جاسىراتىن نەسى بار, بۇل كۇندە ەكۇ ارقىلى ءسابي ءسۇيۋ قالىپتى جاعدايعا اينالسا دا, «قۇتىدان شىققان» بالا كادىمگى بالاداي دەنى ساۋ, اقىل-ەسى ءبۇتىن بولا ما دەگەن ساۋال ولاردىڭ اتا-انالارىن دا, مامانداردى دا از الاڭداتپاعانى انىق.
وسىعان قاراماستان الەمدە بۇگىنگە دەيىن ەكۇ ارقىلى 6,5 ميلليوننان استام ادام دۇنيەگە كەلدى. 42 جىل بۇرىن ءساتتى جۇزەگە اسىرىلعان ەكۇ ءادىسى قازىرگى تاڭدا ۇيرەنشىكتى جاعدايعا اينالىپ قانا قويماي, مىندەتتى الەۋمەتتىك مەديتسينالىق ساقتاندىرۋ باعدارلاماسىنا دا ەنگىزىلدى. بىراق ءالى دە بولسا ەكۇ تەحنولوگياسىنىڭ اينالاسىندا قاۋەسەت پەن داقپىرت كەزىپ ءجۇر.
سونىمەن بيىل قازان ايىنىڭ قاق ورتاسىندا ەلىمىزدە ەكستراكورپورالدى ۇرىقتاندىرۋ ارقىلى وسىدان 22 جىل بۇرىن دۇنيەگە كەلگەن قازاقستاندىق قىز انا اتانىپ, دۇنيەگە ءوزى تابيعي جولمەن پەرزەنت اكەلدى. وسىلايشا ەكۇ ارقىلى دۇنيەگە كەلگەن ادامدار دا اتا-انا بولا الاتىنى كەزەكتى رەت دالەلدەنىپ, كۇدىك پەن قورقىنىش سەيىلە ءتۇستى.
دارىگەرلەر ايەلدىڭ تابيعي جولمەن بوسانعانىن, نارەستە ۋاقتىلى جانە دەنى ساۋ بولىپ دۇنيەگە كەلگەنىن قۋانا حابارلادى. ءسابيدىڭ سالماعى دا قالىپتى – 3,200 گرامم.
دەگەنمەن, وسى ارادا وقىرماندى اداستىرماۋ ءۇشىن ايتا كەتكەن ءجون. باستاپقىدا كەيبىر باق وكىلدەرى «قازاقستاندا وسىدان 24 جىل بۇرىن ەكۇ ارقىلى دۇنيەگە كەلگەن العاشقى قىز انا اتاندى» دەپ اقپارات تاراتقان بولاتىن. مۇنىڭ انىق-قانىعى تومەندەگىدەي.
– ەكۇ كومەگىمەن تۋعان بالالاردىڭ وزدەرى تابيعي جولمەن بالالى بولا الا ما دەگەن سۇراق تالايلاردى مازالايدى. قازاقستاندا ەكۇ-دان تۋعان ءبىرىنشى قىز بالا 1996 جىلى ءبىزدىڭ ارىپتەستەرىمىزدىڭ كومەگى ارقىلى دۇنيەگە كەلگەن. بىراق ول ءالى تۇرمىسقا شىققان جوق. 1997 جىلى ءبىزدىڭ ورتالىقتا الەسيا شين تۋىلدى. مىنە, سول قىز تابيعي جولمەن ءبىزدىڭ ورتالىقتىڭ 22 جىلدىق تاريحىندا العاشقى انا بولىپ وتىر, – دەيدى جوعارى ساناتتاعى دارىگەر-رەپرودۋكتولوگ, رەپرودۋكتيۆتىك مەديتسينا ورتالىعىنىڭ مەديتسينالىق ديرەكتورىنىڭ ورىنباسارى ليۋدميلا بادەلباەۆا.
ليۋدميلا بادەلباەۆا 1996 جىلى ۇزاق ۋاقىت بويى بەدەۋلىكپەن الىسىپ, انا بولۋدان كۇدەرىن ۇزە باستاعان پاتسيەنتىنە ەكۇ باعدارلاماسىن جۇرگىزەدى. ءبىرىنشى ۇرىقتاندىرۋ ءساتسىز اياقتالعانىنا قاراماستان, كەلەسى ايدا بىردەن وعان ەكىنشى مۇمكىندىك بەرىلىپ, جۇكتىلىككە قول جەتكىزىلگەن.
ورايى كەلىپ تۇرعاندا ايتۋ پارىز. 1995 جىلى 18 ساۋىردە ەلىمىزدىڭ تانىمال ەمبريولوگ-رەپرودۋكتولوگى بەدەۋلىكتى ەمدەۋ بويىنشا ەمحاناسىن قۇرعانى ايان. شىندىعىندا, ەلىمىزدەگى ەڭ العاشقى ەكۇ ارقىلى جارىق دۇنيە ەسىگىن اشقان قىز الەسيا شيننەن ءبىر جىل بۇرىن كىشكەنتاي عانا وسى لابوراتوريادا قۇرساققا بىتەدى. ال بۇل بالانىڭ «اۆتورى» – سالتانات بايقوشقاروۆا. بۇل جۇرتتىڭ بارىنە ءمالىم وقيعا. ونىڭ ارحيۆتىك بەينەجازبالارى مەن فوتوماتەريالدارى, سول كەزدە ەلدى ەلەڭ ەتكىزگەن جاڭالىق جاريالانعان گازەت-جۋرنالداردى مۇراعاتتاردان وڭاي تابۋعا بولادى. قازاقستانداعى العاشقى «قۇتىدان شىققان» قىزدىڭ جاسى بۇگىندە 23-تە. ۇلىبريتانيادا جوعارى ءبىلىم الىپ جۇرگەن جايى بار. دەنى ساۋ. ازىرگە تۇرمىسقا شىقپاعاندىقتان, بالالى بولۋدى دا جوسپارلاي قويماعان.