اقتوبەدە قالاسىنداعى «جەكپە-جەك» سپورت كەشەنىندە تانىمال بالۋان, گرەك-ريم كۇرەسىنەن حالىقارالىق دارەجەدەگى سپورت شەبەرى ەسەنكەلدى باتىرعاريندى ەسكە تۇسىرۋگە ارنالعان حالىقارالىق تۋرنير ءوز مارەسىنە جەتتى.
جاسوسپىرىمدەر اراسىندا وتكەن ايتۋلى دودادا تومەندە ەسىمدەرى اتالعان بالعىن بالۋاندار ءوز سالماق دارەجەلەرى بويىنشا باس جۇلدەنى ولجالادى: 55 كيلو – ءدىنيسلام ساعيتجان (اقتوبە), 60 كيلو – دياس اسكەرباي (شىعىس قازاقستان وبلىسى), 63 كيلو – ەرجەت جارىلقاسىن (تاراز), 67 كيلو – الماتبەك امانبەك (شاڭىراقتاعى سپورت مەكتەبى), 72 كيلو – ەمىن ماگومەد كۋناەۆ (قوستاناي), 77 كيلو – راحات ساعىمباي (رەسپۋبليكالىق سپورت كوللەدجى), 82 كيلو – ماقسات سايلاۋ (نۇر-سۇلتان), 87 كيلو – ەرزات ەرلانوۆ (نۇر-سۇلتان), 97 كيلو – داۋرەن امانعاليەۆ (قوستاناي) جانە 130 كيلو – كونستانتين راحيموۆ (قوستاناي).
وسى جارىسقا قۇرمەتتى قوناق رەتىندە ارنايى كەلگەن ەلىمىزگە ەڭبەك سىڭىرگەن سپورت شەبەرى, الەم چەمپيوناتىنىڭ ەكى دۇركىن جۇلدەگەرى, ازيا ويىندارى مەن قۇرلىق بىرىنشىلىگىندە ءۇش مارتە ولجا سالعان مەيرامبەك ايناعۇلوۆ پەن اتاقتى بالۋاننىڭ جەكە باپكەرى راقىمجان باقىتجانوۆتىڭ يىعىنا جەرلەستەرى شاپان جاۋىپ, اقشالاي سىيلىق تابىس ەتتى.
بالۋاننىڭ ءوزى جايىندا قىسقاشا مالىمەت بەرەتىن بولساق, ول 1971 جىلى اقتوبە وبلىسىنىڭ شالقار اۋدانىندا تۋىپ-ءوستى. ءوزىنىڭ ەلەۋلى تابىسىنىڭ بارلىعىنا ەسەنكەلدى باتىرعارين 1990-1991 جىلدارى ارالىعىندا قول جەتكىزدى. اتاپ ايتساق, جاستار اراسىنداعى كسرو بىرىنشىلىگى مەن چەحوسلاۆاكيادا وتكەن الەم بىرىنشىلىگىندە كۇمىس مەدالدى موينىنا ءىلدى. اسا جەڭىل سالماقتا بەلدەسكەن قانداسىمىز بۇكىلوداقتىق ۋنيۆەرسيادادا جەڭىمپاز اتاندى. ەرسەكتەر دۋىنا ەركىن قوسىلعان جاس ورەن الەم جانە كسرو كۋبوگى جولىنداعى جارىستاردا الدىنا جان سالمادى. 1991 جىلى ۋكراينانىڭ زاپوروجە قالاسىندا كسرو حالىقتارى سپارتاكياداسى مەن كسرو چەمپيوناتىنىڭ قاتار وتكەنى ەسىمىزدە. سول جارىستاردا دا ەسەنكەلدىنىڭ جۇلدىزى جارقىراي جاندى. چەمپيوناتتىڭ اقتىق سىنىنا دەيىن القىنداي جەتكەن قازاق بالۋانى شەشۋشى تۇستا تۇمەندە تۋىپ-وسكەن قانداسىمىز جولامان داۋرەنبەكوۆكە ەسە جىبەرىپ, كۇمىس مەدال يەلەندى. ال ءتورت جىلدا ءبىر وتەتىن سپارتاكيادادا باتىرعارينگە تەڭ كەلەر بالۋان تابىلماي, ول التىن تۇعىرعا كوتەرىلدى. وسىلايشا, جاس ورەننىڭ ەسىمى ايتۋلى جارىستى ۇتقان ءۇشىنشى قازاق بالۋانى رەتىندە سپورتتىق شەجىرەگە جازىلدى. ەڭ عاجابى, جوعارىداعى اتاقتاردىڭ بارلىعىنا ەسەنكەلدى باتىرعارين نەبارى 20 جاسىندا قول جەتكىزدى!
ەسەنكەلدى شىن مانىندە فەنومەن ەدى! تۋا بىتكەن تالانت دەسەك تە, ەش قاتالەسپەيمىز. ەكەۋمىز شالقارداعى ۆلاديمير تسەحانوۆيچ اتىنداعى سپورت مەكتەبىندە بىرگە جاتتىقتىق. 1986 جىلى ەرەۆاندا وتكەن مارشال يۆان باگرامياننىڭ تۋرنيرىنە دە بىرگە اتتانعان ەدىك. بۇل جارىسقا ءبىزدى مەنىڭ اكەم مۇرات ەسەنجولوۆ باستاپ اپاردى. سوندا جەرلەستەرىمىزدىڭ اراسىنان ەڭ ۇزدىك ناتيجەگە باتىرعارين قول جەتكىزىپ, كوپشىلىكتىڭ كوزىنە ءتۇستى. سودان ەسەنكەلدى الماتىعا كەتتى. الاتاۋ باۋرايىندا شەبەرلىگى ابدەن شىڭدالىپ, بيىك بەلەستەردى باعىندىردى. ول – كۇرەس تۇرلەرى بويىنشا اقتوبە وڭىرىنەن شىققان تۇڭعىش حالىقارالىق دارەجەدەگى سپورت شەبەرى. سول رەكورد ۇزاق ۋاقىت بويى ساقتالدى. تەك ارادا تۋرا 20 جىل وتكەننەن كەيىن بارىپ حالىقارالىق دەڭگەيدەگى دودالاردا جۇلدە الۋعا جارايتىن بالۋاندار اقتوبە وڭىرىنەن شىعا باستادى, – دەيدى كەيىپكەرىمىزدىڭ كەزىندەگى كوماندالىق ارىپتەسى ءارى دوسى, بەلگىلى سپورت كوممەناتورى اسپانديار ەسەنجولوۆ.