Egemen Qazaqstan گازەتىنىڭ 100 جىلدىق مەرەيتويى ورىنبوردا تويلاندى. بۇل تۋرالى رەسەيلىك nvdaily.ru سايتى جازدى.
«جاقىندا عانا قازاق دەلەگاتسياسى ورىنبورداعى لەنين كوشەسىندە ورنالاسقان تاريحي عيماراتقا كەلدى. مۇندا گازەتتىڭ ەڭ العاشقى سانى جارىق كورگەن. مەرەيتوي اياسىندا عيماراتقا ەسكەرتكىش تاقتا ورناتۋ جوسپارلانعان», دەلىنگەن جازبادا.
سونداي-اق nvdaily.ru ورىنبور مەن قازاقستان اراسىندا تاريحي بايلانىس بارىن جازادى.
«ن.كرۋپسكايا اتىنداعى ورىنبور وبلىستىق امبەباپ كىتاپحاناسىندا گازەتتىڭ مەرەيتويىنا وراي دوڭگەلەك ۇستەل وتىرىسى ءوتتى. 1919 جىلى گازەت العاش رەت «ۇشقىن» اتىمەن شىقتى. تاريحي باسىلىم ءار جىلدارى ءتۇرلى اتپەن جارىق كوردى. سونىڭ ىشىندە «سوتسياليستىك قازاقستان» اتىمەن باسىلىم جارتى عاسىرعا جۋىق جاريالاندى. گازەت اتاۋى بىرنەشە رەت وزگەرسە دە ول قازاق تىلىندەگى ەڭ بەدەلدى باسىلىم بولىپ قالا بەردى», دەپ جازدى nvdaily.ru.
جيىندا قازاقستاننىڭ رەسەيدەگى ەلشىلىگىنىڭ كەڭەسشى-ۋاكىلى جانار كولباچاەۆا قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆتىڭ قۇتتىقتاۋ حاتىن وقىدى. ەلشى قۇتتىقتاۋىندا باس باسىلىم قاي زاماندا دا «حالىقتىڭ كوزى, قۇلاعى ءھام ءتىلى» بولعانىن ايتادى. رەداكتسيادا بەرنياز كۇلەەۆ, سماعۇل سادۋاقاسوۆ, جۇسىپبەك ايماۋىتوۆ, مۇحتار اۋەزوۆ, بەيىمبەت مايلين, ساكەن سەيفۋللين, تۇرار رىسقۇلوۆ, وراز جاندوسوۆ, عابيت مۇسىرەپوۆ, شەرحان مۇرتازا, ءابىش كەكىلباەۆ سىندى بەلگىلى تۇلعالار ەڭبەك ەتكەن. ولار ءوز زامانىنىڭ كوشباسشىسىنا اينالعان باسىلىمنىڭ دامۋىنا ايرىقشا ۇلەس قوسىپ, قايتالانباس يميدج قالىپتاستىردى. بۇل تۇلعالاردىڭ ەسىمى تەك قازاق وقىرمانىنا عانا ەمەس, سونداي-اق رەسەيلىك وقىرماندارعا دا جاقسى تانىس.
سونداي-اق گازەتتىڭ مەرەيتويىمەن ورىنبور وبلىستىق مادەنيەت جانە ىشكى بايلانىس ءمينيسترىنىڭ ورىنباسارى الەكساندر كالينين قۇتتىقتادى. ول ءوز سوزىندە رەسەي مەن قازاقستان اراسىنداعى ساياسي-ەكونوميكالىق بايلانىستىڭ ورىنبوردان باستاۋ العانىن ءسوز ەتتى.
جيىن سوڭىندا Egemen Qazaqstan گازەتى مەن ورىنبور قازاقتارى قاۋىمداستىعى اراسىندا ىنتىماقتاستىق جونىندەگى مەموراندۋمعا قول قويىلدى.