وزەننىڭ ەگىز ساعاسى, ارۋدىڭ قوس بۇرىمى سەكىلدى ەجەلدەن ەركىن جاساسىپ, جاراسقان قازاق پەن قىرعىزدىڭ باۋىرلاس دوستىق قارىم-قاتىناسى قاي كەزدە دە ءوزىنىڭ ومىرشەڭ ونەگەسىمەن قۇندى. ءاردايىم ءبىر-ءبىرىنىڭ جاقسىلىعىن سۇيىنشىلەپ, قۋانىشىنا ورتاق بولۋعا اسىعار ايىرقالپاقتى اعايىن ەل گازەتى «Egemen Qazaqstan»-نىڭ عاسىر تويىندا دا اعەدىل پەيىلىن ايامادى.
قازاق ءباسپاسوزىنىڭ مەرەيلى مەجەسىن كۇللى قىرعىز وقىرمانىنا سۇيىنشىلەگەن ارىپتەستىك ادەمى ءۇردىس مەرەيتوي قارساڭىندا جاراسىمدى جالعاستى.
قىرعىز حالقىنىڭ «Egemen Qazaqstan»-مەن داۋىرلەس, بيىل تاريحىنا 95 جىل تولتىرىپ وتىرعان كوشباسشى باسىلىمدارىنىڭ ءبىرى – «ەركين توو» جانە «كىرگىز تۋسۋ» گازەتتەرى ايقارما بەتىن قازاق ءباسپاسوزىنىڭ مەرەيتويىنا ارنادى. باسىلىم باسشىسى دارحان قىدىرالىمەن ساليقالى سۇحبات جۇرگىزىپ, ءجۇز جىلدىق جىلناما تاريحىن باۋىرلاس اعايىنعا كەڭىنەن تانىستىردى. اقجارما تىلەك, اعەدەن پەيىلدەرىن جولدادى.
ءسويتىپ كەزىندەگى شوقان ءۋاليحانوۆ, مۇحتار اۋەزوۆ, شىڭعىس ايتماتوۆتار سالعان سارا جول جاڭا عاسىر بيىگىندە جاڭاشا تۇلەپ, ەتەكتە ەلى, توسكەيدە مالى قوسىلعان باۋىرلاس قوس مەملەكەتتىڭ عاسىردان عاسىرعا جالعاسقان ماڭگىلىك دوستىعىن وسىلاي ايشىقتادى.