مادەني استانا اتانۋعا ازىرلەنۋدە

ساۋلەتتىك كەڭەس قۇرامىندا قازاقستاننىڭ ەڭبەك سىڭىرگەن ساۋلەتشىلەرى, سۋرەتشىلەر, مۇ­سىن­شىلەر, ءتيىستى باسقارما باس­­شى­لارى مەن قۇزىرلى مەكە­مەلەر­دىڭ جاۋاپتى ماماندارى بار.

اتالعان كەڭەستە شىمكەنت قا­لاشىعىن قالپىنا كەلتىرۋ جۇمىستارىنىڭ بارىسى تۋرالى ماسكەۋ حالىقارالىق ساۋلەت اكادەمياسىنىڭ پروفەسسورى, قر مونۋمەنتالدى ەسكەرت­كىش جونىندەگى مەملەكەتتىك كوميس­سياسىنىڭ مۇشەسى, جوبا اۆتورى سادۋاقاس اگيتاەۆ باياندادى.

بەلگىلى ساۋلەتشىنىڭ ايتۋىنشا, 2019 جىلدىڭ سوڭىنا دەيىن «ەسكى قالاشىقتىڭ» جوعارعى بولىگىنىڭ جۇمىسى اياقتالىپ, كەلەسى جىلدىڭ ناۋرىز ايىنا دەيىن قازبا كەزىندە تابىلعان ەكسپوناتتاردان تۇراتىن مۇراجاي-ەكسپوزيتسياسى ازىرلەنەتىن بولادى. ال جەل­توقسان ايىندا بەكىنىس قابىر­عالارى بار وڭتۇستىك قاقپانى قالپىنا كەل­تىرۋ اياقتالىپ, سول جەردە 200 شار­شى مەترگە ۆيزيت-ورتا­لىعىن ورنالاستىرۋ جوسپارلانۋدا. جانە دە وڭتۇستىك قاقپا الدىن­داعى الاڭدى اباتتاندىرۋ قولعا الىن­باق.

سونىمەن قاتار قاراحا­نيد­­­تەر كەزەڭى مەن قازاق حان­دى­­­عىنىڭ تۇرعىن كۆارتالدا­رىن مۇراجايعا اينالدىرۋ جۇمى­ستارى جۇر­گىزىلىپ, باتىس, سول­تۇستىك جانە شى­عىس بە­كىنىس قابىرعالارىن قالپىنا كەل­تىرۋ كەلەر جىلدا جالعاسادى. قۋان­تارلىعى, قالا تۇرعىندارى مەن قوناقتار ءۇشىن قالاشىق اۋما­عىنان 550 ورىن­دىق امفيتەاتر قۇرىلىسى باستالماق.

جيىن قورىتىندىسىندا قالا باسشىسى شىمكەنت قالاشى­عى­نىڭ تاريحي, كوركەمدىك قۇن­دى­لىعىن ساقتاي وتىرىپ, قازىرگى زا­مانعا ساي پايدالانۋ ءۇشىن جاع­­داي جاساۋ قاجەتتىلىگىن اتاپ ايت­تى.

ال, شىمكەنتتەگى زامان تالابىنا ساي جاڭادان تۇرعىزىلىپ جاتقان ساۋلەتتىك جوبالارعا كەڭىنەن توقتالعان ول «Shymkent City» جوباسىنىڭ اۋماعىنداعى تۇرعىن ءۇي كەشەندەرى تۋرالى ءسوز قوزعادى. ارعىنبەكوۆ كو­شە­سىندەگى كوپقاباتتى تۇر­عىن ءۇي كەشەنىنىڭ, ءنۇرسات شا­عى­ن اۋدانىنداعى «Nur-Sultan Plaza» كوپقاباتتى تۇر­عىن ءۇي كەشەنىنىڭ, ولاردىڭ قاس­بەتتەرىنىڭ سونداي-اق, كوپقا­باتتى اۆتو­­تۇراقتاردىڭ ەسكيزدىك جوبالارىن تالقىلادى.

«بۇگىندە شىمكەنت قالاسى جاڭاشا قارقىنمەن دامۋدا. قالانىڭ ساۋلەتى, اسەمدىگى مەن كوركى ارحيتەكتورلارعا تىكە­­لەي بايلانىستى. كەز كەلگەن قۇ­رىلىس نىسانىن سالعاندا كە­ڭەس مۇشەلەرى ءبىر كىسىدەي اتسالى­سۋ قاجەت. سەبەبى ءبىز تاريحي كەزەڭدى باستان وتكەرۋدەمىز. مەگا­پوليس دەگەن اتقا لايىقتى قىزمەت ەتۋ بارشامىزدىڭ پارىزىمىز. ساۋلەتتىك-كوركەمدىك شەشىمدەردى ناقتىلاۋ بارىسىندا قاتەلىكتەر جىبەرمەۋىمىز كەرەك. قالانىڭ قاسبەتىن كوركەيتۋدە كاسىبي كوزقاراستارىڭىزدى ايتىپ وتىرعاندارىڭىز ابزال», دەدى ەرلان قۋانىش ۇلى.

كەڭەس وتىرىسىندا الەمدىك نارىقتا وزىندىك ورنى بار «High Vill» جانە «Feb Group» قۇرىلىس كومپانيالارى جاقىن بولاشاقتا ءۇشىنشى مەگاپوليستە ىرگەتاسى قالاناتىن جوبالارىمەن تانىس­تىردى.