«ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ – بارىمىزگە ورتاق مىندەت». حالىققا جولداۋىندا وسىلاي دەگەن مەملەكەت باسشىسى قاسىم-جومارت توقاەۆ بۇل ۇكىمەت پەن حالىق اراسىنداعى ديالوگتى قامتاماسىز ەتۋدى كوزدەيتىنىن باسا ايتقان بولاتىن. تۇجىرىمدامانىڭ ىسكە اسۋى ءۇشىن مينيسترلەر دە اتقا قونعان-دى. اسىرەسە حالىقتىڭ ءال-اۋقاتىن ارتتىرۋ ماڭىزدى ماقسات ەكەنى انىق.
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ شىعىس قازاقستان, اتىراۋ, تۇركىستان, باتىس قازاقستان جانە قاراعاندى وبلىستارى مەن الماتى, شىمكەنت شاھارلارىن ارالاپ, حالىقتىڭ كوكەيىندەگى سۇراقتارعا جاۋاپ بەردى. اتالعان جۇمىس اپتا باسىندا ەلوردادا جالعاسىن تاپتى. Nur Otan پارتياسىنىڭ قوعامدىق قابىلداۋ بولمەسىندە 5 ساعاتتان اسا ۋاقىت ازاماتتاردى جەكە قابىلداعان مينيستر ولاردىڭ جاردەماقى, باسپانا, تەگىن ءدارى-دارمەك الۋ, مۇگەدەك بالاعا كۇتىم جاساۋشى انالاردىڭ زەينەت جاسىن قىسقارتۋ, شيپاجاي مەن وڭالتۋ ورتالىقتارىندا ەم-دوم الۋ, ااك-پەن العان جاردەماقىلارىن كەرى قايتارىپ الۋمەن كەلىسپەۋشىلىك سياقتى وتىنىشتەرىن قارادى.
مىسالى, 19 جاستاعى تۋعاننان مۇگەدەك بالاسى بار روزا ابدۋللينا شاعىن نەسيە الىپ, كاسىپپەن اينالىسىپ, تۇرمىسىن تۇزەگىسى كەلەتىنىن باياندادى. قىسقا ءجىپ كۇرمەۋگە كەلسىن بە؟! پاتەر يەلەرىنىڭ كووپەراتيۆىندە (كسك) 60 مىڭ تەڭگە الىپ اۋلا تازالايتىن 54 جاستاعى ايەل استاناعا كەلگەن 8 جىلدان بەرى پاتەر جالداپ تۇرادى ەكەن. پاتەراقىسىن تولەي الماي قينالعان كەزدە نەسيە الۋعا دا ءماجبۇر بولعان. اكىمدىككە ءۇي كەزەگىندە تۇرعان جالعىز باستى انا ءبىر كۇن بۇرىن كەزەگىنىڭ جوعالىپ كەتكەنىنە اڭ-تاڭ. II توپتاعى مۇگەدەكتى اسىراپ وتىرعان ايەلدىڭ ءوتىنىشىن تىڭداعان مينيستر وعان شاعىن نەسيە بەرۋ جاعىن قاراستىرۋدى نەمەسە جالاقىسى جوعارى جۇمىسقا ورنالاستىرۋدى نۇر-سۇلتان قالاسىنىڭ حالىقتى جۇمىسپەن قامتۋ ورتالىعى ديرەكتورىنىڭ ورىنباسارى نۇرلان يسەكەەۆكە تاپسىردى. سونداي-اق پاتەر كەزەگىنەن ءتۇسىپ قالۋىنىڭ سەبەبىن ءبىلۋ ءۇشىن قالا اكىمىنە حات جازىپ, تىكەلەي ءوزى باقىلاۋعا الاتىنىن ايتتى.
ء مينيستردىڭ الدىنا ارنايى ۇسىنىسپەن كەلگەندەر دە بولدى. «Miras-A» قايىرىمدىلىق قورىنىڭ پرەزيدەنتى ءجۇزباي سەرىك نۇر-سۇلتان قالاسىندا ارنايى زاعيپتار ءۇيىن سالعىسى كەلەدى. ءوز جوباسىن مينيسترگە تانىستىرعان ول ەلىمىزدەگى زاعيپ جانداردىڭ تاپ بولىپ وتىرعان قيىندىقتارى تۋرالى باياندادى. ء«وزىم I توپتاعى مۇگەدەك بولعاننان كەيىن مۇنداي جانداردىڭ جاعدايىنا باسا ءمان بەرەمىن. كوز جانارىنان ايىرىلعان ادامداردىڭ قيىندىققا توزە الماي, كەيدە ءوز-وزىنە قول جۇمساپ جاتاتىن كەزدەرى دە بولادى. ولاردى سابىرعا شاقىرىپ, «كوزىمدە كىشكەنە ساڭىلاۋ اشىلسا, زاعيپتار ءۇيىن سالۋعا ارەكەت جاسايمىن» دەپ ۋادە بەردىم. سول ارەكەتىمىزدىڭ وڭىنان شەشىلگەلى تۇرعان جايى بار. ماقساتىمىز – جەر الىپ, عيمارات سالۋ. قازاقستاننىڭ جەر-جەرىندە كوز جانارىنان ايىرىلىپ, جالعىز قالعان جاندار سول جەردە تۇرسا دەيمىن», دەيدى ج.سەرىك.
