كەشە پرەزيدەنت جانىنداعى مەملەكەتتىك باسقارۋ اكادەمياسىندا قازاقستان حالقى اسسامبلەياسى ازياداعى ءوزارا سەنىم شارالارى كەڭەسى (اوسشك) ۇلتتىق-مادەني ورتالىقتارىنىڭ «اوسشك كەڭىستىگىندەگى ازاماتتىق قوعام: جاعدايى جانە دامۋ پەرسپەكتيۆالارى» اتتى ازاماتتىق فورۋمى ءوتتى.
جيىنعا قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ, سىرتقى ىستەر ءمينيسترىنىڭ ءبىرىنشى ورىنباسارى ەرجان اشىقباەۆ, اقپارات جانە قوعامدىق دامۋ ۆيتسە-ءمينيسترى دانيار ەسين, اوسشك حاتشىلىعى اتقارۋشى ديرەكتورىنىڭ وكىلى دارمەندرا سينگح, پارلامەنت دەپۋتاتتارى, اوسشك-گە مۇشە ەلدەر, ديپلوماتيالىق كورپۋس, مەملەكەتتىك ورگاندار جانە ەتنومادەني بىرلەستىكتەردىڭ وكىلدەرى, تانىمال قوعام قايراتكەرلەرى, وتاندىق جانە شەتەلدىك عالىمدار مەن ساراپشىلار قاتىستى.
فورۋم اياسىندا «قوعامدىق كەلىسىمدى نىعايتۋداعى ازاماتتىق قوعامنىڭ ءرولى. اوسشك ەلدەرىنىڭ تاجىريبەسى» پلەنارلىق وتىرىسى, «ازاماتتىق قوعامدى دامىتۋدىڭ كەلەشەگى» جانە «جاستار جانە ازاماتتىق قوعامداعى بايلانىس مەحانيزمدەرى» پانەلدى سەكتسيالارى, ازاماتتىق قوعام دامۋىنىڭ كونتسەپتسياسى جوباسىنىڭ تانىستىرىلىمى, اوسشك-گە مۇشە ەلدەردىڭ «ازياداعى سەنىم مەن ىنتىماقتاستىقتىڭ ۇلتتىق كورىنىسى» اتتى فوتوجۇمىستارىنىڭ كورمەسى ۇيىمداستىرىلدى.
بۇرىنعى پارلامەنت عيماراتىندا وتكەن شارانى اشقان جانسەيىت تۇيمەباەۆ ءبىر كەزدەرى ەلباسى نۇرسۇلتان نازارباەۆ بۇۇ باس اسسامبلەياسىنىڭ 47-ءشى سەسسياسىندا نەگىزىن قالاۋدى ۇسىنعان ازياداعى ءوزارا ءىس-قيمىل جانە سەنىم شارالارى كەڭەسىنىڭ قۇرىلعانىنا بيىل 27 جىل تولعانىن حابارلادى.
«بۇگىندە اوسشك قۇرامىنا 27 مەملەكەت, 8 باقىلاۋشى ەل جانە 5 حالىقارالىق ۇيىم كىرەدى. كەڭەس جۇمىس ىستەگەن جىلدارى ازيا قۇرلىعىندا سەنىم مەن ىنتىماقتاستىقتى ىلگەرىلەتۋدىڭ ماڭىزدى تەتىكتەرىنىڭ ءبىرى ەكەنىن تولىق دالەلدەدى.
اوسشك الاڭى – مۇشە مەملەكەتتەر ءۇشىن الەمدىك ساياساتتىڭ وزەكتى ماسەلەلەرىنىڭ بارلىق سپەكترى بويىنشا بىرىڭعاي تاسىلدەردى دەر كەزىندە ازىرلەۋ مۇمكىندىگى. حالىقارالىق قۇقىق پرينتسيپتەرى بۇكىل الەم بويىنشا ايتارلىقتاي ەروزياعا ۇشىراسا دا, ازيا تارتىپكە, زاڭدىلىق پەن سەنىمگە ۇمتىلۋدىڭ ايرىقشا ۇلگىسىن كورسەتەدى.
اوسشك جۇمىسىنىڭ پراكتيكالىق ناتيجەلەرى 2002 جىلعى ماۋسىمدا الماتى قالاسىندا وتكەن كەڭەسكە مۇشە مەملەكەتتەر باسشىلارىنىڭ ءبىرىنشى سامميتىندە كورىنىس تاپتى. سول كەزدە ءۇندىستان مەن پاكىستان اوسشك الاڭدارىندا بەيبىتشىلىكتى ساقتاۋ جونىندەگى كۇردەلى ديالوگقا قايتا ورالا الدى. سيريا ماسەلەلەرى بويىنشا وتكەن استانا پروتسەسى, يراننىڭ يادرولىق باعدارلاماسىن تالقىلاۋ, رەسەي-تۇركيا قاتىناستارىن قالىپقا كەلتىرۋگە ۇلەس قوسۋ – بارلىعى اوسشك-ءنىڭ ماڭىزدىلىعى مەن بىرەگەيلىگىن كورسەتەدى», دەدى جانسەيىت تۇيمەباەۆ.
ودان كەيىن اتالعان كەڭەستىڭ حالىقارالىق ماسەلەلەردى شەشۋگە, كوپۆەكتورلى ساياساتتى ناسيحاتتاۋعا قوسقان ۇلەسى تۋرالى كورەيانىڭ قازاقستانداعى توتەنشە جانە وكىلەتتى ەلشىسى كيم دەسيك, پاكىستان يسلام رەسپۋبليكاسىنىڭ قازاقستانداعى ەلشىسى يمتياز احماد كازي, قىرعىز رەسپۋبليكاسىنىڭ قازاقستانداعى ەلشىسى جەەنبەك كۋلۋباەۆ, تاجىكستاننىڭ قازاقستانداعى ەلشىسى حايرۋللو يبودزودا بايانداما جاسادى. ال پلەنارلىق وتىرىستان كەيىن قاتىسۋشىلار «ازاماتتىق قوعامدى دامىتۋ مۇمكىندىكتەرى», «ازاماتتىق قوعام جاستارى مەن بايلانىس مەحانيزمدەرى» تاقىرىبىندا وي قوزعاپ, پىكىرلەرىمەن ءبولىستى.