كاسىپقوي بوكستان اسا اۋىر سالماقتاعى الەمنىڭ ەكس-چەمپيونى, قازاقستاننىڭ تۋماسى ولەگ ماسكاەۆ ۇلكەن سپورتپەن قوش ايتىساتىنىن رەسمي تۇردە مالىمدەدى.
بيىلعى جىلدىڭ كوكتەمىندە 50 جاسقا تولعان ولەگ الەكساندر ۇلى ءوزىنىڭ سوڭعى جەكپە-جەگىن وسىدان التى جىل بۇرىن وتكىزدى. الايدا ول كەزدە ونىڭ وسىنداي قادامعا باراتىنى جايىندا ويى جوق ەدى. ايتۋلى سپورتشى ءالى دە جۇدىرىقتاسقىسى كەلدى. الايدا بەلدى پروموۋتەرلىك كومپانيالار مەن بەلدى مەنەدجەرلەردەن كوڭىلىنەن شىعاتىنداي ۇسىنىس تۇسپەدى. وسىلايشا, ماسكاەۆ ءتۇرلى كاسىپتىڭ باسىن شالىپ, «ەرتەڭ نەمەسە بۇرسىگىنى بازبىرەۋلەر شاقىرىپ قالار» دەگەن ءۇمىتتىڭ جەتەگىندە ءجۇردى. بىراق ەشكىمنەن ەشقانداي ۇسىنىس بولمادى. سودان ولەگ كۇنى كەشە بىلعارى قولعابىن شەگەگە ىلەتىنىن رەسمي تۇردە جاريا ەتتى.
ولەگ ماسكاەۆ قاراعاندى وبلىسىنىڭ اباي قالاسىندا تۋىپ-ءوستى. اۋەسقويلار اراسىندا ەلەۋلى تابىستارعا قول جەتكىزدى. توقسانىنشى جىلداردىڭ باسىندا وزبەكستاننىڭ ازاماتتىعىن الىپ, ازيا ويىندارىنىڭ جەڭىمپازى جانە الەم كۋبوگىنىڭ يەگەرى اتاندى. كوپ ۇزاماي كاسىپقوي رينگتە كۇش سىناسۋعا بەل بۋدى. ءوزىنىڭ تۇساۋكەسەر كەزدەسۋىندە ولەگ قازاقستاندىق الەكساندر ميروشنيچەنكونى نوكاتپەن ۇتتى. كەيىننەن تاعى ءبىر وتانداسىمىز نيكولاي كۋلپيندى دە جەڭگەنى ەسىمىزدە. سول ارالىقتا رەسەي ازاماتتىعىن الىپ تا ۇلگەردى.
كاسىپقوي رينگتە بارلىعى 46 كەزدەسۋ وتكىزگەن ماسكاەۆ 39 مارتە جەڭىس تويىن تويلاپ, 28 قارسىلاسىن ەسىنەن تاندىردى. ايتۋلى بوكسشى كەزىندە الەكس ستيۋارت, حاسيم راحمان, دەۆيد دەفياگبون, سينان ءشامىل سان, دەنني ۋيليامس سىندى ساڭلاقتارعا سان سوقتىردى. 2006-2008 جىلدار ارالىعىندا WBC نۇسقاسى بويىنشا الەم چەمپيونى اتاندى. اۋەسقوي رينگتە ماسكاەۆ داڭقتى ۆيتالي كليچكونىڭ ءوزىن ايقىن باسىمدىقپەن جەڭگەنى دە جانكۇيەرلەردىڭ جادىندا.