلەۋ جانە ولاردىڭ ءوز ىستەرىن اشۋ باعىتىندا قانداي جۇمىستار اتقارىلۋى تيىستىگى ەكشەلدى, – دەيدى الەۋمەتتىك جانە گەندەرلىك عىلىمي-زەرتتەۋلەر ينستيتۋتىنىڭ ماماندارى.
رەسپوندەنتتەر «بۇل ماماندىقتى نە ءۇشىن تاڭدادىڭىز؟», ء«ۇش تىلدىلىك يدەياسىنا قالاي قارايسىز؟ اعىلشىن ءتىلىن وقىتۋدىڭ ساپاسى قاناعاتتاندىرا ما؟ اعىلشىن ءتىلىن مەڭگەرۋدە قانداي قيىندىقتارعا كەز بولدىڭىز؟», «ۋنيۆەرسيتەت ديپلومى قىزدارعا ما, الدە ۇلدارعا ماڭىزدىراق پا؟», ۋنيۆەرسيتەت ديپلومىن العاننان كەيىن ەر ادامدارعا جۇمىسقا تۇرۋ قىزدارعا قاراعاندا جەڭىلدەۋ مە؟ الدە ەكەۋىنە دە تەڭ دارەجەدە مە؟», «الەۋمەتتىك بەلسەندىلىك بىزگە نە بەرەدى؟ ول نە ءۇشىن قاجەت؟», ء«بىلىم الۋ اتا-انانىڭ قاراجاتىنا بايلانىستى ما نەمەسە مۇمكىندىك بولسا باسقا وقۋ ورنىن تاڭدايتىن با ەدىڭىز؟» سىندى ساۋالدار توڭىرەگىندە ءوز ويلارىمەن ءبولىستى.
«شەتەل ازاماتىنا تۇرمىسقا شىعۋ. بۇل دۇرىس پا؟» دەگەن سۇراققا بايلانىستى بويجەتكەندەردىڭ باسىم بولىگى مۇنى قۇپتامايتىنىن ايتتى. نازىكجاندىلاردىڭ پايىمداۋىنشا, قىزدار شەتەلدىك ازاماتقا الەۋمەتتىك جاعدايىن تۇزەتۋ ءۇشىن جار بولادى. ال ساۋالداماعا قاتىسۋشىلاردىڭ ءبىر توبى وتباسىلىق باقىت ۇلتقا نەمەسە دىنگە بايلانىستى ەمەس دەگەن پىكىردە.
– ساۋالداماعا مىڭعا جۋىق بويجەتكەن قاتىستى. ونى جۇرگىزۋ ءۇشىن قىزدار ۋنيۆەرسيتەتىندە ارنايى 9 فوكۋس توپ ۇيىمداستىرىلدى. وسى تاقىلەتتەس ساۋالداما الداعى ۋاقىتتا جوعارى وقۋ ورىندارىنىڭ پروفەسسور-وقىتۋشىلارى مەن قىزمەتكەرلەرىنىڭ اراسىندا جۇرگىزىلەدى, – دەيدى جوبا اۆتورلارى.