الماتى قالاسى مەدەۋ اۋدانى تۇرعىندارىنىڭ ءوتىنىشى بويىنشا قالا اكىمدىگى گورنىي, گورنوۆوستوچنىي جانە بەگالين كوشەلەرى تۇيىقتالعان تاۋ بوكتەرلەرىنىڭ باتىس جاقتاعى قابىرعاسىن نىعايتۋ جۇمىسىن اياقتاعان. بۇل تۋرالى قالا اكىمى باقىتجان ساعىنتاەۆ Instagram پاراقشاسىندا جازدى.
«شىلدەدە مەدەۋ اۋدانىن ارالاعان كەزدە كوكتوبە تاۋىنىڭ كوشكىن قاۋپى بار ايماعىنا ورنالاسقان بىرنەشە ءۇي تۇرعىندارى كومەك كورسەتۋدى وتىنگەن ەدى. ويتكەنى ۇيلەرگە وپىرىلۋ قاۋپى ءتونىپ, كەلەڭسىز جايت تۇرعىنداردى جابىرقاتقان بولاتىن. تامىز ايىندا گورنىي, گورنوۆوستوچنىي جانە بەگالين كوشەلەرى تۇيىقتالعان تاۋ بوكتەرلەرىن نىعايتۋ باستالعان بولاتىن. جالپى, 60 جەكە تۇرعىن ءۇي ورنالاسقان 290 مەتر بەتكەي نىعايتىلۋى ءتيىس ەدى. باتىس جاقتاعى قابىرعانى گابيوننان جاسالعان جەتىمەترلىك تىرەۋمەن نىعايتۋ جۇمىسى اياقتالدى, شىعىس جاعىن قاراشانىڭ سوڭىندا بىتىرەمىز, جالپى بارلىق جۇمىستار اياقتالادى. وسى ايماقتا ورنالاسقان 250-گە جۋىق تۇرعىننىڭ قاۋپى سەيىلەتىن بولادى», دەپ جازدى ب. ساعىنتاەۆ.