«مىڭ بالا» وڭىرلىك بايقاۋىنىڭ قورىتىندىسى ءوتتى

ماڭىزى جوعارى جوبانى ىسكە اسىرۋدا جىل باسىنان باستاپ وبلىس كولەمىندە ءتۇرلى فورماتتا ءىس-شارالار وتكىزىلدى. جازعى تىنىعۋ لاگەرلەرىندە ۇلتتىق جانە سپورتتىق ويىن تۇرلەرىنەن جارىستار, بايقاۋلار ۇيىمداستىرىلدى. جوباعا تارتىلعان 500-دەن اسا جاس قازاقستاندىق بىرەگەيلىك پەن بىرلىكتى نىعايتۋداعى مەملەكەتتىك ءتىلدىڭ ماڭىزدىلىعىن جەتە ءتۇسىندى.

بۇگىنگى «اسىل ءسوز» مەكتەبى» باعدارلاماسى اياسىنداعى وبلىستىق ء«تىل مەرەيى» بايقاۋىنا 8 وقۋشى قاتىسىپ, باق سىناستى. ءبىرىنشى كەزەڭدە وقۋشىلار وتان, ءتىل, پاتريوتيزم تاقىرىپتارىندا ەسسە جازدى. ەكىنشى كەزەڭدە قويىلىمدىق مانەرلەپ وقۋ سايىسىندا قاتىسۋشىلار قازاق اقىندارىنىڭ شىعارماسىنان ءۇزىندى وقىدى. ال ءۇشىنشى كەزەڭ «وراتورلىق ونەر» سايىسىندا وقۋشىلار بەرىلگەن تاقىرىپ بويىنشا سويلەۋ شەبەرلىگىن تانىتتى.

وڭىرلىك بايقاۋدا قازىلار قاتارىندا «قوعامدىق كەلىسىم» كمم اعا ساراپشىسى شاكيزات ابدرامانوۆا, قورقىت اتا اتىنداعى قمۋ-ءنىڭ اعا وقىتۋشىسى, ف.ع.ك ءاسيا الماۋىتوۆا, وبلىستىق ىشكى ساياسات باسقارماسى تىلدەردى وقىتۋ ورتالىعىنىڭ وقىتۋشىسى گاۋحار ايداروۆا  بولىپ, تورەلىك ەتتى.

بايقاۋ بارىسىندا قازىلار قاتىسۋشىلاردىڭ سويلەۋ مانەرىنە, ءماتىننىڭ بەينەلىك جۇيەسى مەن مازمۇندىق قۇرىلىمىنا, اكتەرلىك شەبەرلىگىنە, تاڭداپ الىنعان شىعارمانىڭ ەرەكشەلىگىنە ءمان بەردى. ءۇش كەزەڭنىڭ ناتيجەسى بويىنشا I دارەجەلى ديپلومدى قارماقشى اۋدانى III ينتەرناتسيونال اۋىلى №108 ورتا مەكتەبىنىڭ وقۋشىسى ومار لاتيفوۆ, II دارەجەلى ديپلومدى جاڭاقورعان اۋدانىنىڭ №56 ورتا مەكتەبىنىڭ وقۋشىسى ديانا كايۋمدجان, III دارەجەلى ديپلومدى قىزىلوردا قالاسى №198 ورتا مەكتەبىنىڭ وقۋشىسى ديلشات يسكاكوۆ قانجىعاسىنا بايلاپ, قازاقستان حالقى اسسامبلەياسى وبلىستىق فيليالى اتىنان باعالى سىيلىقتارمەن ماراپاتتالدى.

ەندىگى كەزەكتە قازىلار القاسىنىڭ شەشىمى بويىنشا ىرىكتەۋدەن وتكەن وقۋشىلار نۇر-سۇلتان قالاسىندا وتەتىن «مىڭ بالا» رەسپۋبليكالىق مادەني-اعارتۋشىلىق جوباسىنىڭ قورىتىندى شاراسىنا قاتىسادى دەپ كۇتىلۋدە.