د. نازارباەۆا تاتارستان رەسپۋبليكاسى مەملەكەتتىك كەڭەسىنىڭ توراعاسىمەن كەزدەستى

داريعا نازارباەۆا رەسەي فەدەراتسياسىنىڭ جەتەكشى ءارى ەكونوميكالىق دامىعان سۋبەكتىلەرىنىڭ ءبىرى بولىپ تابىلاتىن تاتارستانمەن قارقىندى جانە كوپجاقتى ىنتىماقتاستىقتى دامىتۋعا قازاقستاننىڭ مۇددەلى ەكەندىگىن اتاپ ءوتتى.

كەزدەسۋ بارىسىندا قازاق جانە تاتار حالىقتارىنىڭ اراسىنداعى بايلانىستارىنىڭ نىعايۋى ولاردىڭ جاقىندىعى, تاريحي-مادەني ورتاق مول مۇراسى مەن رۋحاني قۇندىلىقتارىمەن كورىنىس تاۋىپ وتىرعانى اتالىپ ءوتىلدى. بۇل ورايدا قازاقستاننىڭ تۇڭعىش پرەزيدەنتى – ەلباسى ن.ءا.نازارباەۆ پەن تاتارستان پرەزيدەنتى م.ش.شايميەۆتىڭ سىڭىرگەن ەڭبەگى زور.

ءبىزدىڭ ەلىمىزگە قازاقستان رەسپۋبليكاسىنىڭ تۇڭعىش پرەزيدەنتى كۇنىن مەرەكەلەۋگە قاتىسۋعا كەلگەن تاتارستان مەملەكەتتىك كەڭەسىنىڭ توراعاسى ەلباسىنا دەگەن شىنايى قۇرمەتىن جەتكىزدى جانە ونىڭ دانا ءارى كوشباسشىلىق قاسيەتتەرى مەن ەگەمەن قازاقستاننىڭ تابىستى دامۋىنا قوسقان ۇلەسىن اتاپ ءوتتى. «ن.ءا.نازارباەۆ قىزمەتىنىڭ ءمانى جىل سايىن ارتا تۇسەدى, ونىڭ ەڭبەگى – ىشكى جانە سىرتقى ساياساتتى ساۋاتتى جۇرگىزۋدىڭ جارقىن مىسالى», - دەدى ف.مۇحامەتشين.

سەنات توراعاسى پارلامەنتارالىق ىنتىماقتاستىقتى نىعايتۋ تۋرالى ايتا كەلىپ, قازاقستان پارلامەنتى تاتارستان مەملەكەتتىك كەڭەسىمەن تىعىز ىنتىماقتاستىقتى دامىتۋعا مۇددەلى ەكەنىن اتاپ ءوتتى.

تاراپتار 9 جەلتوقساندا قازان قالاسىندا وتەتىن قازاقستان پارلامەنتى سەناتى مەن رەسەيدىڭ فەدەراتسيا كەڭەسى اراسىنداعى ىنتىماقتاستىق جونىندەگى كوميسسيانىڭ كەزەكتى وتىرىسىنا دايىندىقتى تالقىلادى.

اڭگىمە بارىسىندا قازاقستان مەن تاتارستان اراسىنداعى ساۋدا-ەكونوميكالىق ىنتىماقتاستىقتى دامىتۋ ماسەلەلەرى دە سارالاندى. تاراپتار قازىرگى كورسەتكىشتەر ءوزارا ساۋدانىڭ وسى كەزدەگى الەۋەتىنە سايكەس كەلمەيتىنى تۋرالى ايتتى. قازاقستان مەن تاتارستان اراسىنداعى تاۋار اينالىمى شامامەن ۇشتەن بىرگە تومەندەدى.

ء«وزارا ساۋدادا 1 ميلليارد دوللار كولەمىندەگى العا قويعان ورتاق ماقساتقا قول جەتكىزۋ ءۇشىن وسى باعىتتاعى جۇمىستى جالعاستىرۋ قاجەت», - دەدى سەنات توراعاسى.

جۇزدەسۋشىلەر مادەني-گۋمانيتارلىق ىنتىماقتاستىقتى تەرەڭدەتۋدى, جاستار مەن ايەلدەر ۇيىمدارى اراسىنداعى ءوزارا ءىس-قيمىلدى دا تالقىلادى.