الماتى جوعارى ەكولوگيالىق ولشەمگە ساي, تابيعاتپەن ۇيلەسىمدى ۇشتاسقان جاسىل جەلەكتى قالا بولۋى ءتيىس. بۇل تۋرالى قالا اكىمى باقىتجان ساعىنتاەۆ وتكەن اپتادا «الماتى-2050»دامۋ ستراتەگياسىن تانىستىرۋ بارىسىندا ايتقان ەدى. قورشاعان ورتاعا كەلتىرەتىن زياندى زاتتاردى ازايتىپ, كوپتەپ جاسىل جەلەك ەگۋ جوسپارلانعان, دەپ حابارلادى Almaty.tv ءتىلشىسى.
ول ءۇشىن ارنايى «جاسىل الماتى» باعدارلاماسى دا ازىرلەنگەن.
«الماتى ¬– ەكولوگيالىق تازا, جاسىل جەلەكتى قالاعا اينالۋى كەرەك. الداعى ءۇش جىلدا 1 ميلليون ءتۇپ اعاش وتىرعىزۋىمىز قاجەت. سونىمەن قاتار, دەمالىس ورىندارى مەن ساياباقتاردا دا كوگالداندىرۋ جۇمىستارى قارقىندى جۇرگىزىلەدى. «جاسىل الماتى» باعدارلاماسى سول ءۇشىن جاسالدى», - دەدى الماتى قالاسىنىڭ اكىمى باقىتجان ساعىنتاەۆ.
قالا باسشىسى ايتقان «جاسىل الماتى» باعدارلاماسى - «الماتى-2050» دامۋ ستراتەگياسىنىڭ ءبىر باعىتى. اتالعان جوبا اياسىندا مەگاپوليس كوگالداندىرىلماق. قازىردىڭ وزىندە بۇل جولدا جۇمىستار جۇرگىزىلۋدە. ماسەلەن, تۇكتى تاۋىندا 50 مىڭ ءتۇپ اعاش وتىرعىزىلدى. ال, كوكتوبە جوتاسىنا 50 مىڭ جابايى الما مەن جارتى ميلليون قىزعالداق ەگىلدى. سونىمەن قاتار, مەكتەپ اۋلاسىنا دا جاسىل جەلەك وتىرعىزىلىپ جاتىر. ەكولوگيالىق ناۋقاننىڭ بارلىعىنا قالا اكىمى باقىتجان ساعىنتاەۆ باستاعان توپ, ەرىكتىلەر, ستۋدەنتتەر جانە تابيعاتقا جانى اشيتىن قاراپايىم تۇرعىندار قاتىسىپ جاتىر.
«جاسىل الماتى» اكتسياسىنىڭ ەرەكشەلىگى تەك قانا تال ەگىلىپ جاتقان جوق. قاسىنا قىزعالداعى قوسىلىپ ەگىلىپ جاتىر. كەلەسى جىلى ەلەستەتىىڭىزشى اعاشتارىمىز جاپ-جاسىل, ورتاسىندا قىزىل سارى, قىزعالداقتارىمىز جايقالىپ تۇرسا. تابيعاتتىڭ سۇلۋلىعى ادامدى تارتادى عوي. ءبىر كەلگەن ادام سوڭىنا 2-3 ادامدى ەرتىپ كەلەدى», - دەدى ءانشى, اكتريسا جانار ايجانوۆا.
قالالىق جاسىل ەكونوميكا باسقارماسىنىڭ ماماندارى اكىم ايتقان جوبانى جۇزەگە اسىرۋ جولدارى قاراستىرىلىپ جاتقانىن ايتادى. سونىمەن قاتار, اعاشتار از جەرلەر انىقتالىپ سوندا ەگىلگەنىن دە جەتكىزدى. الاتاۋ, تۇركسىب جانە ناۋرىزباي اۋداندارىنا قاراشانىڭ 25-ىنە دەيىن جاپپاي تال وتىرعىزىلادى.
«قازىرگى كەزدە جاسىل الماتى جوباسى بويىنشا ءبىز عالىمدارمەن جۇمىس ىستەپ جاتىرمىز. ياعني, قاي جەرگە قانداي اعاش ءتۇرىن وتىرعىزۋدى تالقىلايمىز. مەكتەپتەر مەن بالاباقشالاردىڭ اۋماعى, مەملەكەتتىك مەكەمەلەردىڭ ماڭايىن انىقتاعاننان كەيىن جاسىل جەلەك ەگىلەدى», - دەدى الماتى قالاسى جاسىل ەكونوميكا باسقارماسىنىڭ ءبولىم باسشىسى ولجاس جانىسباەۆ.
«جاسىل الماتى» جوباسى 2030 جىلعا دەيىن 3 باعىت بويىنشا جۇزەگە اسىرىلۋى ءتيىس. الدىمەن ساياباقتار مەن دەمالىس ورىندارىنا باسا نازار اۋدارىلادى. ودان كەيىن, جاڭادان سالىنعان تۇرعىن ۇيلەردىڭ اۋلالارىنا جاسىل جەلەك ەگىلەدى. سوڭعىسى, «جاسىل قوردى» جاڭارتۋ. ياعني, ءار تال بىرىڭعاي جۇيەگە ەنگىزىلەدى. وسىلايشا ماماندار, ەلەكتروندى تۇردە قالاداعى اعاشتاردىڭ جاعدايىن باقىلاپ وتىرماق.