قازاقستان رەسپۋبليكاسى مادەنيەت جانە سپورت ۆيتسە-ءمينيسترى ەلدوس رامازانوۆ باستاعان قازاقستاندىق دەلەگاتسيا WADA ۇيىمىنىڭ باس ديرەكتورى وليۆەر نيگگلە جانە WADA–نىڭ ازيا وڭىرىندەگى كەڭسەسىنىڭ باسشىسى كازۋحيرو حاياشيمەن كەزدەستى. بۇل تۋرالى ۆەدومستۆونىڭ ءباسپاسوز قىزمەتى حابارلادى.
كەزدەسۋ سپورتتاعى دوپينگ ماسەلەلەرىنە ارنالعان V بۇكىلالەمدىك دوپينگكە قارسى كونفەرەنتسيا اياسىندا ءوتتى. قازاقستاندىق تاراپ دوپينگپەن قارسى ەرەجەلەردى بۇزعانى ءۇشىن جاۋاپكەرشىلىكتى قاتاڭداتۋ, ۇلتتىق دوپينگكە قارسى ۇيىمنىڭ مارتەبەسىن ارتتىرۋ سۇراقتارىن قامتيتىن زاڭ جوباسى تۋرالى كەڭىنەن ايتىپ بەردى. ءوز كەزەگىندە, نيگگلە مىرزا قازاقستان ۇكىمەتىنىڭ اتالعان باعىتتا قولعا الىپ جاتقان رەفورمالارىن جوعارى باعالاپ, بولاشاقتا دوپينگپەن كۇرەس ماسەلەسىندە ىنتىماقتاستىقتىڭ نىعاياتىنىنا سەنىم ءبىلدىردى.
ەستەرىڭىزگە سالايىق, دەنە شىنىقتىرۋ جانە سپورتقا قاتىستى زاڭ جوباسى ءماجىلىستىڭ ەكىنشى وقىلىمىندا ماقۇلدانىپ, سقر پارلامەنتى سەناتىنىڭ قاراۋىنا جىبەرىلگەن بولاتىن.
ءوز كەزەگىندە, كازۋحيرو حاياشي دوپينگ-سىنامالاردىڭ ساقتالۋى جۇيەسىنىڭ رەفورمالانىپ جاتقانىن ايتا كەتتى.
«وليمپيادا ويىندارىنا دەيىن الىنعان دوپينگ سىنامالار بولاشاقتا 10 جىل ساقتالاتىن بولادى. بۇل دوپينگ-سىنامالاردى ساقتاۋ مەن ولاردى قايتادان ساراپتامادان وتكىزۋدىڭ جاھاندىق باعدارلاماسى بولماق»,-دەدى حاياشي.
سونىمەن قاتار, قوس تاراپ دوپينگكە قارسى كودەكس پەن حالىقارالىق دوپينگكە قارسى ستاندارتتاردىڭ قايتا قارالۋ پروتسەسىن تالقىلادى. جاڭا حالىقارالىق ستاندارتقا سۇيەنسەك, قانداي دا ءبىر ەلدىڭ دوپينگكە قارسى اگەنتتىگى حالىقارالىق كودەكسكە ساي كەلمەيتىن بولسا, سول ەلدىڭ سپورتشىسى جارىستان شەتتەتىلەدى, ونىڭ قاتارىندا وليمپيادا ويىندارى دا بار.
ەستەرىڭىزگە سالا كەتەيىك, 2017 جىلدىڭ جەلتوقسانىندا WADA ۇيىمى دوپينگكە قارسى كودەكس پەن حالىقارالىق دوپينگكە قارسى ستاندارتتاردى قايتا قاراۋ پروتسەسىن باستاعان بولاتىن. سودان بەرى 2000 تۇزەتۋلەر وڭدەلىپ, وزگەرىسكە ۇشىراعان قۇجاتتى الەمدىك زاڭگەرلەر ساراپتاۋدان وتكىزگەن بولاتىن. 2017 جىلدان بەرى قارالىپ كەلە جاتقان وزگەرىستەر پولشاداعا كونفەرەنتسيانىڭ دا باستى تاقىرىپتارىنىڭ ءبىرى بولدى.
ەسكە سالساق, 5 قاراشادا پولشانىڭ كاتوۆيتسە قالاسىندا سپورتتاعى دوپينگ ماسەلەلەرىنە ارنالعان V بۇكىلالەمدىك دوپينگكە قارسى كونفەرەنتسيا باستالعان ەدى. اتالعان جيىنعا بۇكىل الەمنەن 1000-نان استام دەلەگات قاتىسىپ جاتىر. كۇن تارتىبىندە – دوپينگپەن كۇرەس ماسەلەسى. سونداي-اق كونفەرەنتسيا بارىسىندا پولشانىڭ سپورت جانە تۋريزم ءمينيسترى ۆيتولد بانكا بۇكىلالەمدىك دوپينگكە قارسى اگەنتتىك ۇيىمىنىڭ (WADA) باسشىسى بولىپ تاعايىندالادى.