قاراعاندى وبلىسىنداعى شاحتينسك قالاسىندا قازاقستان رەسپۋبليكاسىنىڭ تۇڭعىش پرەزيدەنتى كۇنى قارساڭىندا «ىڭكارىم» مەكتەپكە دەيىنگى اكادەميا» اتتى جاڭا بالاباقشا اشىلدى.
الەۋمەتتىك نىساننىڭ سالتاناتتى اشىلۋ راسىمىنە قاراعاندى وبلىسى اكىمىنىڭ ورىنباسارى ابزال نۇكەنوۆ, سەنات دەپۋتاتى سەرگەي ەرشوۆ جانە باسقا دا مارتەبەلى مەيماندار قاتىسىپ, بالالار مەن ولاردىڭ اتا-انالارىن قۇتتىقتادى. بالاباقشا تاربيەشىلەرىنە سىي-سياپات جاسادى.
مەملەكەتتىك-جەكەمەنشىك ارىپتەستىك نەگىزىندە سالىنعان بالاباقشا ءبىر جاس پەن التى جاس ارالىعىنداعى 270 بالاعا دەيىن قابىلداي الادى. مۇندا بالاقايلار قازاق, ورىس جانە اعىلشىن تىلدەرىن وقىپ, حورەوگرافيا, تەاتر شەبەرلىگى, كەسكىندەمە, ءان ايتۋ سياقتى ونەر تۇرلەرىنىڭ ءالىپبيىن ۇيرەنەدى.
مەكەمەنىڭ ءىشى جيھازبەن جابدىقتالعان. اۋلاسىندا زاماناۋي ويىن الاڭى بار. سونداي-اق بارلىق قاجەتتى قۇرالدارى بار مۋزىكالىق جانە سپورت زالدارى جۇمىس ىستەيدى.
جوبانى ىسكە اسىرۋشى فارحات مادەنوۆتىڭ ايتۋىنشا, از قامتاماسىز ەتىلگەن, كوپبالالى وتباسىلارىنىڭ جانە ورالمانداردىڭ بالالارى بالاباقشاعا تەگىن بارا الادى, ال قالعان ساناتتاعى بۇلدىرشىندەر ءۇشىن تومەنگى تولەم جۇيەسى قاراستىرىلعان.
قاراعاندى وبلىسى