وزبەكستان رەسپۋبليكاسىنىڭ استاناسى تاشكەنت قالاسىندا «وزبەكستان رەسپۋبليكاسىنداعى قازاقستان رەسپۋبليكاسىنىڭ جىلى» ەگيداسىنىڭ اياسىندا قازاقستاندىق مەديتسينا كۇندەرى ءوتىپ جاتىر. ۇكىمەتارالىق كەلىسىمدەردىڭ شەڭبەرىندە ۇيىمداستىرىلعان بۇل ءىس-شارانىڭ باستى ماقساتى ەكى رەسپۋبليكانىڭ دەنساۋلىق ساقتاۋ, مەديتسينالىق ءبىلىم بەرۋ جۇيەلەرىنىڭ ديالوگىن دامىتۋ جانە نىعايتۋ, سونداي-اق اۋرۋلاردى جاڭا تەحنولوگيالار ارقىلى دياگنوستيكالاۋ جانە ەمدەۋ بويىنشا تاجىريبە الماسۋ, دەپ حابارلادى ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ ءباسپاسوز قىزمەتى.
ۇلتتىق ورتالىقتاردىڭ, جوعارعى وقۋ ورىندارىنىڭ, دەنساۋلىق ساقتاۋ باسقارمالارىنىڭ وكىلدەرىنەن تۇراتىن قازاقستاندىق دەلەگاتسيانى دەنساۋلىق ساقتاۋ ءمينيسترى ءبىرتانوۆ ەلجان امانتاي ۇلى باستاپ باردى.
ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ دەلەگاتسياسىنىڭ قۇرامىندا ورتالىقتىڭ جەتەكشى ماماندارى بار: ينتەرۆەنتسيالىق كارديولوگيا ءبولىمىنىڭ مەڭگەرۋشىسى, PhD بايىمبەتوۆ ءادىل قۇدايبەرگەن ۇلى, ەندوسكوپيا ءبولىمىنىڭ مەڭگەرۋشىسى, دەنساۋلىق ساقتاۋ ماگيسترى ابدراشەۆ ەرلان بايتورە ۇلى, ۋرولوگيا جانە بۇيرەك ترانسپلانتاتسياسى ءبولىمىنىڭ مەڭگەرۋشىسى, جوعارى ساناتتى دارىگەر يبراگيموۆ راۆيل پاشاەۆيچ, اعا عىلىمي قىزمەتكەر, پروفەسسور ءىلياسوۆا بيبىگۇل ساپاربەكقىزى, گينەكولوگيالىق ءبولىمنىڭ مەڭگەرۋشىسى, جوعارى ساناتتى دارىگەر ۇسەنوۆ قادىرجان مارات ۇلى, جوعارى ساناتتى گينەكولوگ دارىگەر چۋپين الەكساندر نيكولاەۆيچ, ستراتەگيالىق بلوكتىڭ جەتەكشىسى, مەديتسينا عىلىمدارىنىڭ كانديداتى مىرجاقىپوۆ ارمان تولەگەن ۇلى. ورتالىق دەلەگاتسياسىن باسقارما توراعاسى, مەديتسينا عىلىمدارىنىڭ دوكتورى, پروفەسسور, دسم-ءنىڭ باس حيرۋرگى بايماحانوۆ بولاتبەك بيمەندە ۇلى باستاپ باردى.
وسى ءىس-شارانىڭ اياسىندا ورتالىق ماماندارى ءوز جەتىستىكتەرى مەن تابىستارىن وزبەكستاننىڭ پراكتيكالىق دەنساۋلىق ساقتاۋ وكىلدەرىنىڭ نازارىنا ۇسىندى.
جوعارى دەڭگەيدەگى سەسسيادا باسقارما توراعاسى بايماحانوۆ بولاتبەك بيمەندە ۇلى «ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ مەديتسينالىق تەحنولوگيالار سالاسىنداعى جەتىستىكتەرى» تاقىرىبىندا بايانداما جاسادى.
