ۇرلىققا قاتىستى ارەكەتتەر اۋىر قىلمىستار ساناتىنا كوشەدى. بۇل تۋرالى پارلامەنت ءماجىلىسىنىڭ جالپى وتىرىسىندا ءمالىم بولدى.
«ىزگىلەندىرۋ العاشقى رەت قوعامعا, ازاماتتارىمىزعا ونشا قاۋىپ توندىرمەيتىن اۋىر ەمەس قىلمىستارعا عانا قاتىستى. ولارعا تۇزەتىلۋ ءۇشىن مۇمكىندىك بەرۋ كەرەك. ال جۇيەلى تۇردە قىلمىستى كاسىپكە اينالدىرعان ادامدارعا جازا اۋىر بولۋى ءتيىس. بۇلارعا مەملەكەتتىڭ بارلىق رەپرەسسيۆتىك كۇشى جۇمسالادى. اسىرەسە, قاساقانا ادام ولتىرگەندەرگە, پەدوفيلدەرگە, ەكسترەميستەرگە, ەسىرتكى ساتۋشىلارعا, براكونەرلەرگە, جانۋارلار دۇنيەسىنە قول سۇققاندار مەن ۇيىمداسقان قىلمىسقا بارعان ادامدارعا. مەملەكەت باسشىسى قاسىم-جومارت توقاەۆ ءوز جولداۋىندا وسىنداي قىلمىستار ءۇشىن جاۋاپتىلىقتى قاتايتۋ تۋرالى تاپسىرما بەردى» دەدى باس پروكۋروردىڭ ورىنباسارى مارات احمەتجانوۆ.
وسى ورايدا بىرقاتار قاساقانا قىلمىس ءۇشىن جاۋاپتىلىقتى كۇشەيتۋ ەسكەرىلگەن.
«بۇل تۇزەتۋلەردىڭ ءبىر بولىگى مەنشىككە قارسى قىلمىستارعا قاتىستى. الدىمەن ۇرلىق, توناۋ جانە قاراقشىلىق ماقساتىندا ءۇي-جايعا, قويماعا, كولىك قۇرالىنا زاڭسىز بۇزىپ كىرۋمەن جاسالعان قىلمىستار ءۇشىن جاۋاپتىلىق كۇشەيمەك. ۇرلىققا قاتىستى ارەكەتتەر اۋىر قىلمىستار ساناتىنا كوشەدى. دەمەك, تاتۋلاسۋ بولمايدى. ءتىپتى, زالال ورنىن تولتىرسا دا, كەشىرىم بەرسە دە قىلمىستىلىق جاۋاپتىلىقتان بوساتىلمايدى» دەدى م.احمەتجانوۆ.
ايتا كەتەيىك, بۇگىن جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جانە قىلمىستىق-پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانىپ جاتىر.