نۇر-سۇلتاندا 23 قىركۇيەك پەن 23 قازان ارالىعىندا وتكەن «STOP تۋبەركۋلەز» اتتى ايلىق اكتسياسى قورىتىندىلاندى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
اكىمدىكتىڭ باستاماسىمەن قالالىق قوعامدىق دەنساۋلىق ساقتاۋ باسقارماسىنىڭ ۇيىمداستىرۋىمەن ءوتتى. اكتسيا مۇشەلەرى قالاداعى حالىق كوپ جينالاتىن ورىنداردى ارالاپ, تەكسەرۋ جۇمىستارىن وتكىزدى. ونىڭ ىشىندە قالاداعى ساۋدا ورتالىقتارى, بازارلار جانە تۇرعىن ءۇي الاپتارىن ارالادى. دەگەنمەن باسىمدىق قالا شەتىندەگى ەلدى مەكەندەرگە بەرىلدى.
«سونداي-اق قالاداعى ەمحانالاردا اشىق ەسىك كۇنى ۇيىمداستىرىلىپ, تۇرعىندار اراسىندا ءتۇسىندىرۋ جۇمىستارى وتكىزىلدى. ودان بولەك, جوو دا قامتىلدى, ياعني 4 استانالىق وقۋ ورنىندا فليۋوروگرافيالىق تەكسەرۋ جۇمىسى ۇيىمداستىرىلدى», - دەدى نۇر-سۇلتان قالاسى قوعامدىق دەنساۋلىق ساقتاۋ باسقارما باسشىسىنىڭ ورىنباسارى ءاليا رۇستەموۆا اكىمدىكتە وتكەن ءباسپاسوز ءماسليحاتىندا.
ونىڭ ايتۋىنشا, تۋبەركۋلەز اۋرۋىنا قارسى ۇيىمداستىرىلعان اكتسيا 14 مىڭ ادامدى قامتىدى. «اكتسيا ناتيجەسىندە 75 ادامنان تۋبەركۋلەز اۋرۋىنىڭ وڭ بەلگىسى بار بولىپ تابىلدى. ارنايى تەكسەرۋلەردەن كەيىن 9 ادامنان تۋبەركۋلەز اۋرۋىنىڭ العاشقى بەلگىسى انىقتالدى. بۇل باعىتتاعى جۇمىستار ءوز جالعاسىن تابادى. الداعى ۋاقىتتا جۇمىس كۇندەرى تەكسەرىلە المايتىن ازاماتتار ءۇشىن دەمالىس كۇندەرى تەكسەرۋ جانە انىقتاۋ شارالارى ۇيىمداستىرىلاتىن بولادى», - دەدى ول.
قالالىق فتيزيوپۋلمونولوگيالىق ورتالىعىنىڭ مالىمەتىنە سۇيەنسەك, ەلوردادا سوڭعى 5 جىلدا اتالعان اۋرۋعا ۇشىراعاندار سانى 1,5 ەسەگە قىسقارعان.