قازاقستان رەسپۋبليكاسى پارلامەنتىنىڭ جوعارعى پالاتاسى بيىلعى جىلعى 1 قاراشادا سەنات ماتەريالدارى بويىنشا ەڭ ۇزدىك جۋرناليستىك زەرتتەۋ بويىنشا جانە ەكولوگيا تاقىرىبىنداعى جۋرناليستىك بايقاۋدىڭ باستالاتىنى تۋرالى حابارلادى.
«سەنات توراعاسى داريعا نازارباەۆا وسى جىلدىڭ ماۋسىم ايىندا بۇقارالىق اقپارات قۇرالدارى قىزمەتكەرلەرىنىڭ كۇنىنە ارنالعان شارادا بايقاۋلار وتكىزۋ تۋرالى باستاما كوتەرگەن بولاتىن. كونكۋرستىڭ ماقساتى – جۋرناليست ماماندىعىنىڭ بەدەلىن كوتەرۋ, «جۋرناليستىك زەرتتەۋ» جانرىن دامىتۋ, ەكولوگيا سالاسىنداعى زاڭنامانى جەتىلدىرۋ, جۋرناليستەردى قولداۋ بولىپ وتىر. بايقاۋعا جۋرناليستەر, رەسپۋبليكالىق جانە ايماقتىق تەلەارنالار مەن گازەتتەردىڭ, ينتەرنەت-باسىلىمداردىڭ جانە راديونىڭ شتاتتاعى جانە شتاتتان تىس قىزمەتكەرلەرى, بلوگەرلەر قاتىسا الادى», دەلىنگەن حابارلامادا.
جەڭىمپازدارعا باعالى سىيلىقتار مەن قۇرمەت گراموتالارى بەرىلەدى. جۋرناليستىك شىعارمالاردى بايقاۋلارعا جولداي بەرۋگە بولادى. قوسىمشا اقپاراتتى پارلامەنت سەناتىنىڭ سايتىندا جانە پالاتانىڭ الەۋمەتتىك جەلىلەردەگى رەسمي اككاۋنتتارىنان الۋعا بولادى.