ەلىمىزدىڭ قاي تۇكپىرىندە بولسىن, سول ءوڭىردىڭ الەۋمەتتىك-ەكونوميكالىق تۇرعىدان العا قاراي دامۋىنا سەپتىگىن تيگىزە الاتىن قارجىلىق كۇش-قۋاتى مول كومپانيالار مەن كورپوراتسيالار بار. ماسەلەن, باتىس قازاقستان وبلىسىندا مۇنداي كاسىپورىندار ساپىندا اليانس كپو ب.v بار دەسەك, اتىراۋدا «شەۆرون», ال اقتوبەدە «سنپس» كورپوراتسياسىن ايتۋعا بولادى.
«سنپس-اقتوبەمۇنايگاز» اق – اقتوبە وبلىسى اۋماعىنداعى ەڭ ءىرى كاسىپورىننىڭ ءبىرى. ونىڭ ۇلەسىنە وڭىردە وندىرىلەتىن مۇناي مەن كومىرسۋتەگى شيكىزاتىنىڭ 70 جانە سۇيىق وتىن مەن گازدىڭ 90 پايىزى تيەسىلى. كورپوراتسيا مەن قۇرىلىمدىق بولىمشەلەرىندە 6 200-دەن استام قىزمەتكەر جۇمىس ىستەيدى. سوڭعى بەس جىل ىشىندە اتالعان اكتسيونەرلىك قوعامنان 500 ميلليارد تەڭگە كولەمىندە ينۆەستيتسيا تارتىلدى. ايتسە دە كەيىنگى كەزدە اتالعان وندىرىستىك ۇجىم بۇرىنعى جۇردەك جۇرىسىنەن جاڭىلىپ قالعانداي.
ستراتەگيالىق ماڭىزى بار شيكىزات ونىمدەرىن وندىرەتىن ءىرى كاسىپورىننىڭ ماسەلەلەرى اۋقىمدى بولۋى تابيعي جايت. ينۆەستيتسيا تارتۋ اۋقىمى, ەڭبەك ونىمدىلىگى قارقىنى دا تومەندەپ كەتۋ كورىنىستەرى بايقالىپ وتىر. بۇل جايت ءوز كەزەگىندە مورالدىق تۇرعىدان ەسكىرە باستاعان قۇرال-جابدىقتاردى تەحنولوگيالىق تۇرعىدان قايتا جاڭعىرتۋ قاجەتتىلىگىن كورسەتەدى.
سونىمەن بىرگە «سنپس-اقتوبەمۇنايگاز» ەڭبەكتى ۇيىمداستىرۋ مەن جۇمىسشىلاردىڭ ەڭبەكتەرىنە لايىقتى ەڭبەكاقى تولەي الماي ءجۇر. ايتالىق, اقتوبە وبلىسى اكىمىنىڭ ورىنباسارى قايرات بەكەنوۆتىڭ مالىمدەۋىنە قاراعاندا, قازىرگى كەزدە كورپوراتسيا قوجايىندارىنىڭ ءوز جۇمىسشىلارىنا تولەپ جۇرگەن ورتاشا ەڭبەكاقىسىنىڭ مولشەرى تۇتاستاي رەسپۋبليكا بويىنشا مۇناي سالاسى قىزمەتكەرلەرىنىڭ ورتاشا جالاقىسىمەن سالىستىرعاندا ءۇش-ءتورت ەسەگە از ەكەن.
«سنپس» كورپوراتسياسى ديرەكتورلار كەڭەسىنىڭ توراعاسى ۆان يلين اقتوبە وبلىسىنىڭ اكىمى وڭداسىن ورازالينمەن كەزدەسۋى كەزىندە اتالعان جاعدايدى كاسىپورىندا ورىن الىپ وتىرعان ۋاقىتشا كىدىرىستەر مەن كەدەرگىلەرگە بايلانىستى ەكەنىمەن ءتۇسىندىردى. ونىڭ ايتۋىنشا, جۇمىسشىلارعا تولىمدى ەڭبەكاقى تولەۋ ماسەلەسى الداعى كەزدە تولىعىمەن شەشىمىن تاپپاق.
تاعى ءبىر اتاپ وتەرلىك جايت, بۇعان دەيىن جاسالعان ءوزارا كەلىسىمدەرگە سايكەس شەتەلدىك كومپانيا قىزمەتكە جەرگىلىكتى ماماندار مەن جۇمىسشىلاردى ۇدايى تارتىپ وتىرۋعا ءتيىس. ايتسە دە اتالعان كەلىسىم تالاپتارى مەن نورمالارى ورىندالماي كەلەدى. ەسەسىنە سوڭعى جيىرما جىلدىڭ ىشىندە كومپانيا باسشىلارى شەتەلدىك جۇمىسشىلاردى ۇدايى تارتۋ ءۇردىسىن جالعاستىرىپ كەلگەن. سونداي-اق وسى ارالىقتا كاسىپورىن جانىنان قازاقستاندىق مامانداردى وقىتۋ مەن جاڭا كاسىپكە بەيىمدەۋ ىسىندە فورمالدىلىققا ءارى بىرقاتار ۇستىرتتىكتەر مەن ولقىلىقتارعا جول بەرىلگەن. ونىڭ ساپالىق دەڭگەيى وتە تومەن بولعان.
بۇل ارادا باستى اڭگىمە ينجەنەر-تەحنيك كادرلارعا بايلانىستى ەمەس, III جانە IV ساناتتاعى قاراپايىم جۇمىسشىلارعا قاتىستى ورىستەپ وتىرعانىن ايتقانىمىز ءجون. شەتەلدىك كومپانيا باسشىلارى تاراپىنان مۇنداي جاعداي قايتالانا بەرسە, ونىڭ سوڭى جۇمىسشىلار نارازىلىعىن تۋدىرۋى دا مۇمكىن.
اقتوبە