قىزىلوردا قالاسىندا «جىر مۇرا» جوباسىنىڭ قورىتىندى كونتسەرتى ءوتتى. وبلىستىق مادەنيەت, ارحيۆتەر جانە قۇجاتتاما باسقارماسى قولعا العان جوبا اياسىندا بيىل « ۇلى دالا توسىندەگى سىر ەلىنىڭ فولكلورى» اتتى ەكسپەديتسيا ۇيىمداستىرىلىپ, ەل اراسىندا ساقتالىپ قالعان كونە ماقام-ساز ۇلگىلەرى, جىراۋ-جىرشىلار داۋىستارى, داستان, تولعاۋلار جيناقتالدى.
وسىعان دەيىن ارال, قارماقشى, شيەلى اۋداندارىندا جىر ۇيىرمەلەرى قۇرىلعان ەدى. «رۋحاني جاڭعىرۋ» باعدارلاماسى شەڭبەرىندەگى باستاما ناتيجەسىندە بيىل قازالى, جالاعاش, سىرداريا مەن جاڭاقورعاندا وسىنداي ۇيىرمەلەر اشىلدى.
ۇلى دالاداعى ۇزاندار كوشىنىڭ باسىندا تۇرعان قورقىت بابا مەكەن ەتكەن ءوڭىر تۇرعىندارى ءۇشىن ءداستۇرلى ونەردىڭ ءباسى ارقاشان بيىك. «جىر مۇرا» اياسىندا بارلىق اۋداندا قوبىز مەكتەپتەرى اشىلىپ, قازىر جۇزدەگەن بالا اتادان مۇرا بولعان ونەردى ۇيرەنۋگە تالاپ قىلۋدا.
جىر ساندىعىن بەلگىلى جىراۋ بيداس رۇستەمبەكوۆ اشتى. ساحناعا ورەندەردى باستاپ شىققان جىراۋ وسيەت جىردان كەيىن «حالىقتىڭ قازىناسىنا اينالعان اسىل مۇرا, كيەلى ونەر ەندى وزدەرىڭە امانات. ەلدى سىرلى اۋەن, سۇلۋ سوزبەن سۋسىنداتۋدى پارىزىم دەپ بىلىڭدەر» دەگەن لەبىزىن جەتكىزدى. وسى باتا-تىلەكتەن سوڭ قازالىلىق تالاپتى جاستار جىر تولعادى.
وسى كۇنى جيەنباي, سارسەنباي, نۇرتۋعان مەكتەپتەرىنىڭ وكىلدەرى ساحناعا شىقتى. سىردىڭ بويىن سىرناي سازىنا بولەگەن ايگىلى نارتاي اقىن ءىزباسارلارىنىڭ دا ونەرى ەرەكشە بولدى. ءداستۇرلى ونەردەن ءورىس ىزدەگەن قوبىزشىلار توبىنىڭ دا تالابى قۋانتتى.
بارلىق اۋداننان جيىلعان ونەرپاز ورەندەر «جىر مۇرا» جوباسىنىڭ تالاپتى جاستارعا جول اشقاندىعىن دالەلدەدى.
قىزىلوردا