رەسەي ەرىكتىلەرى, اتاپ ايتقاندا, «پەرەپراۆا» ىزدەۋ جاساعى قازبا جۇمىستارىن جۇرگىزۋ ناتيجەسىندە سوعىس كەزىندە حابار-وشارسىز كەتكەن 160-قا جۋىق سولتۇستىكقازاقستاندىق جاۋىنگەردىڭ 55-ءىنىڭ ءمايىتىن تاپقانى جايلى جەرگىلىكتى بيلىك ورىندارىنا حابارلادى.
وسىعان وراي قان مايداندا ەرلىكپەن قازا تاپقان جەرلەستەرىمىزدى قايتا جەرلەۋ ءۇشىن ارنايى دەلەگاتسيا جاساقتالىپ, جولعا اتتانباقشى.
314-ءشى اتقىشتار ديۆيزياسى پەتروپاۆل قالاسىندا قۇرىلىپ, قۇرامىندا 11 مىڭعا جۋىق سولتۇستىكقازاقستاندىق سارباز بولعان.
«جاۋىنگەرلەردىڭ دەنەسى رەسەيدىڭ لەنينگراد وبلىسى لودەينوە پولە اۋدانى سۆير سەلوسى ماڭىنان تابىلعان. 1-ءشى باتالوننىڭ 1076-شى اتقىشتار پولكى وسى اۋماقتا نەمىس باسقىنشىلارىنا قارسى كەسكىلەسكەن شايقاستار جۇرگىزگەن. ءبىز بۇگىن وتان ءۇشىن كەۋدەسىن وققا توسقان اتالارىمىزدىڭ رۋحىنا تاعزىم ەتىپ, ولاردى ەسكە الۋ شاراسىنا جينالىپ وتىرمىز», دەدى قالا اكىمىنىڭ ورىنباسارى اسار حابيبۋلين جيىندا سويلەگەن سوزىندە.
جەر قوينىنان تابىلعان 10 ادامنىڭ 8-ءى پەتروپاۆلدىق , 2-ءۋى كوكشەتاۋلىق ەكەنى انىقتالعان. سولاردىڭ ءبىرى– الەكساندر ارتەمەۆ 1941 جىلى باتىسقا اتتانىپ, سودان حابار-وشارسىز كەتكەن. «اتام 1908 جىلى دۇنيەگە كەلگەن. 314-ءشى اتقىشتار ديۆيزياسىنىڭ 1-ءشى باتالونى 1076-شى اتقىشتار پولكىنە قابىلدانعان. تابىلعانداردىڭ اراسىنان اتامنىڭ ەسىمىن كورىپ قاتتى قۋاندىم. مەن دە دەلەگاتسيا قۇرامىندا قايتا جەرلەۋ راسىمىنە اتتانىپ بارامىن», دەيدى نەمەرەسى تامارا پلياششەچنيكوۆا.
دەلەگاتسيا جەتەكشىسى يمانعالي تاتۆاەۆتىڭ ايتۋىنشا قىزىلجار وڭىرىنەن توپىراق سالىنعان كاپسۋلا جەتكىزىلەدى.
ميتينگىگە قاتىسۋشىلار ەكىنشى دۇنيەجۇزىلىك سوعىستا قازا تاپقان جاۋىنگەرلەردىڭ ەسكەرتكىشى الدىنا گۇل شوقتارىن قويىپ, ۇنسىزدىكپەن ەسكە الدى.
سولتۇستىك قازاقستان وبلىسى