«باتىس» وڭىرلىك قولباسشىلىعى جاۋىنگەرلىك دايارلىقتى جەتىلدىرۋدىڭ, اسكەري مەن قۇقىقتىق ءتارتىپتى نىعايتۋدىڭ, اسكەري قىزمەت پەن كۇندەلىكتى تىرشىلىك ەتۋ ماسەلەلەرىن جاقسارتۋدىڭ نەگىزگى باعىتتارى بويىنشا وقۋ-ادىستەمەلىك جيىن وتكىزەدى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.
اتىراۋ قالاسىنىڭ اسكەري بولىمدەرى بازاسىندا اتىراۋ, اقتوبە, ماڭعىستاۋ جانە باتىس قازاقستان وبلىستارىنىڭ اۋماعىنداعى اسكەري بولىمدەردەن تۇراتىن وڭىرلىك قولباسشىلىقتىڭ باسشىلىق قۇرامىمەن وقۋ-ادىستەمەلىك جيىندار وتۋدە.
جيىنعا قاتىسۋشىلار ءۇشىن جاۋىنگەرلىك دايارلىقتى ۇيىمداستىرۋ پاندەرى بويىنشا ساباقتار وتكىزىلەدى. سونداي-اق كومانديرلەر دەنە دايىندىعى بويىنشا سىناق تاپسىرىپ, توپ بويىنشا ءار ءتۇرلى ساباقتارعا قاتىسادى.
«كارابوتان» وقۋ پوليگونىندا اسكەري قىزمەتشىلەر جاۋىنگەرلىك ماشينالاردى جۇرگىزۋدى ۇيىمداستىرۋ, اسكەري تەحنيكانى تيەۋ جانە تاسىمالداۋ, جاۋىنگەرلىك اتىستاردى ۇيىمداستىرۋ جانە قول گراناتاسىن لاقتىرۋ ءتارتىبى بويىنشا ساباقتارعا قاتىسادى.
«جيىنداردىڭ باستى ماقساتى – جاۋىنگەرلىك دايىندىق ءىس-شارالارىن ۇيىمداستىرۋ مەن وتكىزۋدە كوماندالىق قۇرامنىڭ ادىستەمەلىك داعدىلارىن جەتىلدىرۋ, اسكەري قىزمەتتىڭ ماسەلەلەرىن جاقسارتۋ جانە 2019 وقۋ جىلىنداعى وڭىرلىك قولباسشىلىقتىڭ جۇمىسىن قورىتىندىلاۋ. بيىلعى جىل جاۋىنگەرلىك دايىندىق پەن كۇندەلىكتى ءومىر ءسۇرۋ تۇرعىسىنان مازمۇندى بولدى, ۇلكەن جۇمىستار اتقارىلدى», دەپ اتاپ ءوتتى «باتىس» وڭىرلىك قولباسشىلىعى اسكەرلەرىنىڭ قولباسشىسى پولكوۆنيك نۇرلان الدياروۆ.
جيىن سوڭىندا «باتىس» وڭىرلىك قولباسشىلىعى اسكەرلەرىنىڭ بارلىق باعىتتار بويىنشا اتقارعان جۇمىستارى قورىتىندىلانادى.