بۇگىندە جامبىل وبلىسى تۇرعىندارىنىڭ تۇرمىستىق تابىسىن جاقسارتۋ جوباسى جالپى ءوڭىر حالقىنىڭ اراسىندا كەڭ قولداۋعا يە بولىپ وتىر. پيلوتتىق جوباعا ەنگەن ون اۋىلدىق وكرۋگتەن بولەك, باسقا دا ەلدىمەكەندەردىڭ تۇرعىندارى يگى باستاماعا قىزىعۋشىلىق تانىتۋدا. كوپتىڭ كوكەيىندەگى ساۋالدارعا جاۋاپ بەرۋ ءۇشىن جامبىل وبلىسىنىڭ اكىمى, Nur Otan پارتياسى وبلىستىق فيليالىنىڭ توراعاسى اسقار مىرزاحمەتوۆ بايزاق اۋدانىندا قوعامدىق قابىلداۋ وتكىزىپ, تۇرعىندارمەن كەزدەستى.
كەزدەسۋگە اۋداننىڭ بەس تۇرعىنى كەلىپ, تولعاندىرىپ جۇرگەن وزەكتى ساۋالدارىن جولدادى. ايتالىق, تۇيمەكەنت جانە قىزىل جۇلدىز اۋىلدىق وكرۋگىنىڭ تۇرعىندارى جومارت مۇحامبەتجانوۆ پەن اسىلبەك ومىرزاقوۆ ءوز وكرۋگتەرىنىڭ جوباعا قاشان ەنەتىنىن سۇراپ, اۋىلداستارى دا جوبا اياسىندا تۇرمىسىن تىكتەۋگە اسىق ەكەنىن جەتكىزدى. تۇيمەكەنتتىك جومارت مۇحامبەتجانوۆ اۋىلداستارىنىڭ مال شارۋاشىلىعىنا بەيىم ەكەنىن, ءۇي ىرگەسىندەگى جەرلەردى ءتيىمدى يگەرىپ, ەكى اينالىمدا دا ءونىم الۋعا دايىن ەكەندىگىن ايتىپ, تەك قولداۋ بولسا دەگەن نيەتىن ءبىلدىردى. ال, قىزىلجۇلدىزدىق جومارت مۇحامبەتجانوۆ ءوز وكرۋگىندە كووپەراتيۆ قۇرىپ, ءتيىستى جۇمىستاردى باستاپ كەتكەنىن ايتتى. اسقار مىرزاحمەتوۆ جوبانىڭ بۇگىندە پيلوتتىق رەجيمى جۇزەگە اسىپ جاتقانىن ايتىپ, ءتيىستى قاراجات قاراشا ايىنىڭ باسىندا تۇسەتىنىن جەتكىزدى. ەگەر ون اۋىلدىق وكرۋگتەگى پيلوتتىق جوبا ءوز ناتيجەسىن بەرسە, كەلەر جىلى وڭىردەگى بارلىق اۋىلدىق وكرۋگ تۇگەلدەي قامتىلاتىنىن مالىمدەدى.
قوعامدىق قابىلداۋ كەزىندە وزگە دە ازاماتتار ءتۇرلى الەۋمەتتىك ماسەلەلەردى كوتەردى. سارىكەمەر اۋىلىنىڭ تۇرعىنى, زەينەتكەر قىدىرالى ورالوۆ تۇرعىن ءۇي سالۋ ءۇشىن جەر كەزەگىندە تۇرعانداردىڭ ءوتىنىشىن جەتكىزىپ, جەر تەلىمدەرىن بەرۋ ماسەلەسىن شەشىپ بەرۋدى سۇرادى. ايتا كەتەيىك, اۋىلدىڭ باس جوسپارىنا سايكەس ەلدى مەكەن شەگىن كەڭەيتۋ ماقساتىندا 217,33 گەكتار جەر تەلىمى ەنگىزىلگەن. اكىم ول جەردىڭ قۇنىنىڭ تىم قىمبات ەكەندىگىنە كوڭىل ءبولىپ, وڭتايلاندىرۋ كەرەكتىگىن ايتتى. سونداي-اق ول جەردىڭ سۋارمالى القاپ ەكەنىن ەسكەرۋ قاجەتتىگىن جەتكىزىپ, بايزاق اۋدانىنىڭ حالىق تىعىزدىعىنا نازار اۋداردى. الايدا جەر تەلىمدەرىن وزگە اۋدانداردىڭ بوس اۋماقتارىنان بەرۋدىڭ ماڭىزدىلىعىنا توقتالدى. قابىلداۋدا بايزاقتىقتار تۇرعىندار ءۇشىن ماسەلە بولىپ كەلە جاتقان اۋىز سۋ, گاز تارتۋ ماسەلەلەرىن دە كوتەردى.