قالمۇحانبەت قاسىموۆ رەسەيدىڭ قاۋىپسىزدىك كەڭەسىنىڭ حاتشىسى نيكولاي پاترۋشەۆپەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
ماسكەۋ قالاسىندا قازاقستان رەسپۋبليكاسى جانە رەسەي فەدەراتسياسى قاۋىپسىزدىك كەڭەستەرى اپپاراتتارى اراسىنداعى كەڭەيتىلگەن جوسپارلى كونسۋلتاتسيالار ءوتتى.
قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى قالمۇحانبەت قاسىموۆتىڭ جانە رەسەي فەدەراتسياسى قاۋپسىزدىك كەڭەسىنىڭ حاتشىسى نيكولاي پاترۋشەۆتىڭ توراعالىعىمەن وتكەن كەلىسسوزدەر بارىسىندا ىنتىماقتاستىقتىڭ وزەكتى ماسەلەلەرى تالقىلاندى.
تاراپتار سۋ قاۋىپسىزدىگىنىڭ جاعدايىن جانە ترانسشەكارالىق سۋ رەسۋرستارىنىڭ ەكوجۇيەلەرىن ساقتاۋ بويىنشا شارالاردى ەگجەي-تەگجەيلى قارادى. سونىڭ ىشىندە جايىق وزەنىنىڭ باسسەينىن ساۋىقتىرۋ تۋرالى بىرلەسكەن جۇمىس بويىنشا پىكىر الماستى.
بۇدان بولەك كۇن تارتىبىنە الەمدە ساۋدا-ەكونوميكالىق تىيىم سالۋ جاعدايىنداعى ەكى مەملەكەتتىڭ اسكەري-تەحنيكالىق ىنتىماقتاستىقتى كۇشەيتۋ باعىتتارى شىعارىلدى.
سونىمەن قاتار قازاقستان مەن رەسەي قاۋىپسىزدىك كەڭەستەرىنىڭ حاتشىلارى الەمدىك جانە وڭىرلىك قاۋىپسىزدىك سالاسىنداعى قازىرگى احۋال مەن ارىپتەستىكتىڭ الداعى باعىتتارى بويىنشا پىكىرلەرىن ءبىلدىردى.
جۇمىس ناتيجەلەرى بويىنشا ەكى ەلدىڭ ءتيىستى مەملەكەتتىك ورگاندارىنا ناقتى تاپسىرمالار بەرىلدى.