28 قازاندا وتەتىن لوندونداعى قازاق كينوسى اپتالىعىنىڭ اشىلۋ سالتاناتىندا رەجيسسەر ءسابيت قۇرمانبەكوۆ تۇسىرگەن «ورالمان» ءفيلمى كورسەتىلەدى. مادەني ءىس-شارانى مادەنيەت جانە سپورت مينيسترلىگى, قازاقستان رەسپۋبليكاسىنىڭ ۇلىبريتانيا جانە سولتۇستىك يرلانديا قۇراما كورولدىگىندەگى ەلشىلىگى, ش.ايمانوۆ اتىنداعى «قازاقفيلم» كينوستۋدياسى بىرلەسىپ ۇيىمداستىرىپ وتىر.
«ورالمان» فيلمى تۋعان جەرىنەن كەتۋگە ءماجبۇر بولعان, الايدا ونداعان جىلدار وتكەن سوڭ اۋعانستاننان ەلىنە قايتا ورالعان قانداستارىمىز جايلى باياندايدى. شەتەل كورەرمەندەرىنە بۇل كينوتۋىندىنى بەلگىلى كينودراماتۋرگ, قازاقستاننىڭ ەڭبەك سىڭىرگەن قايراتكەرى, ءفيلمنىڭ ستسەناري اۆتورى نۇرلان سانجار تانىستىراتىن بولادى.
ايتا كەتسەك, قازاق كينوسىنىڭ اپتالىعى شەڭبەرىندە «قازاقفيلم» كينوستۋدياسى شىعارعان باسقا دا فيلمدەر كورسەتىلەدى, ولار:
- 29 قازاندا رەجيسسەر اقان ساتاەۆتىڭ «اناعا اپارار جول» تاريحي دراماسى ۇسىنىلادى. ءفيلمدى قازاقستاننىڭ ەڭبەك سىڭىرگەن قايراتكەرى, باستى ءرولدى سومداعان اكتەر ءادىل احمەتوۆ تانىستىرادى.
- 30 قازاندا ساتىبالدى نارىمبەتوۆتىڭ «امانات» ءفيلمى كورسەتىلەدى. تاريحي كينوتۋىندىنى قازاقستاننىڭ ەڭبەك سىڭىرگەن قايراتكەرى, باستى ءرولدى سومداعان اكتەر بەرىك ايتجانوۆ تانىستىرادى.
- 31 قازاندا شەتەل كورەرمەندەرىنە ەرمەك تۇرسىنوۆتىڭ «شال» ءفيلمى ۇسىنىلادى. ءفيلمدى قازاقستاننىڭ ەڭبەك سىڭىرگەن قايراتكەرى, پروديۋسەر قانات تورەباي تانىستىرادى.
ال 1 قاراشادا قازاق كينوسى اپتالىعىنىڭ جابىلۋ سالتاناتىندا «ايكا» ءفيلمى كورسەتىلەدى. بۇل ءفيلمنىڭ كورسەتىلىمىنە رەجيسسەر سەرگەي دۆورتسەۆوي جانە اكتريسا سامال ەسلياموۆا قاتىسادى.
ايتا كەتسەك, وتاندىق فيلمدەر لوندوننىڭ ەڭ تانىمال VueWest End كينوتەاترىندا كورسەتىلەدى. باستالۋى ساعات 18:00-دە. كىرۋ تەگىن.