ۆ.ۆاحيدوۆ اتىنداعى رەسپۋبليكالىق مامانداندىرىلعان عىلىمي-پراكتيكالىق حيرۋرگيا ورتالىعى, رەسپۋبليكالىق مامانداندىرىلعان عىلىمي-پراكتيكالىق كارديولوگيا ورتالىعى, ءور دسم-ءنىڭ جۇقپالى اۋرۋلار جانە ۆيرۋسولوگيا عىلىمي-زەرتتەۋ ينستيتۋتى, ءور دسم-ءنىڭ رەسپۋبليكالىق پەريناتالدىق ورتالىعى سياقتى وزبەكستان رەسپۋبليكاسىنىڭ ءىرى ۇلتتىق ورتالىقتارىمەن سەرىكتەستىك تۋرالى مەموراندۋمدار بەكىتىلدى.
فورۋمنىڭ ەكىنشى كۇنى ا.ن. سىزعانوۆ اتىنداعى ۇعحو-نىڭ ماماندارى بىرنەشە شەبەرلىك ساباقتارىن وتكىزدى:
پروفەسسور بايماحانوۆ ب.ب. ء«تىرى تۋىستىق دونوردان بۇيرەكتى ترانسپلانتاتسيالاۋ كەزىندەگى لاپاروسكوپيالىق مانۋالدىق-اسسيستەندىرىلگەن نەفرەكتوميا» بىرەگەي وتاسىن جاسادى.
ينتەرۆەنتسيالىق كارديولوگيا ءبولىمىنىڭ مەڭگەرۋشىسى, PhD بايىمبەتوۆ ءا.ق. «كاتەتەرلىك راديوجيىلىكتىك ابلياتسيا» تاحيكاردياسىنىڭ كۇردەلى فورمالارىنا بىرنەشە وتا جاساپ, «جۇرەك ءريتمى بۇزىلىستارىن ينتەرۆەنتسيالىق ەمدەۋدەگى زاماناۋي تەحنولوگيالار» تاقىرىبىندا ءدارىس وقىدى.
ەندوسكوپيا ءبولىمىنىڭ مەڭگەرۋشىسى ابدراشەۆ ە.ب. ءۇش ناۋقاستىڭ اسقازانىنداعى ەپيتەليالدىق وسىندىلەردى ەندوسكوپيالىق جولمەن الىپ تاستاۋ وتاسىن ءساتتى تۇردە جۇزەگە اسىردى.
گينەكولوگتار توبى 10 ءمينينۆازيۆتى وتا (گيستەرورەزەكتو- جانە لاپاروسكوپيالىق وپەراتسيالار) جۇرگىزدى. جاتىردىڭ لاپاروسكوپيالىق ەكستيرپاتسياسى بويىنشا ءبىر وپەراتسيا, سونداي-اق تورلى پروتەزدىڭ ورناتىلۋى ارقىلى گيبريدتىك ءۇش دەڭگەيلى رەكونسترۋكتسيا جاسالدى.
سونىمەن قاتار HEOS زاماناۋي حيرۋرگيالىق تەحنولوگياسى تانىستىرىلدى.
پروفەسسور ءىلياسوۆا ب.س. ۆيرۋسولوگيا ينستيتۋتىندا «گەپاتولوگيانىڭ وزەكتى ماسەلەلەرى» تاقىرىبىندا ءدارىس وقىدى. بىرلەسكەن كلينيكالىق تالقىلاۋلار بارىسىندا باۋىر پاتولوگياسى بار ناۋقاستاردىڭ جاي-كۇيىن تەكسەرىپ, ولارعا مەديتسينالىق كەڭەس بەردى.
وتكىزىلگەن شەبەرلىك ساباقتارىنا وزبەكستاندىق ارىپتەستەر ەرەكشە قىزىعۋشىلىق تانىتىپ, ءارى قارايعى جەمىستى ىنتىماقتاستىققا جول اشىلدى.