ب.ساپارباەۆ قىزىلوردا وبلىسىنا باردى

كەزدەسۋ بارىسىندا پرەزيدەنتتىڭ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى  حالىققا جولداۋىندا قويىلعان مىندەتتەردى جۇزەگە اسىرۋ تۋرالى ايتتى.

ۆيتسە-پرەمەر پرەزيدەنتتىڭ تاپسىرماسى بويىنشا پەداگوگتاردىڭ مارتەبەسىن ارتتىرۋ, ولاردى ماتەريالدىق قامتاماسىز ەتۋ دەڭگەيىن جاقسارتۋ جانە ءبىلىم بەرۋ سالاسىنىڭ باسقا دا ماسەلەلەرى شەشىلەتىندىگىن اتاپ ءوتتى. ءتيىستى زاڭ جوباسى پارلامەنتتە قارالۋدا.

ء«اربىر ەلدىڭ دامۋى ءبىلىم, دەنساۋلىق ساقتاۋ, ازاماتتاردىڭ مادەنيەتىنە بايلانىستى. ءبىزدىڭ بالالارىمىزدىڭ حالىقارالىق ستاندارتتارعا سايكەس ساپالى ءبىلىم الۋى ماڭىزدى. سوندىقتان ءبىز مۇعالىمدەردىڭ مارتەبەسىن, ولاردىڭ ماتەريالدىق قامتاماسىز ەتىلۋىن ارتتىرۋىمىز كەرەك. مەملەكەت باسشىسىنىڭ تاپسىرماسى بويىنشا 4 جىل ىشىندە مۇعالىمدەردىڭ جالاقىسى ەكى ەسەگە ارتادى. كەلەشەكتە ءبىزدىڭ مۇعالىمدەر مەن دارىگەرلەردىڭ جالاقىسى ەل بويىنشا ورتاشا جالاقىدان جوعارى بولۋى ءتيىس», - دەپ اتاپ ءوتتى ب.ساپارباەۆ.

سونداي-اق ۆيتسە-پرەمەردىڭ پىكىرىنشە, مەكتەپ ديرەكتورلارىنىڭ جالاقىسى ساپالى كورسەتكىشتەرگە بايلانىستى بولۋى ءتيىس.

«مىسالى, بۇل مەكتەپتە 4000 بالا, ال كورشى مەكتەپتە 500 بالا وقيدى. جۇكتەمە ءارتۇرلى, ال ديرەكتورلاردىڭ جالاقىسى بىردەي. سونداي-اق وقۋ ساپاسى  - «التىن بەلگى» الاتىن تۇلەكتەرى سانى, ءتارتىبى جانە باسقا دا كورسەتكىشتەر ەسكەرىلمەيدى. بۇل ماسەلەلەر جاڭا زاڭدا ەسكەرىلەتىن بولادى», - دەدى ۆيتسە-پرەمەر.

بەردىبەك ماشبەك ۇلى مۇعالىمدەردى جاس ۇرپاققا رۋحاني-ادامگەرشىلىك تاربيە بەرۋ بويىنشا جۇمىستى كۇشەيتۋگە شاقىردى.

«وكىنىشكە وراي, سوڭعى ۋاقىتتا جاسوسپىرىمدەر اراسىندا سۋيتسيدتەر مەن قۇقىق بۇزۋشىلىقتار سانى وسۋدە. بۇل اتا-انالار مەن مۇعالىمدەردىڭ ءوزارا ءىس-قيمىلىنىڭ ناشارلاعانىن كورسەتەدى. بۇل ماسەلەنى شەشۋدە ءبىز قوعام مەن مەملەكەتتىڭ كۇش-جىگەرىن ۇيلەستىرۋ ءۇشىن قوعامنىڭ نازارىن وسى ماسەلەگە اۋدارعىمىز كەلەدى. لايىقتى ۇرپاقتى تاربيەلەۋ - ءبىزدىڭ ورتاق مىندەتىمىز», - دەدى بەردىبەك ماشبەك ۇلى.