بۋداپەشتە ءوتىپ جاتقان 23 جاستاعى بالۋاندار اراسىنداعى الەم چەمپيوناتىندا (U-23) قازاقستاننىڭ ەركىن كۇرەس شەبەرلەرى ەكىنشى جۇلدەگە قول جەتكىزدى.
125 كيلو سالماق دارەجەسىندە كۇش سىناسقان يۋسۋپ باتىرمۇرزاەۆ العاشقى اينالىمدا جاپونيالىق تايكي ياموموتودان (8:2) باسىم ءتۇسىپ, كەلەسى كەزدەسۋدە يراندىق ابباس زارەدەن (7:17) ۇتىلدى. پارسى بالۋانى فينالعا شىققاننان كەيىن جەرلەسىمىز جۇبانىش باسەكەسىنە قاتىستى. بۇل باسەكەدە ول مولدوۆالىق سامحان جابىرايلوۆتى (14:4) ايقىن باسىمدىقپەن ۇتىپ, ءۇشىنشى ورىن ءۇشىن تالاسۋ مۇمكىندىگىنە يە بولدى. شەشۋشى سىندا گرۋزيالىق تسۋريكو ءۋرتاشۆيليدىڭ (13:2) تاس-تالقانىن شىعارعان باتىرمۇرزاەۆ قولا مەدالدى ولجالادى.
ەستەرىڭىزگە سالا كەتەيىك, وسىعان دەيىن ايتۋلى جارىستا 57 كيلو سالماق دارەجەسىندە بەلدەسكەن قازاقستاندىق جاس ورەن ادلان اسقاروۆ الەم چەمپيوناتىنىڭ كۇمىس مەدالىن ەنشىلەگەن بولاتىن. باستاپقى باسەكەلەردىڭ بارلىعىن جەڭىسپەن اياقتاعان ول جارتىلاي فينالدا يراندىق اليرەزا سارداكتى ءسۇرىندىردى. اقتىق ايقاستا وتانداسىمىز بوستاندىق ارالىنىڭ وكىلى رەينەري ەندريۋ ورتەگامەن كۇش سىناستى. شەشۋشى باسەكە كۋبالىق بالۋاننىڭ پايداسىنا شەشىلىپ, ءبىزدىڭ ادلان وسى جارىستىڭ كۇمىس جۇلدەگەرى اتاندى.
بۇگىن ايەلدەر كۇرەسىنەن بەلدەسۋلەر جالعاسادى. ءبىزدىڭ قىزدار اراسىنان 55 كيلو سالماقتاعى مارينا سەدنەۆا قولا مەدال ءۇشىن تالاسادى. سونداي-اق بۇرىمدىلاردىڭ 53, 57, 62, 65 جانە 72 كيلو سالماق دارەجەلەرىندەگى باسەكەلەرى باستالادى.