مۇنداي ءىستى باستاپ وتىرعان بەلسەندى ازاماتقا العىسىن ءبىلدىرىپ, جوبانى قولدايتىنىن جەتكىزگەن ءبىرجان نۇرىمبەتوۆ ەلىمىزدە زاعيپ جاندار جولىعاتىن كەدەرگىلەردىڭ از ەمەس ەكەنىن ايتتى. «ەلىمىزدە مۇمكىندىگى شەكتەۋلى جاندارعا ءبىرشاما جاعداي جاسالىپ جاتىر. جاردەماقى تولەنىپ, باسقا دا جەڭىلدىكتەر قولعا الىنۋدا. مىسالى, جەتى باعىتتان تۇراتىن 2025 جىلعا دەيىنگى ۇلتتىق جوسپاردىڭ قابىلدانعانىن بىلەسىزدەر. ەڭ باستىسى, مۇمكىندىگى شەكتەۋلى جاندارعا قولجەتىمدى ورتانى قالىپتاستىرۋ كەرەك. قازىر ءبىز ءبىر مۇمكىندىگى شەكتەۋلى جانعا جۇمىس تاۋىپ بەرىپ جاتساق, عيماراتقا كىرەتىن جاعداي قاراستىرىلماعان بولىپ جاتادى. بۇل جەردە جۇمىس بەرۋشىنىڭ دە جاۋاپكەرشىلىگى بار», دەدى ول.
ءمينيستردىڭ ايتۋىنشا, وسىعان دەيىن الەۋمەتتىك سالا قىزمەتكەرلەرى مۇگەدەك جانداردىڭ كەز كەلگەن عيماراتقا وڭاي كىرۋىنە تەكسەرۋ جۇرگىزىپ, ناتيجەسىندە ءبىرشاما جۇمىس بەرۋشىگە ايىپپۇل سالىنعان. «ايتسە دە, ماسەلە ايىپپۇل سالۋمەن شەشىلمەيدى. ەڭ الدىمەن, قوعامنىڭ پىكىرىن وزگەرتۋ كەرەك. كەز كەلگەن قۇرىلىستى باستاعان كەزدە اربادا وتىرعان, زاعيپ جانداردىڭ بارى ەسكەرىلۋى ءتيىس. باعدارشام مەن جاياۋ جۇرگىنشىلەر جولىندا دا ولارعا ءتيىستى جاعداي جاسالۋى قاجەت. جوسپارعا سايكەس, سونىڭ ءبارىن رەتكە كەلتىرۋ ماسەلەسى بويىنشا جۇمىس جۇرگىزەمىز. 2019 جىلعا وسى باعىتتا 18 ملرد تەڭگە قاراجات ءبولىندى. سوندىقتان بۇل پروبلەمانىڭ بارىن بىلەمىن», دەدى ب.نۇرىمبەتوۆ.
قابىلداۋدا وڭىردەگى ازاماتتار بەينەبايلانىس ارقىلى تىلدەسۋگە مۇمكىندىك الدى. اقتاۋ قالاسىنان بايلانىسقا شىققان ايگۇل نۇرقۋاتقىزى جەرگىلىكتى ورگاننىڭ وزىنە ااك بەرۋدەن باس تارتۋ تۋرالى شەشىمىمەن كەلىسپەيتىنىن جەتكىزدى. 5 بالانى جالعىز اسىراپ وتىرعان انا ۇلكەن ۇلىنىڭ وقۋعا ءتۇسىپ, باسقا قالادا تۇرىپ جاتقانىن, وسىعان بايلانىستى ونىڭ وتباسىنا بەرىلىپ كەلگەن ااك توقتاتىلعانىن باياندادى. بۇل شەشىمنىڭ دۇرىس ەمەستىگىن كەسىپ ايتقان مينيستر جەرگىلىكتى جاۋاپتى قىزمەتكەرلەرگە ا.نۇرقۋاتقىزىنىڭ وتباسىنا بەرىلىپ كەلگەن ااك-ءتى قالپىنا كەلتىرىلۋى كەرەك ەكەنىن تاپسىردى. سەبەبى بالالارىنىڭ بىرەۋى وزگە قالادا تۇرىپ جاتقانىمەن, ول ستۋدەنت, ەشقانداي تابىس تاۋىپ جاتقان جوق.
سونداي-اق مينيستر ماجىلىسكە جاڭا زاڭ جوباسىنىڭ ۇسىنىلعانىن جانە جاڭا جىلدان باستاپ ااك تولەۋ جۇيەسى رەتكە كەلتىرىلەتىنىن تاعى ءبىر رەت اتاپ ءوتتى. قابىلداۋدا بولعان بارلىق تۇرعىننىڭ وتىنىشتەرى مەن تالاپ-تىلەكتەرى بويىنشا ەڭبەك جانە حالىقتى الەۋمەتتىك قورعاۋ ءمينيسترى ءوز وكىلەتتىلىگى شەگىندە ءتيىستى قۇزىرلى مەكەمەلەر مەن قىزمەتكەرلەرگە تاپسىرمالار بەردى جانە بارلىق وتىنىشتەردىڭ ءوزىنىڭ باقىلاۋىندا بولاتىنىن ايتتى.