وڭتايلى كىتاپ ورتالىعى

مىنە, وسىنداي گادجەتتەر مەن سوتكالارعا «سوعىستى» قالاي باستاۋعا بولادى؟ بالانىڭ كىتاپ وقىتۋعا دەگەن قىزىعۋشىلىعىن قالاي وياتۋعا بولادى؟ مۇنىڭ ءبىر ءادىسىن ەلوردالىق ءمادينا جۇمانقىزى تاپقان ءتارىزدى.

ءمادينا بالا كەزىنەن كىتاپتى ءسۇيىپ وقيدى. كىتاپقۇمار اكەسى وسى ادەتتى قىزىنىڭ بويىنا دا سىڭىرگەن. ول جۇرگەن جەرلەرىندە ءاردايىم كىتاپ قولتىقتاپ جۇرەدى.

بيىل ول دوستارىمەن بىرلەسىپ Zhasproject جوباسىنىڭ اياسىندا «Booktime» دەپ اتالاتىن جاڭا ءىستى باستادى. بالا كۇتى­مى­مەن ۇيدە وتىرعان ول ءوزى سياق­تى اسەم, دينا ەسىمدى جاس انا­لاردىڭ, پاۆەل, رامازان دەگەن زامانداستارىنىڭ باسىن قوسىپ, بالالارعا پايدالى ءىس باستادى. ەلوردامىزدىڭ «جاعالاۋ» شاعىن اۋدانىندا ورنالاسقان ورتالىققا وسى توڭىرەكتەگى كوپ بالالى وتباسىلاردىڭ بالالارى كەلىپ كىتاپ وقىپ, بوس ۋا­قىتتارىن ءتيىمدى وتكىزەدى.

Zhasproject جوباسىنىڭ شارتى بويىنشا بۇل ورتالىققا كەلىپ, تەگىن كىتاپ وقىپ, بالالاردىڭ بوس ۋاقىتىن ءبىلىم الۋعا جۇمساۋعا اركىمنىڭ-اق مۇمكىندىگى بار. باس­تاپقىدا شاعىن اۋدان تۇر­عىندارى تەگىن دەگەنگە سەنبەي, بۇل نە قىلعان ورتالىق دەپ تۇسىنبەپتى. ءمادينا باستاعان بەلسەندى توپ حالىققا ءتۇسىندىرۋ جۇمىستارىن جۇرگىزگەننەن كەيىن عانا ورتالىقتان ادام اياعى ارىلمايتىن بولدى. جوبانىڭ تاعى ءبىر ەرەكشەلىگى, مۇندا ءتىلى مۇكىس بالالارعا ارنايى لوگوپەد اپتاسىنا ءبىر رەت كەلىپ, كومەك كورسەتەدى.

كۇن سايىن اتا-انالار ءما­دينا مەن ونىڭ دوستارىنا العىس ايتىپ جاتادى. اسىرەسە كوپ بالالى جانە مۇقتاج وتباسىنان شىققان بالالاردىڭ اتا-انالارى ءۇشىن بۇل ورتالىقتىڭ بەرەرى مول. بالالاردىڭ ۋاقىتى پايدالى ءوتىپ جاتقانىنا ولار دا قۋانىشتى. بۇل ازىرگە قالاداعى وسىنداي قىزمەت كورسەتەتىن جال­عىز جوبا. ءبىلىم جانە عىلىم مينيسترلىگى مەن الەمدىك بانكتىڭ قولداۋىمەن ىسكە اسىرىلىپ جاتىر.

«ارماندا.ۇسىن. ىسكە اسىر» دەگەن ۇرانمەن جۇمىسىن باس­تاعان Zhasproject جوباسى قو­عامعا پايدا تيگىزۋدى باستى ماق­سات رەتىندە ۇستانادى. ءۇش جىل ىشىندە 10 مىڭعا جۋىق قازاق­ستاندىق جاس وزدەرىنىڭ وسىعان ۇقساس 3000-عا تارتا الەۋمەتتىك جوباسىن جاساپ, حالىقتىڭ يگىلىگىنە جۇمىس ىستەدى.

ايزەرە سامارقان