س.مۇقانوۆ اتىنداعى قىزىلجار قازاق سازدى-دراما تەاترى تاۋەلسىزدىك جىلدارىندا بوي كوتەرىپ, قالىپتاسقان ۇجىم. ول قازىر وبلىستىق قانا ەمەس, رەسپۋبليكالىق, حالىقارالىق ساحنالاردا ونەر كورسەتىپ, ۇزدىك ناتيجەلەرگە قول جەتكىزىپ ءجۇر.
ماسەلەن, 2018 جىلى رەجيسسەر فارحات مولداعالي مادەنيەت جانە ونەر سالاسىنداعى جوعارعى جەتىستىكتەرى ءۇشىن «قازاقستان رەسپۋبليكاسى تۇڭعىش پرەزيدەنتى – ەلباسى قورى» سىيلىعىنىڭ لاۋرەاتى اتاندى. حالىقارالىق تەاتر كۇنىنە وراي «قازاقستان تەاترلار اسسوتسياتسياسى» ۇيىمداستىرعان «ساحناگەر-2018» ۇلتتىق تەاتر سىيلىعى بويىنشا ء«ۇمىت» نوميناتسياسىن جاس اكتەر ايبول قاسىم جەڭىپ الدى. تەاتر ۇجىمى تۇركيانىڭ كاستامونۋ جانە انكارا قالالارىندا قازاقتىڭ كورنەكتى اقىنى ماعجان جۇماباەۆتىڭ 125 جىلدىق مەرەيتويىنا ارنالعان سالتاناتتى جيىندا ونەر كورسەتىپ قايتتى. VI حالىقارالىق «سامعاۋ» تەاتر فەستيۆالىندە «ۇزدىك رەجيسسۋرا» نوميناتسياسىن جەڭىپ الىپ, اراعا اپتا سالماي II دۇنيەجۇزىلىك «استانا» تەاتر فەستيۆالىندە دە ونەر كورسەتىپ, الەمدىك تەاتر قايراتكەرلەرى مەن تەاتر سىنشىلارىنىڭ جوعارعى باعاسىن الدى. سونداي-اق V حالىقارالىق ورىنداۋشىلىق ونەر فەستيۆالىندە «86» (soundrama) سپەكتاكلىمەن ونەر كورسەتتى. ءدال وسى سپەكتاكلمەن رۋمىنيانىڭ بۋحارەست قالاسىندا وتكەن «Fest in pe Bulevard» حالىقارالىق فەستيۆالىنە قاتىستى...
ال بيىل رۇستەم ەسداۋلەتوۆ اتىنداعى ءىى رەسپۋبليكالىق تەاتر فەستيۆالىنە «شولپاننىڭ كۇناسى» سپەكتاكلىمەن قاتىسىپ, «ۇزدىك سپەكتاكل» گران-پري جۇلدەسىن جانە 1 ملن تەڭگەلىك سەرتيفيكاتتى جەڭىپ الدى.
ارنايى شاقىرتۋمەن قىرعىزستاننىڭ وش قالاسىندا «ART-ORDO» VII حالىقارالىق تەاتر فەستيۆالىنە م.اۋەزوۆتىڭ «قاراگوز» soundrama جانرىنداعى سپەكتاكلىمەن قاتىسىپ, ءىى ورىن الدى, ال قاراگوز ءرولىن سومداعان تەاتردىڭ دارىندى جاس اكتريساسى م.وسەرباەۆا «ەڭ ۇزدىك ايەل ءرولى» نوميناتسياسىن قانجىعاسىنا بايلادى.
الايدا ونەر ۇجىمىنىڭ وزىندىك پروبلەمالارى دا كوپ ەكەن. ءبىز تەاتردىڭ ۇزدىك رەجيسسەرلارىنىڭ ءبىرى بولات شامبەتوۆپەن كەزدەسكەندە ول پرەزيدەنت ق.توقاەۆتىڭ جولداۋىندا ايتىلعان مادەنيەت قىزمەتكەرلەرىنىڭ جالاقىسىن كوتەرۋ تۋرالى تاپسىرماسىنا ىرزالىعىن بىلدىرە وتىرىپ, بىراق ونى مادەنيەت جانە سپورت مينيسترلىگىنىڭ الا-قۇلا جاسايتىندىعىنا قىنجىلىس ءبىلدىردى.
- بىزدە جاس اكتەرلەر تۇراقتاي المايدى. ونىڭ نەگىزگى سەبەبى - جالاقىنىڭ تومەندىگى. وقۋ ءبىتىرىپ كەلگەن جاستار پاتەرلەردە وزدەرى قاراجات تولەپ تۇرادى. الاتىن ەڭبەكاقىسى ماردىمسىز, ونىڭ دا نەگىزگى بولىگىن پاتەراقىعا تولەۋگە ءماجبۇر. سوسىن كەتپەگەندە قايتسىن؟ قانشاما تەر توگىپ, دايىنداعان سپەكتاكلدەرىمىز اكتەرلەرىمىز كەتىپ قالعان سوڭ ساحناعا شىعا الماي قالادى. ايماقتاعى تەاتر اكتەرلەرىنىڭ ەڭبەكاقىسى 35 پايىزعا كوبەيتىلەدى ەكەن. سونى ءبولىپ-جارماي, رەسپۋبليكالىقتارمەن بىردەي 50 پايىزعا كوتەرۋگە بولاتىن ەدى عوي. «جاقسىلىق قىلساڭ – ءبۇتىن قىل» دەگەن ەمەس پە؟ ءبىزدىڭ الاتىنىمىز ءجاي دا 70-80 مىڭنان اسپايتىن. ەڭ سوراقىسى, تەحنيكالىق قىزمەتكەرلەردىڭ ەڭبەكاقىسىن كوتەرمەۋ بولىپ وتىر. ولاردىڭ اسقازاندارى دا توقتىقتى تالاپ ەتپەي مە, الدە وتباسىلىق شىعىندارى تومەندەپ جاتىر ما؟ بۇل نە دەگەن ادىلەتسىزدىك؟! ەشقايسىنىڭ دا جارىتىپ اقشا كورگەنى شامالى ەدى عوي. مىسالى, بىزدە كوستيۋمەر دەگەن قىزمەت بار. ونىڭ مىندەتى تەاترداعى بارلىق 23 اكتەردىڭ كوستيۋمىن دايىن ەتىپ تۇرۋ. شتاتتىق كەستە بويىنشا كومەكشىسى دە بولۋى كەرەك ەدى, بىراق ونىڭ ماردىمسىز جالاقىسىنا ەشكىم دە كەلمەدى. مىنە, وسىنداي قىزمەتكەرلەردىڭ دە ەڭبەگى ەلەنبەي وتىرعانىنا قىنجىلاسىڭ.
مىنە, سولاي, پرەزيدەنتىمىز قۋانتسا, ءمينيسترىمىز مۇڭايتتى... الايدا وسىنى مينيسترلىك ەسكەرىپ, ادىلەتتى شەشىم شىعارار دەگەن ءۇمىتىمىز سونگەن جوق, - دەيدى رەجيسسەر بولات شامبەتوۆ.
قىزىلجار