مەديتسينالىق ساقتاندىرۋ قورى ءمامس جۇيەسى تۋرالى حالىقتىڭ جان-جاقتى اقپارات الۋى ءۇشىن, سونداي-اق ولاردىڭ ءمامس جۇيەسىندە ءوزىنىڭ ساقتاندىرۋ مارتەبەسىن بىلۋگە مۇمكىندىك بەرەتىن قۇرال جاساقتادى.
بۇل قۇرالدى ەلىمىزدىڭ كەز كەلگەن تۇرعىنى پايدالانا الادى. ارنايى پلاگيننىڭ قۇرىلعانى تۋرالى «الەۋمەتتىك مەديتسينالىق ساقتاندىرۋ» كەاق اقپاراتتىق جۇيەلەردى دامىتۋ دەپارتامەنتىنىڭ ديرەكتورى ايدار ايتۋەۆ ايتىپ بەردى.
– بۇل پلاگيندى قۇرۋداعى ماقسات قانداي, حالىققا بەرەر پايداسى بار ما؟
– فۋنكتسيونالدى تۇرعىدان العاندا, قۇرال وتە قاراپايىم. ارنايى رەسۋرسقا كىرىپ, ءار تۇرعىن ءوزىنىڭ جسن ءنومىرىن ەنگىزسە بولدى, ساقتاندىرۋ مارتەبەسىن بىلە الادى. بۇگىنگىدەي بارلىق ادام گادجەت قولداناتىن زاماندا, بۇل ىڭعايلى ءارى ۋاقىتتى ۇنەمدەيدى. ەگەر «ساقتاندىرىلعان» دەگەن جاۋاپ كەلسە, وندا الاڭداماۋعا بولادى. ال ەگەر جاۋاپ «ساقتاندىرىلماعان» بولسا, وندا سەبەبىن انىقتاۋ كەرەك. مىسالى, ازاماتتىڭ «جالدامالى جۇمىسشى» دەگەن مارتەبەسى بار جانە بۇل ءۇشىن تولەمدى جۇمىس بەرۋشى جاسايدى دەلىك. جۇيە ارقىلى جۇمىسشى ءوزى جۇمىس ىستەيتىن ۇيىمنىڭ ءوزى ءۇشىن مەديتسينالىق ساقتاندىرۋعا تولەم جاساعانىن نەمەسە جاساماعانىن انىقتاي الادى.
– ەلىمىزدىڭ ءاربىر تۇرعىنى ءوزىنىڭ ساقتاندىرۋ مارتەبەسىن نە ءۇشىن قاداعالاپ وتىرۋى كەرەك؟
– 2020 جىلدىڭ 1 قاڭتارىنان قازاقستاندا ءمامس جۇيەسى ىسكە قوسىلادى. وسى ۋاقىتقا دەيىن بارلىعىمىز ءمامس جۇيەسىندەگى ساقتاندىرۋ مارتەبەمىزدى انىقتاپ الۋىمىز كەرەك. مىسالى, ادامعا قانداي دا ءبىر سىرقات بويىنشا دياگنوز قويىلدى جانە وعان مەديتسينالىق كومەك قاجەت بولدى. ەگەر ول ساقتاندىرىلماعان بولسا, وندا بۇل ادامعا قۇرامىنا ۋچاسكەلىك دارىگەر, جەدەل كومەك, شۇعىل ستاتسيونارلىق كومەك, الەۋمەتتىك ماڭىزى بار اۋرۋلار كەزىندە كورسەتىلەتىن مەديتسينالىق كومەك تۇرلەرى كىرەتىن تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) قولجەتىمدى بولادى. ال ءمامس پاكەتى بويىنشا بەرىلەتىن مەديتسينالىق كومەك تۇرلەرى تەك ساقتاندىرىلعان ازاماتتارعا عانا قولجەتىمدى. وسىلايشا ەگەر ءسىز ءمامس جۇيەسىندە ءوزىڭىزدىڭ ساقتاندىرۋ مارتەبەڭىزدى انىق بىلسەڭىز, 2020 جىلدان باستاپ وزىڭىزگە قاجەتتى بارلىق مەديتسينالىق قىزمەتتەر سپەكترىن الا الاسىز.
– بۇل قۇرالدى پايدالانۋ قولجەتىمدى مە, ياعني كەز كەلگەن جەردەن قوسىلۋعا بولا ما؟
– پلاگين امبەباپ فورماتتا جاسالعان. ول كەز كەلگەن سايتقا تىركەۋگە ىڭعايلى. وسى مۇمكىندىكتى پايدالانا وتىرىپ, بۇل ماسەلەگە قىزىعۋشىلىق تانىتقان بارلىق سايت يەلەرىنە ايتارىم: «ەگەر سىزدەر ءوز رەسۋرستارىڭىزدا پلاگيندى ورناتقىلارىڭىز كەلسە, «الەۋمەتتىك مەديتسينالىق ساقتاندىرۋ» كەاق-قا ءوتىنىش جازا الاسىزدار. بايلانىس ءۇشىن e-mail: p.andreev@fms.kz. پلاگيندى قاراپ كورىپ, زەردەلەۋ ءۇشىن «مسق» كەاق-تىڭ www.fms.kz رەسمي سايتىن اشۋ كەرەك.
دايىنداعان
دۋمان اناش,
«Egemen Qazaqstan»