ۇلىتاۋدا شىعارماشىلىعىنا قاراعاندى, جەزقازعان, قارساقباي سىندى ءوندىرىس وشاقتارىن جىرلاۋدى ارقاۋ ەتكەن ارقالى اقىن تايجان قالماعامبەتوۆتىڭ 140 جىلدىعى مەن اۋداننىڭ 80 جىلدىق مەرەيتويىنا ارنالعان ءدۇبىرلى دۋمان ءوتتى. ۇلت ۇياسى اتانعان اۋداننىڭ بۇل تويىنا پارلامەنت سەناتىنىڭ دەپۋتاتى رىسقالي ابدىكەروۆ, قاراعاندى وبلىسى اكىمىنىڭ ورىنباسارى ابزال نۇكەنوۆ جانە باسقا دا قۇرمەتتى قوناقتار قاتىستى.
مەرەكەلىك شارانىڭ اشىلۋ سالتاناتىندا ءسوز سويلەگەن سەناتور رىسقالي ابدىكەروۆ كەزىندە وسى اۋداندى باسقارعاندا وزىنە قولداۋ كورسەتكەن جەرگىلىكتى ازاماتتارعا العىس سەزىمىن جەتكىزدى.
– ۇلىتاۋ بۇگىندە كۇن وتكەن سايىن كوركەيىپ, دامىپ كەلە جاتقان وركەندى ءوڭىر. اۋماعىندا مۇناي شىعۋىنا بايلانىستى ون جىلدان استام ۋاقىتتان بەرى وبلىستىق بيۋدجەتتى دەمەپ وتىرعان بىردەن-ءبىر اۋدان. مەملەكەت باسشىسى قاسىم-جومارت توقاەۆ ءتۋريزمدى دامىتۋ توڭىرەگىندە ناقتى مىندەت قويدى. اۋدان حالقىن الدا ۇلى ءىس, جاسامپاز ءومىر كۇتىپ تۇر, – دەپ قايىردى ءسوزىن مارتەبەلى مەيمان.
«رۋحاني جاڭعىرۋ» باعدارلاماسى اياسىندا ۇيىمداستىرىلعان مەرەكەلىك شاراعا قاتىسۋشىلار اۋدان ورتالىعىنداعى ساياباققا اعاش ەگىپ, يگىلىكتى ءىس اتقاردى. توي قوناقتارى الدىندا اۋداندىق مادەنيەت ءۇيىنىڭ ارتىستەرى, جەزقازعان مەن ساتباەۆ قالالارىنىڭ شىعارماشىلىق ۇجىمدارى ونەر كورسەتىپ, شاراعا سالتاناتتى رەڭك بەردى.
مادەني شارا باعدارلاماسىنا ساي, «تايجان ىزىمەن» دەپ اتالعان رەسپۋبليكالىق ءان بايقاۋى جانە قازاق كۇرەسىنەن جارىس ۇيىمداستىرىلدى. انشىلەر سايىسىندا باس جۇلدەگە لايىقتى دەپ تانىلعان جاڭاارقالىق جالىن سىزدىقوۆقا 1 ميلليون تەڭگەنىڭ سەرتيفيكاتى تابىس ەتىلدى. قىزىلوردالىق ب.ابدىماجيتوۆكە ءبىرىنشى جۇلدە بۇيىرسا, ونىڭ جەرلەسى ي.داۋلەتحان ەكىنشى جۇلدە يەگەرى اتاندى. ال ءۇشىنشى ورىنعا ارنالعان جۇلدە جەزقازعان قالاسىنىڭ ءانشىسى م.شوقتاەۆقا بەرىلدى.
قازاق كۇرەسىنەن بەلدەسۋلەر ەكى سالماق دارەجەسىندە ءوتتى. ۇلىتاۋدىڭ ۇلانى ەرنات تولەش 70 كيلو سالماقتا قارسىلاسىنا شاق كەلتىرمەسە, ابسوليۋتتىك سالماق دارەجەسىندە جاڭاارقانىڭ جامپوزى جىلكەلدى قۇدايبەرگەن جەڭىس تۇعىرىنىڭ ەڭ بيىك ساتىسىنا كوتەرىلدى.
ۇلىتاۋدىڭ باۋرايىن دۇبىرگە بولەگەن مەرەكەلىك شارا ەل ەستراداسىنىڭ جۇلدىزدارى قاتىسقان گالا-كونتسەرتپەن تۇيىندەلدى. تويشىل قاۋىم ومىرقۇل اينيازوۆ, بەيبىت كۇشقاليەۆ, سيۆي ماحمۋدي جانە نۇرجان كەرمەنباەۆ سىندى انشىلەردىڭ ونەرىنە ءتانتى بولدى.