قازاقستاندا ەكستراكورپورالدىق ۇرىقتاندىرۋدىڭ بيۋدجەتتىك باعدارلاماسى 2010 جىلى ەنگىزىلگەن. سودان بەرى ەلىمىزدە مەملەكەت جاردەمىنە سۇيەنگەن اتا-انالار بۇل ءتاسىل ارقىلى 2 مىڭ 700-دەن استام ءسابيدى دۇنيەگە اكەلدى. بۇل جايلى الماتىدا وتكەن «بەدەۋلىكتى ەمدەۋدىڭ زاماناۋي تاسىلدەرى. قرت: بۇگىنى مەن بولاشاعى» اتتى حالىقارالىق عىلىمي-تاجىريبەلىك كونفەرەنتسيادا دەنساۋلىق ساقتاۋ ءمينيسترى ەلجان ءبىرتانوۆ ايتتى.
18 مەملەكەتتىڭ عالىمداردى قاتىسقان باسقوسۋدا مينيستر مەملەكەت 2010 جىلدان باستاپ ەكۇ باعدارلاماسىن تەگىن مەديتسينالىق كومەكتىك كەپىلدىك بەرىلگەن كولەمىنە ەنگىزىلگەنىن, ءسويتىپ سوڭعى سەگىز جىلدا مەملەكەت ەكۇ تسيكلدەرىنىڭ سانىن 9 ەسەگە وسىرگەنىن ايتتى. بۇرىن جىلىنا 100 ەكۇ مەملەكەت ەسەبىنەن جۇرگىزىلسە, بۇگىندە ونىڭ مولشەرى 900-گە جەتىپتى. ماسەلەن, 2010 جىلى 100 ەكۇ تسيكلى, 2011 جىلى 350, 2012-2014 جىلدارى 600, 2015 جىلى 820, 2016 جىلى 816 تسيكل جاسالعان. 2017 جىلدان بەرى جىل سايىن 900 ەكۇ تسيكلىن مەملەكەت قارجىلاندىرىپ كەلەدى. «بەدەۋلىككە شالدىققان قازاقستاندىق وتباسىلاردى مەملەكەتتىك قولداۋ ماقساتىندا زاماناۋي قوسالقى رەپرودۋكتيۆتى تەحنولوگيا ارقىلى 5,5 مىڭنان استام پروتسەدۋرا جاسالدى. تەك 2010-2018 جىلدارى قازاقستاندا بيۋدجەتتىك باعدارلامانىڭ ارقاسىندا 2700-دەن استام بالا دۇنيەگە كەلدى», دەدى مينيستر ە. ءبىرتانوۆ.
بۇگىندە ەلىمىزدە ەكۇ باعدارلاماسى بويىنشا ۇلكەن تاجىريبەسى بار 1 مەملەكەتتىك جانە 5 جەكەمەنشىك كلينيكا جۇمىس ىستەۋدە. ەلىمىزدە ەكۇ كومەگىمەن العاشقى بالا 1996 جىلى دۇنيەگە كەلدى.