بۇل تۋرالى كەشە ەلوردادا وتكەن «ستاندارتتاۋ جانە ەكسپورت: قىتاي نارىعىنا شىعۋ» فورۋمىندا ايتىلدى. كورشىلەس مەملەكەتتە ويسىلقارا مەن قامبار اتا ءتولىنىڭ ونىمىنە قىزىعۋشىلىق ارتىپ كەلەدى. الايدا ۇلتتىق سۋسىنىمىزدى قىتاي نارىعىنا وتكىزۋ وڭاي بولماي تۇر. سەبەبى بۇل ەلدە ءسۇت ونىمدەرىنىڭ ۇلتتىق ستاندارتى ەنگىزىلگەن. كورشى ەلدىڭ نارىعىن جاۋلاۋ ءۇشىن وتاندىق وندىرۋشىلەرگە سول تالاپقا بەيىمدەلۋگە تۋرا كەلەدى.
بۇل اسىرەسە قۇرعاق قىمىز سۋسىنىنا قاتىستى. ويتكەنى اتالعان ءونىم الىپ مەملەكەتتە كەڭىنەن تارالماعان. دەسە دە قىتايلىقتاردىڭ قىمىزعا سۇرانىسى جوعارى دەيدى قازاقستاندىق ساراپشىلار.
– قۇرعاتىلعان قىمىز تاسىمالداۋعا جانە ۇزاق ۋاقىت ساقتاۋعا وتە ىڭعايلى. وعان قىتايلىقتار ۇلكەن قىزىعۋشىلىق تانىتىپ وتىر. الايدا قىتايدا قىمىزعا بايلانىستى بىردە-ءبىر ستاندارت جوق. نەگە دەسەڭىز, كورشى ەلدىڭ نارىعىندا ۇلتتىق ءونىمىمىز ءالى كەڭ تارالا قويعان جوق. ولار ءسۇت ونىمدەرىن كوپ پايدالانا بەرمەيدى ەكەن. ايتسە دە سۇرانىس جوعارى. سول سەبەپتى ءوزىمىزدىڭ ۇلتتىق ستاندارتىمىزدى قىتايدىڭ تارتىبىنە نەگىزدەپ, ۇسىندىق. ءبىزدىڭ ۇسىنىسىمىز سول ەلدىڭ دەنساۋلىق ساقتاۋ مينيسترلىگىندە قارالىپ, تەكسەرىلەتىن بولادى. شىلدە ايىندا قىتايدىڭ كەدەن باسقارماسى وكىلدەرىمەن كەزدەستىك. ءبىزدىڭ ستاندارتتىڭ ءوز ەرەكشەلىكتەرى بار. ماسەلەن, ونىڭ مازمۇنى كەدەن وداعىنىڭ تەحنيكالىق رەگلامەنتىمەن تىعىز بايلانىستى. سوندىقتان قىتايلىق تاراپ ازىق-ت ۇلىك قاۋىپسىزدىگىنە قاتىستى قوسىمشا تالاپقا سۇراۋ سالدىردى. سول سەبەپتى ءبىز كەدەن وداعىنىڭ بارلىق تەحنيكالىق رەگلامەنتتەرىن قىتاي تىلىنە اۋداردىق. ەكى قۇجات تاماق ءوندىرىسى قاۋىپسىزدىگى جانە تاعى بىرەۋى ءسۇت ونىمدەرىنىڭ قاۋىپسىزدىگى تۋرالى بولاتىن. سول سەكىلدى 20 قازاقستاندىق ستاندارت وسى تىزىمگە قوسىلدى, – دەيدى قازاقستاندىق ستاندارتتاۋ جانە سەرتيفيكاتتاۋ ينستيتۋتى باس ديرەكتورىنىڭ ورىنباسارى ەركەجان ءامىرحانوۆا.
ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتى توراعاسىنىڭ ورىنباسارى سەرىك قۇسايىنوۆتىڭ ايتۋىنشا, كورشىلەس ەلدىڭ نارىعىنا ءوتۋ ءبىز ويلاعانداي وڭاي ەمەس. قىتايدا يمپورت تاۋارلارىنا قويىلاتىن تالاپ قاتاڭ دەيدى ول.
– ولار سىرتتان كەلەتىن تاۋارعا سىن كوزبەن قارايدى. بۇل رەتتە قازاقستاندىق وندىرۋشىلەر تاۋارىن وتكىزەتىن ەلدىڭ زاڭناماسىنا بەيىمدەلە ءبىلۋى قاجەت. ونىڭ ىشىندە كەدەن ەرەجەلەرى, سەرتيفيكاتتاۋ مەن ستاندارتتاۋعا بايلانىستى ماسەلەلەر بار. قىتايلىقتاردىڭ تالاپتارى وتە قيىن. بيۋروكراتيالىق كەدەرگىلەر از ەمەس. قازىر قازاقستاندىق ومارتاشىلار بال ءونىمىن قحر-عا تاسىمالداۋدى جولعا قويعان. سونداي-اق قىتايدا وتاندىق ۇن ونىمدەرىنە سۇرانىس جاقسى. ولاردىڭ سۇرانىسىنا ساي بولۋ ءۇشىن ءتيىستى ستاندارتتاردى زەرتتەپ جاتىرمىز. جالپى العاندا, ەكسپورتتىق الەۋەتىمىزدى ارتتىرۋ ماقساتىندا 5 مەملەكەتتىڭ نارىعىنا شىعۋ كوزدەلگەن. قازاقستان مەن قىتاي اراسىنداعى ەكسپورت پەن يمپورت ماسەلەسىنە كەلسەك, ۇپايىمىز بىردەي ەمەس. اتاپ ايتقاندا, ءبىز كورشىلەس ەلدەن كوبىنەسە دايىن ءونىم يمپورتتايمىز. ال قازاقستاننان نەگىزىنەن شيكىزات تاسىمالدانادى, – دەدى س.قۇسايىنوۆ.