«عىلىم ورداسى» تابيعات مۋزەيىنىڭ ۇيىمداستىرۋمەن وتكەن «قازاقستان جاندىكتەرىنىڭ تاڭعاجايىپ الەمى» بالالار شىعارماشىلىعى بايقاۋى مارەسىنە جەتتى. بايقاۋ قورجىنىنا كەلىپ تۇسكەن ءجۇز ەلۋدەن استام جۇمىستىڭ ارقايسىنىڭ وزىندىك ەرەكشەلىگى بار. ولاردىڭ اراسىنان ۇزدىك جۇمىستاردى ىرىكتەۋ, ارينە, قازىلار القاسىنا وڭايعا تۇسپەگەنى انىق.
«رۋحاني جانعىرۋ» باعدارلاماسىن جۇزەگە اسىرۋ ماقساتىندا ۇيىمداستىرىلىپ وتىرعان بايقاۋدى قۇتتىقتاۋ سوزىمەن اشقان «عىلىم ورداسى» باس ديرەكتورىنىڭ ورىنباسارى نۇرلان سەيدىن بالالارعا الداعى ۋاقىتتا دا تۋعان جەردى تانۋ شارالارىنا شاقىردى. ۇلتتىق قۇندىلىقتاردى باعالاۋ, ەلىمىزدىڭ تابيعي بايلىعىن ساقتاۋعا باۋلۋدى ماقسات ەتەتىن بايقاۋعا الماتى جانە الماتى وبلىستارى مەكتەپتەرىنىڭ وقۋشىلارى قاتىسقان.
تابيعات مۋزەيىنىڭ مەڭگەرۋشىسى گۇلجان شايزاتقىزىنىڭ ايتۋىنشا, وسى مازمۇنداعى بايقاۋلار بالالار قيالىن ۇشتاپ, تابيعاتتى زەرتتەۋگە, ايالاۋعا, قورشاعان ورتاعا بەيجاي قاراماۋعا باۋليدى. سونداي-اق تابيعات مۇراجايىنداعى ەكسپوزيتسيالار كەلۋشىلەردى ەرتەدەگى جانۋارلار الىمىمەن عانا ەمەس, قازاقستاننىڭ قازىرگى زامانعى تابيعاتىمەن تانىسۋعا دا مۇمكىندىك بەرەدى.
قازىلار القاسى بارلىق جۇمىستى مۇقيات باعالادى. ىزدەنىستەرىن اق قاعاز بەتىنە تۇسىرگەن بالالاردىڭ قيالىندا شەك جوق دەرسىز. قارىنداشتى دا, جاپسىرما قۇرالدارىن دا پايدالانعان جۇمىستاردا جاندىكتەردىڭ تابيعاتتاعى تىرشىلىگى شەبەر كورسەتىلگەن. ال قۇمىرسقالاردىڭ بىرنەشە ءتۇرىن ۇيدە وسىرەتىن 9-سىنىپ وقۋشىسى ينوكەنتي ترەسكۋنوۆتىڭ جاندىكتەردى باپتاۋداعى تاجىريبەسى بالالاردى ەرەكشە قىزىقتىردى.
بايقاۋ قورىتىندىسىنا وراي ەڭ ۇزدىك جۇمىستارعا ارنايى ديپلومدار بەرىلسە, وزگە قاتىسۋشىلار دا سەرتيفيكاتتارمەن ماراپاتتالىپ, كىتاپتار سىيعا تارتىلدى. بالالار شىعارماشىلىعىن ۇيىمداستىرعان مەكتەپ ۇستازدارىنا دا العىس حاتتار بەرىلدى. جەڭىمپازدارعا «قازاقاستاننىڭ قىزىل كىتابى بەتتەرىنەن», «قازاقستاننىڭ قاۋىپتى جانۋارلارى» كىتاپتارى سىيعا تارتىلىپ, تانىمدىق باعىتتا جاندىكتەر تۋرالى فيلمدەر كورسەتىلدى.
الماتى