جانامادا جوعالعان ءسابيدىڭ ءبىرىنىڭ جانسىز دەنەسى تابىلدى

ايتا كەتەيىك, بۇگىن باتىس قازاقستان وبلىستىق پوليتسيا دەپارتامەنتى اقجايىق اۋدانىنا قاراستى جاناما اۋىلىنان 5 جانە 2 جاسار قوس ءسابيدىڭ جوعالىپ كەتكەندىگى تۋرالى وقىس حابار تاراتقان بولاتىن.

وقيعا 24 قازان كۇنى تۇستەن كەيىن بولعان. جوعالعان بالالاردىڭ اناسىنىڭ ايتۋىنشا, اۋلادا ويناپ جۇرگەن ۇلدارىن سىرتىنان باقىلاپ قويىپ, ءۇي شارۋاسىمەن اينالىسىپ جۇرگەن ول ساعات 15.00 شاماسىندا بالالاردىڭ جوق ەكەنىن بايقايدى. اۋەلى ءۇيى مەن قورا-قوپسى ماڭىنان ىزدەپ, تاپپاعان سوڭ اعايىن-تۋىسى مەن كورشىلەرىنە حابار بەرگەن. ەش ناتيجە بولماعان سوڭ كەشكى 20.30-دا تايپاق پوليتسيا بولىمىنە حابارلاعان.

وقيعادان حابار العان سوڭ تايپاق پەن اقجايىق اۋداندىق پوليتسيا ءبولىمى قىزمەتكەرلەرى دەرەۋ ىزدەستىرۋ شارالارىنا كىرىسكەن. باتىس قازاقستان وبلىستىق پوليتسيا دەپارتامەنتى باستىعىنىڭ جەدەل ىزدەستىرۋ ماسەلەلەرى بويىنشا ورىنباسارى پوليتسيا پولكوۆنيگى ا.مەڭدىعالين 24-قازان كۇنى تۇندە, ال دەپارتامەنت باستىعى گەنەرال-مايور م.ءابىلازيموۆتىڭ ءوزى 25-ءى كۇنى تاڭمەن وقيعا ورنىنا بارعانى. ىسكە 100-گە جۋىق پوليتسيا قىزمەتكەرى, ارناۋلى جاساق وكىلدەرى, قۇتقارۋشىلار, اۋىلدىڭ جۇزدەگەن تۇرعىنى جۇمىلعان.

پوليتسيا قۇرىلىمدارى جوعالعان ەكى ءسابي – ورىنباسار بەكسۇلتان اسقار ۇلى (02.10.2014 ج.ت.) مەن ورىنباسار نۇريسلام اسقار ۇلىنا (23.11.2017ج.ت.) ىزدەۋ جاريالادى. جۋرناليستەر, قاراپايىم تۇرعىندار الەۋمەتتىك جەلىلەر ارقىلى حابار تاراتىپ, قوس ءسابيدىڭ امان-ەسەن تابىلۋىن تىلەپ جاتتى.

- بالالاردىڭ اتا-اناسى وعاش قىلىعى جوق, قاراپايىم اۋىل تۇرعىندارى. وتباسىندا وسى ەكى ۇلى عانا. ۇلداردىڭ اكەسى اسقار سارىتوعاي اۋىلدىق وكرۋگىندە وپەراتور بولىپ قىزمەت ەتسە, اناسى بالا كۇتىمىنە بايلانىستى ءۇي شارۋاسىندا بولعان, - دەپ حابارلادى بقو پوليتسيا دەپارتامەنتى ءباسپاسوز قىزمەتىنىڭ جەتەكشىسى بولاتبەك بەلگىبەكوۆ.

ايتا كەتەيىك, اقجايىق اۋىلى, سارىتوعاي اۋىلدىق وكرۋگىنە قاراستى جاناما اۋىلىندا 166 ءۇي, 1042 تۇرعىن بار. اۋىلدان 1 كم قاشىقتا قاراسۋ ارناسى بار, 4 شاقىرىمداي جەردە جايىق وزەنى اعىپ وتەدى. ىزدەۋ جۇمىسىنا قۇتقارۋ جاساعىنىڭ ءيىسشىل ەكى ءيتى, سۇڭگۋىرلەر توبى قوسىلعان. وقيعا بولعان جەردە ۇيالى بايلانىس جەلىسى ناشارلىعى ىزدەستىرۋ جۇمىسىنا كەدەرگى كەلتىرگەن.

جوعالعان سابيلەردى ىزدەۋ جۇمىسى ءتۇنى بويى توقتاعان جوق. وقىس وقيعاعا وراي باتىس قازاقستان وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى س.سۇيىنباەۆ, باتىس قازاقستان وبلىستىق توتەنشە جاعدايلار دەپارتامەنتى ءبولىم باستىعى ماكسيم حايرەكەنوۆ, باتىس قازاقستان وبلىستىق توتەنشە جاعدايلار دەپارتامەنتى جەدەل قۇتقارۋ جاساعىنىڭ باسشىسى ا.قىلىشەۆ ءباسپاسوز ءماسليحاتىن وتكىزىپ, جۋرناليستەرگە سوڭعى مالىمەتتەردى جاريا ەتتى. وكىنىشكە قاراي, سۇڭگۋىرلەر قاراسۋ اڭعارىنان 2014 جىلى تۋعان بەكسۇلتاننىڭ دەنەسىن تاۋىپتى. ەكىنشى ءسابي ءالى ىزدەستىرىلۋ ۇستىندە.

باتىس قازاقستان