جىلۋ بەرۋ ماۋسىمى باستالعانىنا كوپ ۋاقىت وتپەي وبلىستا ەكى ادامنىڭ ءيىس ءتيىپ ۋلانعان وقيعاسى ورىن الدى. 83 مارتە ءورت وقيعاسى بولىپ, تۇرعىندار 2,5 ميلليون تەڭگە زيان شەكتى.
مامانداردىڭ ايتۋىنا قاراعاندا, ءتىلسىز جاۋدىڭ قۇرباندارىنىڭ سانى وتكەن جىلدارمەن سالىستىرعاندا ءبىرشاما ازايعان. ايتسە دە, قاۋىپتىڭ الدىن الىپ, ساق بولعان ءلازىم. تاياۋدا دەپارتامەنت قىزمەتكەرلەرى ارنايى رەيد جۇرگىزىپ, جەر ۇيلەردە تۇراتىن تۇرعىنداردىڭ شاڭىراقتارىنا ۋلى گازدان قورعايتىن ارنايى قوندىرعىلار ورناتتى.
توتەنشە جاعدايلار جونىندەگى دەپارتامەنتىنىڭ ماماندارى زاستانتسيوننىي ەلدى مەكەنىندەگى الەۋمەتتىڭ جاعىنان از قامتاماسىز ەتىلگەن جانە كوپبالالى وتباسىلارعا باردى. ولاردىڭ كوبى قاۋىپسىزدىك ەرەجەلەرىن مۇقيات ساقتاي المايدى. وعان تۇرمىستىق تاۋقىمەت سەبەپ. كەيدە سالعىرتتىق تا ورىن الادى. دەپارتامەنت ماماندارى ساقتىق شارالارى جونىندە ءتۇسىندىرىپ ايتىپ, ارنايى قوندىرعىلار ورناتىپ بەردى. ۇيدەن كۇيىك نەمەسە ءتۇتىن ءيىسى شىعا قالسا, قوندىرعى بىردەن دابىل قاعادى.
–بيىلعى جىلۋ بەرۋ ماۋسىمى باستالعالى كوكشەتاۋ قالاسىندا 280-نەن استام ۇيگە وسىنداي قوندىرعى ورناتتىق. وبلىس بويىنشا 800-گە جەتكىزدىك. وسى باعىتتاعى جۇمىستار ءالى دە جالعاسۋدا,– دەيدى اقمولا وبلىسى توتەنشە جاعدايلار جونىندەگى دەپارتامەنتىنىڭ باسقارما باستىعى دەنيس شەلكوپلياسوۆ.
قاۋىپسىزدىك شارالارى ءالى دە جالعاساتىن بولادى. جاراتقاننىڭ ءوزى «ساقتانساڭ, ساقتايمىن» دەگەن.
كوكشەتاۋ قالاسى