ۇلتتىق مۋزەيىندە حالىقارالىق «ونەردەگى دوپ» ارت-كورمەسى سالتاناتتى تۇردە اشىلدى. بۇل تۋرالى مۋزەيدىڭ ءباسپاسوز قىزمەتى حابارلادى.
شارا جەر شارىنداعى ميللياردتاعان ادامدار ءسۇيىپ قادىرلەيتىن ەڭ تانىمال سپورت ءتۇرى - فۋتبولدىڭ جارقىن الەمىنە ارنالدى. فۋتبول ونەر رەتىندە ءارتۇرلى ۇلت, ءدىن وكىلدەرىن بىرىكتىرەتىن قانداي دا ءبىر فەنومەن جانە جاسامپاز كۇش رەتىندە تانىستىرىلدى. سونداي-اق فۋتبول حالىقتار اراسىنداعى بەيبىتشىلىك پەن ءوزارا تۇسىنىستىكتى نىعايتۋعا قىزمەت ەتەدى.
كورمە قازاقستانداعى رەسەي فەدەراتسياسى ەلشىلىگىنىڭ جانە رەسەي فەدەراتسياسىنداعى قازاقستان رەسپۋبليكاسى ەلشىلىگىنىڭ قولداۋىمەن ءوتتى. جوبانىڭ ۇيىمداستىرۋشىلارى حالىقارالىق ۇكىمەتتىك ەمەس ۇيىمدار – حالىقارالىق قايىرىمدىلىق «كرافت-پاۆلوۆ» زاماناۋي ونەردى قولداۋ قورى جانە يمپەراتورلىق پراۆوسلاۆيەلىك پالەستينالىق قوعام.
شارانىڭ اشىلۋ سالتاناتىندا ءسوز العان ۇلتتىق مۋزەي ديرەكتورى ارىستانبەك مۇحامەدي ۇلى: «بۇل – وتە ەرەكشە كورمە. ەكى جىل بويى بەلسەندى تۇردە جۇزەگە اسىرىلىپ كەلە جاتقان جوبا. «ونەردەگى دوپ» – قازاقستان مەن رەسەي فەدەراتسياسىنىڭ اراسىنداعى دوستىق قارىم-قاتىناستى كورسەتىپ, ەكى ەل اراسىنداعى مادەني بايلانىستى ارتتىرا تۇسەتىن جوبا. «ونەردەگى دوپ» كورمەسى العاش رەت 2018 جىلى ماسكەۋدە فۋتبولدان الەم چەمپيوناتى ءوتىپ جاتقان ۋاقىتتا ۇيىمداستىرىلىپ, ۇلكەن جەتىستىككە جەتىپ, تانىمال بولعان ەدى. كورمەدەگى كەرەمەت تۋىندىلار فۋتبول ويىنىنىڭ الەم چەمپيوناتى كەزىندەگى ءتۇرلى ەستەلىكتەردى ەسكە سالادى. بۇگىنگى شاراعا قاتىسىپ وتىرعان بالعىندارعا تاريحتا اتى قالعان فۋتبول چەمپيوندارىنىڭ جولىن بەرىپ, ۇلكەن جەتىستىكتەرگە جەتسىن دەگىم كەلەدى. كورمەنىڭ ۇيىمداستىرۋشىلارىنا زور العىسىمدى بىلدىرەمىن!», دەدى.
كورمەدە رەسەيلىك جانە شەتەلدىك تانىمال سۋرەتشىلەردىڭ فۋتبولدىڭ جارقىن الەمىنە, ونىڭ گۋمانيستىك قۇندىلىقتارىنا ارنالعان 100-دەن استام تۋىندىلارى ۇسىنىلدى. ەكسپوزيتسيادا رەسەي, جاپونيا, يتاليا, فرانتسيا, اقش, شۆەيتساريا, ءۇندىستان, نيدەرلاندى, برازيليا جانە باسقا دا ەلدەر سۋرەتشىلەرىنىڭ جۇمىستارى بار. ولاردىڭ اراسىندا تانىمال قازاق سۋرەتشىلەرىنىڭ تۋىندىلارى دا بولدى.
