پەدياتريا جانە بالالار حيرۋرگياسى عىلىمي ورتالىعى بىشكەك قالاسىندا ءوتىپ جاتقان قازاقستاننىڭ مەديتسينا كۇندەرى اياسىندا قىرعىز رەسپۋبليكاسىنىڭ انا مەن بالانى قورعاۋ ۇلتتىق ورتالىعىمەن جانە ونكولوگيا جانە گەماتولوگيا ۇلتتىق ورتالىعىمەن ەكى جاقتى ارىپتەستىك پەن ىنتىماقتاستىق تۋرالى مەموراندۋمعا قول قويدى.
ەكى كۇندىك شاراعا ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ باستاعان 100-دەن استام دەلەگات قاتىسۋدا. ءىس-شارا پرەزيدەنت قاسىم-جومارت توقاەۆتىڭ قىرعىز رەسپۋبليكاسىنا رەسمي ساپارى قارساڭىندا وتۋدە.
قىرعىزستانداعى قازاقستاندىق مەديتسينا كۇندەرى – بۇل قازاقستان مەن قىرعىزستان دەنساۋلىق ساقتاۋ جۇيەلەرى اراسىنداعى ىنتىماقتاستىقتى كۇشەيتۋگە, مەديتسينالىق ۇيىمدار اراسىنداعى ءوزارا ءىس-قيمىلدى كەڭەيتۋگە, ەكى ەلدىڭ ازاماتتارىنا مەديتسينالىق كومەك كورسەتۋدىڭ قولجەتىمدىلىگى مەن ساپاسىن قامتاماسىز ەتۋ جولىندا تاجىريبە مەن بىلىممەن, يننوۆاتسيالار مەن تەحنولوگيالارمەن الماسۋعا باعىتتالعان ءىس-شارا.
مەموراندۋم اياسىندا ەكى ەل اراسىندا مەديتسينالىق كومەك كورسەتۋدى ارتتىرۋ, مەديتسينالىق ءتۋريزمدى دامىتۋ, مەديتسينا قىزمەتكەرلەر مەن دارىگەرلەردىڭ بىلىكتىلىكتەرىن ارتتىرۋ جانە ت.ب. سالالار بويىنشا ەكى جاقتى ارىپتەستىك ورناتىلماق.
شارا بارىسىندا سونىمەن قاتار, قازاقستان مەن قىرعىزستان مەديتسينالىق ۇيىمدارى اراسىندا 10 مەموراندۋمعا قول قويىلدى.
ساپار بارىسىندا قازاقستاندىق ماماندار مەديتسينالىق ۇيىمداردا ازاماتتارعا تەگىن كەڭەس بەرۋدى ۇيىمداستىرۋدى جوسپارلاۋدا. سونداي-اق ءىس-شارا اياسىندا قازاقستاننىڭ وزىق مەديتسينالىق ۇيىمدارىنىڭ قاتىسۋىمەن مەديتسينالىق كورمە وتەدى.