وتكەن اپتانىڭ سوڭىندا ءباا-ءنىڭ استاناسى – ءابۋ-دابيدەگى گراند-سلەم ءتۋرنيرى اياقتالعان بەتتە دزيۋدوشىلاردىڭ الەمدىك رەيتينگى قايتا جاڭارتىلدى. قازاقستاندىق جانكۇيەرلەر ءۇشىن ەڭ قۋانىشتى جايت – اسا جەڭىل سالماقتا كۇش سىناسىپ جۇرگەن ەلدوس سمەتوۆتىڭ ەكىنشى ورىنعا كوتەرىلۋى. بۇل – بۇگىنگى تاڭدا ءبىزدىڭ بالۋاندار اراسىنداعى ەڭ ۇزدىك كورسەتكىش.
ءيا, پارسى شىعاناعىندا وتكەن ءدۇبىرلى دودادا ەلىمىزدىڭ ماقتانىشى – ە.سمەتوۆتىڭ جەڭىس تۇعىرىنا كوتەرىلە الماعانى راس. ايتۋلى جارىستا ءۇش قارسىلاسىن قاپى قالدىرعان ول ەكەۋىنە ەسە جىبەردى. ناتيجەسىندە, بەسىنشى ورىنعا تابان تىرەدى. ال الەم چەمپيوناتىنان بولەك, ماستەرس, گراند-سلەم, گران-پري جانە سول سەكىلدى باسقا دا ماڭىزدى تۋرنيرلەردەگى ءار جەڭىسى ءۇشىن بالۋانداردىڭ ۇپايى ەسەلەنە تۇسەتىنىن ەسكەرسەك, قانداسىمىزدىڭ دا قورجىنىنا ءبىراز ۇپاي ءتۇستى. قازىرگى كەزدە 5481 ۇپاي ەنشىلەگەن ەلدوس 60 كيلو سالماق دارەجەسىندە بەلدەسىپ جۇرگەن بالۋاندار اراسىندا ەكىنشى ورىنعا كوتەرىلدى. كوش باستاپ تۇرعان جاپونيالىق ريۋدزيۋ ناگايامادان ونىڭ نەبارى 19 ۇپايى عانا كەم. ەگەر الداعى ۋاقىتتا وتەتىن ليتسەنزيالىق تۋرنيرلەردە ە.سمەتوۆ بارىنشا تابىستى ونەر كورسەتەتىن بولسا, وندا قازاق دزيۋدوشىسى الەمدىك رەيتينگتە جەكە-دارا كوش باستايدى.
اسا جەڭىل سالماقتا كۇرەسەتىن عۇسمان قىرعىزباەۆتىڭ گراند-سلەمدە باس جۇلدەنى ولجالاعانى بەلگىلى. وسى تابىسىنىڭ ارقاسىندا ول 500 ۇپايدى يەلەنىپ, الەمدىك رەيتينگتە بىردەن ءۇش ساتىعا جوعارلادى. قازىرگى كەزدە عۇسمان سەگىزىنشى ورىنعا تۇراقتادى.
66 كيلو سالماقتاعى ەرلان سەرىكجانوۆ ءابۋ-دابيدەگى دودادا ەكى قارسىلاسىن جەڭىپ, ەكەۋىنەن ۇتىلدى. ناتيجەسى – جەتىنشى ورىن. سونىڭ ارقاسىندا ەرلان ءوزىنىڭ بۇرىنعى توعىزىنشى ورنىندا تۇراقتاپ قالدى. مىنە, بۇگىنگى تاڭدا ەرلەردىڭ الەمدىك رەيتينگىندە «توپ-10» دزيۋدوشىنىڭ قاتارىنا وسى ءۇش جەرلەسىمىز عانا ەنىپ وتىر.
ال وزگە مىقتى بالۋاندارىمىز مىناداي ساتىلارعا جايعاستى: يسلام بوزباەۆ (90 كيلو) – 11-ورىن, ەلدوس جۇماحانوۆ (66 كيلو) – 13-ورىن, ديدار حامزا (81 كيلو) – 19-ورىن, جانساي سماعۇلوۆ (73 كيلو) – 26-ورىن. وكىنىشكە قاراي, 100 جانە +100 كيلو سالماق دارەجەلەرىندە بەلدەسەتىن جىگىتتەرىمىزدىڭ قارقىنى تىم باسەڭ.
قازىرگى كەزدە ەرلەر باسەكەسىندە جاپونيا مەن گرۋزيانىڭ قوس بالۋانى الەمدىك رەيتينگتىڭ كوش باسىندا كەلەدى. كۇنشىعىس ەلى ورەندەرى اراسىندا ريۋدزيۋ ناگاياما (60 كيلو) مەن دجۋشيرو مارۋيامو (66 كيلو) شاشاسىنا شاڭ جۇقتىرماسا, قاپ تاۋى قىراندارى قاتارىندا ۆارلام ليپارتەلياني (100 كيلو) مەن گۋرام تۋشيشۆيلي (+100 كيلو) تەڭدەسسىز دەپ تانىلىپ وتىر. سونداي-اق ازەربايجاندىق رۋستام ورۋدجەۆ (73 كيلو), يزرايلدىك ساگي مۋكي (81 كيلو) جانە يسپانيالىق نيكولوز شەرازاديشۆيليدىڭ (90 كيلو) ايدارىنان جەل ەسىپ تۇر.
ايەلدەر دزيۋدوسى جايىندا ايتار بولساق, قازاقستان قۇراما كومانداسىنىڭ مۇشەلەرى اراسىندا تەك 48 كيلو سالماقتاعى وتگونتسەتسەگ گالبادراح قانا جانكۇيەرلەردىڭ سەنىم ۇدەسىنەن شىعۋدا. ول ءابۋ-دابيدەگى دودادا تاتاميگە شىقپاعانىمەن, وسىعان دەيىن جيعان ۇپاي قورىنىڭ ارقاسىندا بۇگىنگى تاڭدا سەگىزىنشى ورىندى يەلەنۋدە. وزگە قىزدارىمىزدىڭ ناتيجەسىن ايتۋدىڭ ءوزى ىڭعايسىز.
بۇرىمدىلار اراسىندا فرانتسيا قۇراماسىنىڭ قارقىنى وتە كۇشتى. بۇل ەلدىڭ ءتورت بالۋانى الدارىنا جان سالماي كەلەدى. ولار – اماندين بيۋشار (52 كيلو), كلاريسس اگبەنەنۋ (63 كيلو), ماري-يۆ گايە (70 كيلو) جانە مادەلينا مالونگا (78 كيلو). ال وزگە سالماق دارەجەلەرىندە ۋكراينالىق داريا بەلوديد (48 كيلو), كانادالىق كريستا دەگۋچي (57 كيلو) جانە يداليس ورتيس (+78 كيلو) وزىپ تۇر.