مادەنيەت جانە سپورت ءمينيسترى اقتوتى رايىمقۇلوۆا تۇركىستان وبلىسىنىڭ مادەنيەت سالاسى قىزمەتكەرلەرىمەن كەزدەستى. بۇل تۋرالى «ازىرەت سۇلتان» مەملەكەتتىك تاريحي-مادەني قورىق مۋزەيىنىڭ ءباسپاسوز قىزمەتى حابارلادى.
مەملەكەت باسشىسى قاسىم-جومارت توقاەۆتىڭ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا ارناعان جولداۋىن ىسكە اسىرۋ جونىندە مينيسترلىك تاراپىنان قولعا الىنعان شارالار تۋرالى بايانداعان اقتوتى راحمەتوللاقىزى مادەنيەت سالاسى قىزمەتكەرلەرىنىڭ جالاقىسىن كوتەرۋ, بۇقارالىق سپورتتى دامىتۋ, تۋريزم سالاسىن جانداندىرۋ, شەتەلدەن كەلەتىن تۋريستەردىڭ قازاقستانعا ۆيزاسىز كىرۋ ماسەلەلەرىنە توقتالدى.
- مادەنيەت سالاسىنا تىكەلەي قاتىسى بار ادام رەتىندە, جالاقىنى ارتتىرۋ ماسەلەسىنىڭ شەشىلۋىن قانشالىقتى كۇتكەنىمىزدى تۇسىنەمىن. بۇدان باسقا, الەۋمەتتىك جەڭىلدىكتەر ماسەلەسى پىسىقتالۋدا. مادەنيەت جانە سپورت مينيسترلىگى مەموراندۋمدار ازىرلەپ, اكىمدىكتەرگە جىبەردى, ولاردى ورىنداۋ ءۇشىن الەۋمەتتىك قولداۋ شارالارىن, ونىڭ ىشىندە مادەنيەت جانە ونەر قىزمەتكەرلەرىنىڭ تۇرعىن ءۇي جاعدايىن جاقسارتۋدى قامتيتىن سالالىق جوسپارلار بەكىتىلەتىن بولادى,- دەدى مينيستر.
سونداي-اق ەلىمىزدەگى ءتۋريزمدى ودان ءارى دامىتۋ ءۇشىن تۇركىستان وبلىسىندا قولعا الىنعان جوبالار جايلى دا ءسوز بولدى.
- بولاشاق تۋريستىك ايماق بولاتىن تاعى دا ءبىر وبلىس – ول تۇركىستان وبلىسى, بۇل – تۇركى حالىقتارىنىڭ تاريحي جانە رۋحاني ورتالىعى. مەملەكەت باسشىسىنىڭ تاپسىرماسى بويىنشا ورتاعاسىرلىق تۇركىستان قالاشىعىن قالپىنا كەلتىرۋ جونىندە بەلسەندى تۇردە جۇمىستار جالعاسۋدا. قايتا قۇرۋ ناتيجەسىندە كەلۋشىلەر مەن تۋريستەر سانى بىرنەشە ونداعان ميلليونعا دەيىن ارتادى, ال ولاردىڭ كەلۋ ۋاقىتى بىرنەشە ساعاتتان بىرنەشە كۇنگە دەيىن ارتادى دەپ كۇتىلۋدە, بۇل وبلىس ەكونوميكاسىنا قوماقتى قارجى قۇيۋدى قامتاماسىز ەتەدى. سونداي-اق «وتىرار» قالاشىعىن ءىرى تۋريستىك جوبا رەتىندە قالپىنا كەلتىرۋ جوباسىنىڭ تۇجىرىمداماسى ازىرلەندى. سونىمەن قوسا, جىل سوڭىنا دەيىن «وتىرار» ۆيزيت-ورتالىعى اشىلادى. ال كەلەسى جىلى «ازىرەت سۇلتان» مەملەكەتتىك تاريحي-مادەني قورىق-مۋزەيىنە قاراستى گاۋھار انا كەسەنەسى مەن ورتاعاسىرلىق ساۋران قالاشىعىندا ساپار ورتالىعى بوي كوتەرەدى,- دەدى اقتوتى راحمەتوللاقىزى.
جيىنعا قاتىسقان مادەنيەت سالاسى قىزمەتكەرلەرى دە ۇسىنىس-پىكىرلەرىمەن ءبولىستى.