پارلامەنت ءماجىلىسىنىڭ ۆيتسە-سپيكەرى ۆلاديمير بوجكو: «قازاقستان مەن رەسەي اراسىندا مادەني بايلانىس جوعارى دەڭگەيدە ەكەنىن اتاپ وتكەن ءجون. قارىم-قاتىناستىڭ بۇل ءتۇرى ەكى ەل اراسىنداعى ستراتەگيالىق بايلانىسقا وڭ ىقپال ەتىپ, ءبىر-ءبىرىمىزدىڭ جەتىستىگىمىزگە ورتاقتاسىپ, حالىقتار اراسىندا ءوزارا تۇسىنىستىك ورناتادى. بۇل شارا رەسەي فەدەراتسياسى وتكىزگەن الەم چەمپيوناتىنا ارنالادى. اتالعان ءدۇبىرلى چەمپيونات كەزىندە ۇيقىسىز تۇندەر, ءتۇرلى تىلەكتەر, قولداۋلار مەن زور ەڭبەكتەر بولدى. بۇل كورمەنىڭ الداعى ۋاقىتتا وزگە ەلدەردە كەڭىنەن ناسيحاتتالىپ, ۇلكەن جەتىستىكتەرگە قول جەتكىزۋىنە تىلەكتەسپىن», - دەپ جىلى لەبىزىن جەتكىزدى.
قازاقستان رەسپۋبليكاسىنداعى رەسەي فەدەراتسياسىنىڭ توتەنشە جانە وكىلەتتى ەلشىسى الەكسەي بوروداۆكين كورمەنى ۇيىمداستىرۋشىلارعا ريزاشىلىعىن بىلدىرە كەلىپ, قازاقستان رەسپۋبليكاسى مادەنيەت جانە سپورت مينيسترلىگىنە, قر ۇلتتىق مۋزەيگە زور العىسىن ايتتى.
«ونەردەگى دوپ» كورمەسى العاش رەت FIFA - 2018 فۋتبولدان الەم چەمپيناتى ءوتىپ جاتقان ۋاقىتتا ۇيىمداستىرىلىپ, ۇلكەن جەتىستىككە جەتىپ, حالىقارالىق رەزونانس تۋدىردى. «جول كارتاسى» پاريج, پەكين, موناكو, جەنەۆا, بەرلين, لوندون, سەۋل, باكۋ جانە ت.ب. ارقىلى وتەتىن ارت-كورمەنىڭ الەمدىك ۇلكەن تۋرنەسى نۇر-سۇلتاننان باستاۋ الدى. «ونەردەگى دوپ» ارت-كورمەسىن 2020 جىلعى جازدا فۋتبولدان ەۆرو-2020 ماتچتارى وتەتىن ۋاقىتتا سانكت-پەتەربۋرگتەگى «مانەجدە» وتكىزۋ جوسپارلانۋدا. حالىقارالىق ارت-تۋرنەنىڭ مارەلىك نۇكتەسى فۋتبولدان كەلەسى 2022 جىلعى FIFA الەم چەمپيوناتىنىڭ قارساڭىندا تاياۋشىعىستىق مەملەكەت استاناسى دوحادا (قاتار) بولماق.
جوبانىڭ ۇيىمداستىرۋشىلارى ەلەنا كرافت پەن ەلەنا اگاپوۆا حالىقارالىق «ونەردەگى دوپ» ارت-جوباسىنىڭ قازاق جەرىندە وتۋىنە قولداۋ كورسەتكەنى ءۇشىن رەسەي فەدەراتسياسىنداعى قازاقستان رەسپۋبليكاسىنىڭ توتەنشە جانە وكىلەتتى ەلشىسى يمانعالي تاسماعامبەتوۆكە ەرەكشە العىسىن ءبىلدىردى. «ونەردەگى دوپ» جوباسىنىڭ ۇيىمداستىرۋشىلارى سونىمەن قاتار قازاقستان رەسپۋبليكاسى مادەنيەت جانە سپورت مينيسترلىگىنىڭ, قازاقستان رەسپۋبليكاسى ۇلتتىق مۋزەيىنىڭ, قازاقستان فۋتبول وداعىنىڭ باسشىلىقتارىنا, سونىمەن قاتار باسقا دا باسشىلار مەن مەكەمەلەرگە ريزاشىلىقتارىن ءبىلدىردى.
حالىقارالىق «ونەردەگى دوپ» جوباسىنا الەمدىك فۋتبول جۇلدىزدارى, ءارتۇرلى ەلدەردىڭ تانىمال مادەنيەت پەن ونەر قايراتكەرلەرى, ساياساتكەرلەر مەن ديپلوماتتار قولداۋ كورسەتۋدە.
حالىقارالىق «ونەردەگى دوپ» ارت-كورمەسىنىڭ نۇر-سۇلتانداعى اشىلۋ سالتاناتىنا قازاقستان رەسپۋبليكاسىنىڭ مەملەكەت, ساياسات جانە قوعام قايراتكەرلەرى, فۋتبول جۇلدىزدارى, جاتتىقتىرۋشىلار, ديپلوماتيالىق كورپۋس, بيزنەس-قاۋىمداستىق وكىلدەرى, تانىمال مادەنيەت, عىلىم جانە ونەر قايراتكەرلەرى, سپورتتىق جاستار كلۋبتارى قاتىستى.