شاعىن قۇرامداعى كەزدەسۋ قورىتىندىسى بويىنشا ءتورت ەلدىڭ باسشىلارى نۇرسۇلتان نازارباەۆقا ورتالىق ازيا مەملەكەتتەرى باسشىلارىنىڭ كونسۋلتاتيۆتىك جينالىسىنىڭ قۇرمەتتى توراعاسى مارتەبەسىن بەرۋ تۋرالى شەشىم قابىلدادى. بۇل تۋرالى تۇڭعىش پرەزيدەنتتىڭ ءباسپاسوز قىزمەتى حابارلادى.
شاعىن قۇرامداعى كەزدەسۋدەن كەيىن دەلەگاتسيا باسشىلارى كەڭەيتىلگەن فورماتتا كەزدەسۋ وتكىزدى.
كونسۋلتاتيۆتىك كەزدەسۋدە سويلەگەن سوزىندە قازاقستاننىڭ تۇڭعىش پرەزيدەنتى جوعارى دەڭگەيدەگى شاراعا قاتىسۋعا شاقىرعانى ءۇشىن شاۆكات ميرزيوەۆكە ريزاشىلىعىن ءبىلدىردى.
نۇرسۇلتان نازارباەۆ وتكەن جىلى قازاقستاننىڭ استاناسىندا باستاۋ العان ديالوگ ورتالىق ازيا تاريحىنىڭ جاڭا پاراعىن اشقانىن اتاپ ءوتتى.
– ول ىنتىماقتاستىعىمىزدى تۇبەگەيلى جاقسارتتى. ديالوگ ءبىزدىڭ ەلدەرىمىز ءۇشىن دوستىعىمىزدىڭ عاسىرلار بويى ءومىر سۇرەتىندىگىن اڭداتتى. بارلىق دەڭگەيدەگى بايلانىستاردى كۇشەيتۋ باستالدى, – دەدى ەلباسى.
نۇرسۇلتان نازارباەۆ سونداي-اق ورتالىق ازيا ەلدەرى اراسىنداعى ىنتىماقتاستىقتىڭ دامۋ تاريحى تۋرالى ايتتى.
كەزدەسۋگە قاتىسۋشى مەملەكەتتەردىڭ الەۋەتىن بىرىكتىرە وتىرىپ, بارلىق ەلدەردىڭ ءال-اۋقاتىن ارتتىرۋ ماقساتىمەن قازاقستاننىڭ تۇڭعىش پرەزيدەنتى ء«ححى عاسىردا ورتالىق ازيانى دامىتۋ ماقساتىنداعى تاتۋ كورشىلىك جانە ىنتىماقتاستىق تۋرالى كەلىسىم» جاساسۋدى ۇسىندى.
– بۇل ساياسي قۇجات ءبىزدىڭ ءوزارا ءىس-قيمىلىمىزدىڭ نەگىزگى پرينتسيپتەرى مەن ماقساتتارىن كورسەتۋى كەرەك. كەلىسىمگە ەلدەرىمىزدىڭ ەگەمەندىگى, تاۋەلسىزدىگى مەن اۋماقتىق تۇتاستىعىن ءوزارا قۇرمەتتەۋ تۋرالى ەرەجەلەر ەنەدى, – دەدى نۇرسۇلتان نازارباەۆ.
سونىمەن قاتار, ەلباسى وڭىردەگى قاۋىپسىزدىكتى نىعايتۋ ءۇشىن كەلەسى جىلى ورتالىق ازيا ەلدەرىنىڭ قاۋىپسىزدىك كەڭەسى حاتشىلارىنىڭ كەزدەسۋىن وتكىزۋدى ۇسىندى.
سونىمەن بىرگە, قازاقستاننىڭ تۇڭعىش پرەزيدەنتى قاتىسۋشى ەلدەردىڭ ۇكىمەتتەرىن دەموگرافيالىق دامۋدىڭ جوعارى قارقىنىنا بايلانىستى تۋىنداعان پروبلەمالارعا نازار اۋدارۋعا شاقىردى.
– تاۋارلاردىڭ, قىزمەتتەردىڭ جانە كاپيتالدىڭ قوزعالىسىنا توسقاۋىل بولاتىن كەدەرگىلەردى الىپ تاستاۋ ارقىلى «كەدەرگىسىز ورتالىق ازيانى» قالىپتاستىرۋ كەرەك, – دەدى نۇرسۇلتان نازارباەۆ.
سونداي-اق, ەلباسى بارلىق مەملەكەت باسشىلارىنا 15 ناۋرىزدا جاڭا مەرەكە – ورتالىق ازيا كۇنىن اتاپ وتۋگە شاقىردى.
مادەني-گۋمانيتارلىق سالاداعى ىنتىماقتاستىقتى نىعايتۋعا ەرەكشە نازار اۋدارىلدى. وسى باعىتتا نۇرسۇلتان نازارباەۆ قازاقستاننىڭ ەڭ ۇزدىك جوعارى وقۋ ورىندارىندا ءار ەلدىڭ ستۋدەنتتەرىنە 10 گرانتتان ءبولۋدى ۇسىندى.
– تۇركى الەمىنىڭ بەسىگى – تۇركىستان قالاسى قازىر قايتا وركەندەۋدى باستان كەشىرۋدە. دەسە دە, ول ءوزىنىڭ مادەني, تاريحي جانە رۋحاني وزەگىن ساقتايتىنى ءسوزسىز. ءوز كەزەگىندە قالا بارشامىزدىڭ ورتاق ماقتانىشىمىزعا اينالاتىن كەرەمەت مەگاپوليكە اينالماق. وسىعان وراي, ورتالىق ازيانىڭ باۋىرلاس مەملەكەتتەرىنىڭ باسشىلارىن كەلەسى كۇزدە وسى كونە قالاعا شاقىرامىن, – دەدى قازاقستاننىڭ تۇڭعىش پرەزيدەنتى.
ءسوز سوڭىندا ەلباسى ورتالىق ازيا ەلدەرىنىڭ مۇرالارى اياسىن كەڭەيتۋ جانە تەرەڭدەتۋ قاجەتتىگىنە توقتالدى.