ەلوردادا ەڭبەك جانە حالىقتى الەۋمەتتىك قورعاۋ مينيسترلىگى مەن مەملەكەتتىك الەۋمەتتىك ساقتاندىرۋ قورى «حالىقتى الەۋمەتتىك قورعاۋدى جاڭعىرتۋ جاعدايىنداعى مىندەتتى الەۋمەتتىك ساقتاندىرۋ» اتتى رەسپۋبليكالىق سەمينار وتكىزدى.
وعان قازاقستاندىق ساراپشىلار مەن الەۋمەتتىك قىزمەتكەرلەر, رەسەي, گرۋزيا, ازەربايجان, قىرعىزستان جانە تاجىكستان ەلدەرىنىڭ اتالعان سالا ماماندارى قاتىستى. سونداي-اق پرەزيدەنت اكىمشىلىگىنىڭ وكىلدەرى, پارلامەنت دەپۋتاتتارى, بىرىڭعاي جيناقتاۋشى زەينەتاقى قورى, الەۋمەتتىك مەديتسينالىق ساقتاندىرۋ قورى مەن مەملەكەتتىك اننۋيتەتتىك كومپانيانىڭ جانە استانا حالىقارالىق قارجى ورتالىعىنىڭ وكىلدەرى ارنايى ات باسىن بۇردى.
– بۇل ديالوگ الاڭى ساراپشىلارعا الەۋمەتتىك قاۋىپسىزدىككە قاتىستى وزەكتى ماسەلەلەردى تالقىلاۋعا مۇمكىندىك بەرەدى. سوندىقتان سەميناردىڭ باستى ماقساتى – حالىقتى الەۋمەتتىك قورعاۋ سالاسىندا تالعامدى تاجىريبە الماسۋ دەپ سانايمىن. وزەكتى تاقىرىپتار توڭىرەگىندە جاسالعان باياندامالار ەلىمىزدەگى الەۋمەتتىك قامسىزداندىرۋ ينستيتۋتتارىنىڭ تاجىريبەسىنە سەرپىن بەرەدى دەپ سەنەمىن, – دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اقمادي سارباسوۆ.
پرەزيدەنت قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىنداعى ماڭىزدى باعىتتاردىڭ ءبىرى دە وسى الەۋمەتتىك جاڭعىرۋدىڭ جاڭا كەزەڭى. ياعني جاڭعىرۋدىڭ جاڭا كەزەڭى جاڭا باستامالار مەن تىڭ باعىتتاردى مۇرات ەتپەك. بۇل رەتتە, سەمينار جۇمىسىنان كۇتىلەتىن ناتيجەلەر تۋراسىندا مەملەكەتتىك الەۋمەتتىك ساقتاندىرۋ قورىنىڭ الەۋمەتپەن قارىم-قاتىناس دەپارتامەنتىنىڭ ديرەكتورى گۇلباعيلا بولاتبەكوۆا:
– ەلىمىزدە 2011 جىلدان باستاپ قازاننىڭ سوڭعى دەمالىسى الەۋمەتتىك سالا قىزمەتكەرلەرىنىڭ كاسىبي مەرەكەسى رەتىندە بەكىتىلگەن. سوندىقتان بۇل سەميناردىڭ قاراشانىڭ باسىندا ۇيىمداستىرىلۋى زاڭدى. جالپى جاھاندانۋ داۋىرىندە الەۋمەتتىك سالانىڭ الار ورنى ايشىقتى دەر ەدىم. سەبەبى حالىقتىڭ ءال-اۋقاتىن جاقسارتۋ ماسەلەسى قاي مەملەكەتتىڭ بولسىن كۇن تارتىبىنەن تۇسكەن ەمەس. سول سەبەپتى بۇگىنگى سەميناردا پىكىرتالاس, تاجىريبە الماسۋ ارقىلى مىندەتتى الەۋمەتتىك ساقتاندىرۋدى دامىتۋ جولدارىن جان-جاقتى تالقىلايتىن بولامىز. شەت مەملەكەتتەردەن كەلگەن ساراپشىلار قازاقستانداعى الەۋمەتتىك سالاعا زور قىزىعۋشىلىق تانىتىپ وتىر, – دەدى.
كەڭەس وداعى ىدىراعان تۇستا تاۋەلسىز ەلىمىز ءوزىنىڭ دارا الەۋمەتتىك سالاسىن قالىپتاستىردى. سونداعى دارالىق – كوپدەڭگەيلىكتە. ياعني مەملەكەت, جۇمىس بەرۋشى جانە جۇمىسكەر اراسىنداعى جەكەلەگەن جاۋاپكەرشىلىك ايقىندالدى. وتاندىق الەۋمەتتىك سالانىڭ وزىق ۇلگىسى تۋراسىندا حالىقارالىق الەۋمەتتىك قامسىزداندىرۋ قاۋىمداستىعىنىڭ ەۋرازيا ايماعىنداعى ۇيلەستىرۋشىسى دميتري كاراسەۆ:
– بۇگىندە قازاقستان حالىقارالىق قاۋىمداستىقتا زور بەدەلگە يە. بۇعان سەبەپ – الەۋمەتتىك ساقتاندىرۋ جۇيەسىنىڭ تۇراقتى جولعا قويىلعاندىعى دەر ەدىم. سەبەبى كەي مەملەكەتتەردە الەۋمەتتىك ساقتاندىرۋ تۇرعىندار سانىنىڭ نەبارى 10-20%-ىن قامتىعان. ال سىزدەردىڭ ەلدەرىڭىزدە الەۋمەتتىك ساقتاندىرۋ سالاسى ماماندارىنىڭ نازارىنان تىس قالعان ازاماتتار كەمدە-كەم. بۇل – ۇلكەن جەتىستىك, – دەدى.
سەمينار جۇمىسى اياسىندا ۇيىمداستىرىلعان ەكى پانەلدى سەسسيانىڭ العاشقىسى الەۋمەتتىك ساقتاندىرۋدى دامىتۋ تاسىلدەرىن ەنگىزۋگە نەگىزدەلسە, كەيىنگىسىندە قاتىسۋشىلار اتالعان سالانىڭ قارجىلىق اعىمىن شوعىرلاندىرۋ ماسەلەسىنە توقتالدى. شەت مەملەكەتتەردەن كەلگەن قوناقتار تاجىريبەسىمەن ءبولىسىپ, ورتاعا ورامدى وي تاستادى.
راۋان قابيدولدا