ورالدا «Qazaqtanu» جوباسى بويىنشا لەكتوري ءوتتى

ماڭىزدى جيىننىڭ پلەنارلىق وتىرىسىنا قازاقستان حالقى اسسامبلەياسى توراعاسىنىڭ ورىنباسارى, حاتشىلىق مەڭگەرۋشىسى جانسەيىت تۇيمەباەۆ, باتىس قازاقستان وبلىسىنىڭ اكىمى عالي ەسقاليەۆ, عالىمدار, قوعام قايراتكەرلەرى قاتىستى.

جانسەيىت تۇيمەباەۆتىڭ ايتۋىنشا, «Qazaqtany» جوباسى «رۋحاني جاڭعىرۋ» باعدارلاماسى مەن ەلباسى ن.ءا.نازارباەۆتىڭ « ۇلى دالانىڭ جەتى قىرى» اتتى ماقالاسى اياسىندا قولعا الىنعان, ەلىمىزدىڭ ىشكى بىرلىگى مەن ىنتىماعىن ارتىرۋعا باعىتتالعان باعدارلاما. قازاقستان حالقى اسسامبلەياسىنىڭ ۇيىمداستىرۋىمەن «Qazaqtany» دارىستەرى بيىل تۇركىستان جانە پاۆلودار وبلىستارىندا وتكەن ەكەن.

-«قازاقتانۋ جوباسى اياسىندا ءبىزدىڭ وڭىردە دە كوپتەگەن يگى شارالار جۇزەگە اسىپ كەلەدى. اسىلى وسمان اپامىز ايتقانداي, «قازاق ءتىلى – جۇرەك, وزگە تىلدەر وعان تىرەك» دەگەن ۇستانىمدى باتىسقازاقستاندىقتار دا قولدايدى. ءتىلىن بىلگەن ادام عانا سول ۇلتتىڭ جان-دۇنيەسىن تۇسىنەدى. باتىس قازاقستان وبلىسىندا وزگە ۇلت وكىلدەرىنە مەملەكەتتىك ءتىلدى ءبىلۋدىڭ ماڭىزدىلىعىن ۇقتىرۋ, قازاق ءتىلىن وزگە ۇلت وكىلدەرى اراسىندا ناسيحاتتاۋ ماقساتىندا ء«تىلمۇرا» قوزعالىسى قۇرىلدى. بۇل باعىتتا جۇيەلى جۇمىس ءجۇرىپ جاتىر, - دەدى باتىس قازاقستان وبلىسىنىڭ اكىمى عالي ەسقاليەۆ ءوز بايانداماسىندا.

جىل باسىنان باتىس قازاقستان وبلىسى قازاقستان حالقى اسسامبلەياسىنىڭ باستاماسىمەن رەسپۋبليكالىق «قايىرىمدىلىق كەرۋەنى» اياسىندا حالىقتىڭ الەۋمەتتىك قورعالماعان توپتارىن قولداۋعا باعىتتالعان, ۇلى دالانىڭ داستۇرلەرىنە نەگىزدەلگەن «مەيىرىمدى كوكتەم» ايدارىمەن «سارقىت», «سىباعا», «شاشۋ», «اسار», «قامقور», «توقىمقاعار» قايىرىمدىلىق اكتسيالارى جۇزەگە اسقان.

مۇنداي اكتسيالار وبلىستىڭ بارلىق اۋدانىندا ۇيىمداستىرىلىپ, وبلىس بويىنشا 55 مىڭنان استام ادام قاتىسقان 700-گە جۋىق قايىرىمدىلىق شاراسى وتكىزىلگەن.

جيىندا ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ رەكتورى, تاريح عىلىمدارىنىڭ دوكتورى, پروفەسسور ەركىن ءابىل, ورالدىق بەلگىلى ايتىس اقىنى شولپان قىدىرنيازوۆا ءسوز سويلەدى. لەكتوري جۇمىسى ورال قالاسىندا جانە وبلىستىڭ ءۇش اۋدانىندا ەكى كۇن بويى جۇرەدى.