بۇگىن الماتىدا ءال-فارابي اتىنداعى عىلىم مەن تەحنيكا سالاسى بويىنشا مەملەكەتتىك سىيلىقتىڭ يەگەرى, قازاقستان رەسپۋبليكاسىنىڭ ەڭبەك سىڭىرگەن عىلىم قايراتكەرى, قازاقستان رەسپۋبليكاسىنىڭ ۇعا اكادەميگى امانجول قوشانوۆتىڭ 85 جىلدىعىنا جانە عىلىمي ءارى قوعامدىق قىزمەتىنىڭ 60 جىلدىعىنا ارنالعان حالىقارالىق سيمپوزيۋم ءوتتى.
القالى جيىن بارىسىندا الماتى قالاسى اكىمىنىڭ ورىنباسارى ەرجان باباقۇماروۆ سالتانات يەسىن 85 جىلدىق مەرەيلى جاسىمەن قۇتتىقتادى جانە مەملەكەت باسشىسى قاسىم-جومارت توقاەۆتىڭ جەدەلحاتىن وقىپ بەردى.
«قۇرمەتتى امانجول قوشان ۇلى! 85 جاسقا تولعان مەرەيتويىڭىز قۇتتى بولسىن! ءسىز كورنەكتى عالىم رەتىندە وتاندىق ەكونوميكالىق عىلىمدى قالىپتاستىرۋعا مول ۇلەس قوسىپ كەلەسىز. ءسىزدىڭ عىلىمي ەڭبەكتەرىڭىز جانە ىلگەرى زەرتتەۋلەرىڭىز تاۋەلسىز مەملەكەتىمىزدىڭ وركەندەۋىنە وزىندىك پايداسىن تيگىزە بەرەتىنى ءسوزسىز. دەنساۋلىعىڭىز مىقتى بولىپ, ىزدەنىسكە تولى ءومىر جولىڭىزداعى ەسەلى ەڭبەگىڭىزدىڭ جەمىسىن ۇزاعىنان كورە بەرىڭىز», – دەلىنگەن جەدەلحاتتا.
سيمپوزيۋمنىڭ جۇمىسىنا تانىمال وتاندىق جانە شەتەلدىك عالىمدار, جوعارى وقۋ ورىندارىنىڭ قىزمەتكەرلەرى, مەملەكەتتىك بيلىك ورگاندارىنىڭ, بيزنەستىڭ, حالىقارالىق جانە ۇكىمەتتىك ەمەس ۇيىمدار مەن قوعام وكىلدەرى قاتىستى.