ىشكى ىستەر ءمينيسترى ەرلان تۇرعىمباەۆ ءىىم باسشىلىق قۇرامىنا قىلمىستىق-اتقارۋ جۇيەسى كوميتەتى توراعاسىنىڭ ورىنباسارىن تانىستىردى. بۇل تۋرالى مينيسترلىكتىڭ ءباسپاسوز قىزمەتى حابارلادى.
پرەزيدەنت اكىمشىلىگىنىڭ كەلىسىمى بويىنشا ىشكى ىستەر مينيسترلىگى قىلمىستىق-اتقارۋ جۇيەسى كوميتەتى توراعاسىنىڭ ورىنباسارى لاۋازىمىنا ادىلەت پولكوۆنيگى ەسقالي سالاماتوۆ تاعايىندالدى.
ە. سالاماتوۆ 1971 جىلى دۇنيەگە كەلگەن, قۇقىق قورعاۋ ورگاندارىندا 1994 جىلدان باستاپ قىزمەت ەتەدى. باسشىلىق لاۋازىمداردا جۇمىس تاجىريبەسى مول.
ءار جىلدارى ىشكى ىستەر ورگاندارى, قىلمىستىق-اتقارۋ جۇيەسى بولىمشەلەرىندە, قازاقستان رەسپۋبليكاسى پرەزيدەنتى اكىمشىلىگىنىڭ قۇقىق قورعاۋ جۇيەسى بولىمىندە جۇمىس ىستەگەن.
ءىىم قىلمىستىق-اتقارۋ جۇيەسى كوميتەتىنىڭ ورىنباسارى, مقىسقا جانە سىبايلاس جەمقورلىققا قارسى قىزمەت دەپارتامەنتتەرىنىڭ باسشىسى لاۋازىمدارىن اتقاردى.
ءىىم باسشىسى اتاپ وتكەندەي, پەنيتەنتسيارلىق جۇيەنى جەتىلدىرۋ – ىشكى ىستەر ورگاندارىن جاڭعىرتۋ بويىنشا جول كارتاسى باعىتتارىنىڭ ءبىرى.
«بارلىق پروبلەمالار بىزگە بەلگىلى – بۇل ەسكى كولونيالاردىڭ جاعدايى, سوتتالعانداردى ۇستاۋ جاعدايلارى, بوساتىلعاننان كەيىن قايتا الەۋمەتتەندىرۋ, ولاردىڭ قۇقىقتارىن قامتاماسىز ەتۋ, ازاپتاۋ فاكتىلەرى, سىبايلاس جەمقورلىق جانە ت.ب. كوميتەت باسشىلىعىنىڭ الدىندا ماڭىزدى مىندەتتەر تۇر, ولاردى شەشۋ قىلمىستىق-اتقارۋ جۇيەسىن حالىقارالىق ستاندارتتارعا جاقىنداتادى جانە ازاماتتاردىڭ سەنىم دەڭگەيىن ارتتىرادى», - دەپ اتاپ ءوتتى ىشكى ىستەر ءمينيسترى ەرلان تۇرعىمباەۆ.