ماڭعىستاۋ وبلىسىنىڭ اكىمى سەرىكباي ترۇموۆ حورۆاتيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى رەفيك شابانوۆيچ باستاعان دەلەگاتسيامەن كەزدەستى. بۇل جايىندا ماڭعىستاۋ وبلىسى اكىمىنىڭ ءباسپاسوز قىزمەتى حابارلادى.
قازىرگى تاڭدا قازاقستان ەلى حورۆاتيامەن بىرلەسىپ ەكونوميكالىق سالانىڭ بارلىق باعىتتارى بويىنشا بەلسەندى ىنتىماقتاستىق جۇرگىزۋدە. ماڭعىستاۋ وبلىسىندا حورۆات كاپيتالىنىڭ قاتىسۋىمەن كوتەرمە ساۋدا سالاسى بويىنشا «انتانير» جشس قىزمەت ەتەدى.
- ولكەمىزدىڭ ەكونوميكالىق, ينۆەستيتسيالىق, ترانزيتتىك الەۋەتكە يە ايماق بولىپ تابىلاتىنى بەلگىلى. ماڭعىستاۋ وبلىسىنىڭ اۋماعى ارقىلى شىعىس ەۋروپانى ورتالىق ازيامەن جانە سولتۇستىك ەۋروپانى پارسى شىعاناعى ەلدەرىمەن قوساتىن «تراسەكا» جانە «سولتۇستىك – وڭتۇستىك» حالىقارالىق كولىك دالىزدەرى وتەدى. بۇگىنگى تاڭدا وڭىردە مۇناي ءوندىرۋ, مۇناي حيمياسى, قۇرىلىس ماتەريالدارى, مەتاللۋرگيا جانە ت.ب. سالالارىندا ءوندىرىس جۇرگىزەتىن ءىرى شەتەلدىك ينۆەستورلار تابىستى جۇمىس ىستەۋدە. ءبىز بارلىق مۇددەلى كاسىپكەرلەرگە كومەك كورسەتۋگە دايىنبىز جانە سىزدەردى ءوزارا ءتيىمدى ىنتىماقتاستىققا شاقىرامىز. بۇگىنگى كەزدەسۋ ماڭعىستاۋ وبلىسى مەن حورۆاتيا اراسىنداعى ىنتىماقتاستىقتى ودان ءارى جانداندىرۋداعى تەتىك بولادى دەپ ۇمىتتەنەمىن, دەپ اتاپ ءوتتى ايماق باسشىسى.
ەكىجاقتى كەزدەسۋ كەزىندە ماڭعىستاۋ مەن دالماتى (حورۆاتيا) وبلىستارىنىڭ مۇناي جانە كەمە جاساۋ سالاسىنداعى ىنتىماقتاستىق مۇمكىندىكتەرى تالقىلاندى. سونداي-اق حورۆاتيانىڭ ايماققا شەتەلدىك ينۆەستيتسيالاردى تارتۋ تۋرالى ۇسىنىستارى قارالدى.
ماڭعىستاۋ وبلىسى